Klei Aê Diê Blŭ: I Y-Pêtrôs 2:11-12
Êlan kliăng: “Brei diih dôk dơ̆ng ƀơ̆ng huă jăk nanao ti krah phung amâo đăo, čiăng kơ tơdah diñu mčeh kơ diih jing mnuih ngă jhat, diñu dưi ƀuh bruă jăk diih ngă leh anăn mpŭ mni kơ Aê Diê ti hruê Ñu srăng lŏ hriê” (I Y-Pêtrôs 2:12)
Klei êmuh ksiêm mĭn: Ya ngă brei phung đăo kơ Krist hngah hĕ kơ klei kđeh tluh? Hŏng ya klei đru phung mčeh kơ phung đăo mâo mmông găl mpŭ mni kơ Aê Diê? Ya jing klei drei čiăng snăk êjai dôk hdĭp ti lăn ala anôk dôk jưh bhiâo anei?
Khua ƀĭng kna Y-Pêtrôs lŏ bi hdơr kơ phung đăo kơ klei dôk dơ̆ng ƀơ̆ng huă hŏng klei đăo čiăng kơ hŏng klei anăn mâo lu mnuih wĭt kơ Khua Yang. Êlâo hĭn, ñu lač: “diih jing msĕ si phung tue leh anăn phung dôk ti êngao čar pô” (êlan 11). Phung đăo kơ Krist dôk ti lăn ala anei jing phung ƀuôn sang kơ sa boh čar, ƀiădah ƀuôn phŭn drei pô jing ti adiê. Ară anei wăt ti anôk drei dôk, drei ăt jing knŏng phung tue mơh, amâo djŏ mnuih ƀuôn sang sĭt ôh. Drei srăng ngă bi ênŭm bruă klam kơ sa čô mnuih ƀuôn sang, duah ƀơ̆ng huă ƀiădah amâo pla phŭn ti lăn ala anei ôh. Hdĭp ti krah lăn ala ƀiădah amâo jing dŏ lăn ala ôh. Brei drei hngah, čiăng lač lui hĕ, weh đuĕ mơ̆ng klei kđeh tluh, anăn jing klei tluh soh jhat, jing jih jang klei bi kdơ̆ng hŏng mngăt Aê Diê bi doh leh. Jih jang klei kđeh tluh brei drei hngah jing: “Klei knhông, klei čhŏ mrŏ, klei knhŭk knhul, klei kkuh rup yang, klei jing mjâo, klei bi roh, klei bi msao, klei nač, klei čôñ ăl, klei čuôt klih, klei bi tăng, klei mĭn bi kah phung, klei tluh, klei kpiê ruă, klei ră huă mnăm, leh anăn jih jang klei msĕ snăn” (Galati 5:19-21).
Mphŭn dô ăt msĕ si ară anei mơh, phung amâo đăo ôh khăng mčeh kơ phung đăo. “Phung amâo đăo” čiăng lač kơ phung amâo mâo klei bi mguôp hŏng Aê Diê ôh. Klei lŏ bi kdơ̆ng wĭt jăk hĭn jing phung đăo srăng bi êdah brei phung amâo đăo ƀuh klei bi mlih hlăm klei hdĭp drei hŏng klei dôk dơ̆ng ƀơ̆ng huă jăk ti krah jih jang mnuih. Tui si bhiăn, tơdah mâo klei arăng mčeh ênưih snăk drei lŏ bi kdơ̆ng wĭt, ƀiădah Khua Yang Yêsu mtă leh brei dlăng kơ klei anăn jing klei bhiăn mâo: “Tơdah lăn ala bi êmut kơ diih, brei diih thâo kơ lăn ala bi êmut leh kơ Kâo êlâo. Tơdah diih jing phung lăn ala, lăn ala srăng khăp kơ phung ñu pô. Ƀiădah kyuadah diih amâo jing ôh phung lăn ala, Kâo ruah leh diih mơ̆ng lăn ala, kyuanăn lăn ala bi êmut kơ diih” (Y-Yôhan 15:18-19). Tơdah drei dôk dơ̆ng ƀơ̆ng huă jăk ti krah phung mčeh kơ drei, ƀrư̆ ƀrư̆ diñu srăng ƀuh klei drei dôk dơ̆ng ƀơ̆ng huă jăk, leh anăn truh mmông Khua Yang čuă čhưn, diñu srăng lŏ mĭn wĭt leh anăn mpŭ mni kơ Aê Diê jing Pô drei kkuh mpŭ.
Mâo mnuih lač knhuah hdĭp phung đăo kơ Krist jing klei mluk tơdah “huă êsei lăn ala, blŭ klei hlăm adiê”. Ƀiădah drei jing phung găp djuê doh jăk, phung ƀuôn sang Aê Diê pô, hdĭp ti lăn ala anôk jưh bhiâo anei, klei yuôm hĭn jing brei drei dôk dơ̆ng ƀơ̆ng huă jăk čiăng lu mnuih ƀuh leh anăn thâo kral Khua Yang. Čiăng snăk ti hruê knhal tuč srăng mâo lu mnuih bi kƀĭn mbĭt hŏng drei hlăm Ƀuôn Ala Mtao hlŏng lar Aê Diê. Anăn yơh jing ƀuôn sĭt kơ jih jang phung đăo kơ Krist.
Si drei bi êdah klei dôk dơ̆ng ƀơ̆ng huă jăk ti krah phung amâo mâo đăo?
Wah lač: Ơ Khua Yang khăp ơi, bi mni kơ Ih bi mtlaih kâo leh, brei kâo jing sa čô mnuih ƀuôn sang doh jăk Ih. Đru kâo hdĭp bi mơak kơ Ih nanao, dôk dơ̆ng ƀơ̆ng huă jăk ti krah lăn ala čiăng mâo lu mnuih ƀuh leh anăn mâo mmông găl mpŭ mni kơ Khua Yang. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yêrêmi 34
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
