Klei Aê Diê Blŭ: Klei Bi Hriêng 28:14
Êlan kliăng: “Jăk mơak yơh hlei pô huĭ mpŭ kơ Yêhôwa nanao, ƀiădah hlei pô bi khăng ai tiê ñu srăng mâo klei knap mñai.” (Klei Bi Hriêng 28:14)
Klei êmuh ksiêm mĭn: Si mnuih bi khăng ai tiê jing? Si boh jhat kơ mnuih bi khăng ai tiê srăng mă tŭ? Ya klei mñă kơ drei mơ̆ng êlan Klei Bi Hriêng anei?
Tơdah hlăm kdrêč tal êlâo hlăm êlan 14 lač kơ klei mnuih ktư̆ yơ̆ng nanao dôk ti anăp klei jing soh jhat pô leh anăn ti anăp klei doh jăk Aê Diê, snăn kdrêč êdei lač kơ sa rup bi mklăk wĭt, jing mnuih “bi khăng ai tiê”. Klei Bi Hriêng 29:1 lač kơ sa klei mĭn čiăng msĕ snăn mơh jing mnuih “khăng kŏ”. Anei jing sa boh blŭ lač kơ sa čô mnuih čŏng čiăng bi kdơ̆ng, hngah dôk hmư̆ klei mtô lač. Boh blŭ anei khăng mblang jing “hrưn” amâodah “khăng kŏ”. Anei jing klei “khăng ai tiê” hŏng Khua Yang leh anăn hŏng Klei Aê Diê Blŭ, jing klei khăng ai tiê ti anăp klei sĭt kơ klei soh hlăm ai tiê, kyuanăn amâo thâo kral klei soh leh anăn hngah kmhal kơ klei soh. Mnuih amâo čiăng kmhal kơ klei soh hlăm êlan 13 srăng jing mnuih “khăng ai tiê” hlăm êlan 14. Dưi lač, klei mgao ngă kơ sa čô mnuih jing bum ală klei hdĭp mngăt, hrưn leh anăn amâo lŏ thâo kmhal kơ klei soh ôh.
Boh jhat kơ mnuih bi khăng ai tiê jing klei “srăng mâo klei knap mñai” yơh. “Klei knap mñai” tinei mblang jing klei “dluh lĕ bhiâo riâo rit”. Mnuih bi khăng ai tiê amâo čiăng dôk hmư̆ Klei Aê Diê Blŭ leh anăn amâo tŭ kơ klei soh ñu pô ôh, srăng jing msĕ si sa drei hlô lĕ hlăm ƀưi bhiâo riâo rit. Klei Bi Hriêng 29:1 lač klă hĭn: “srăng rai tuč bhiâo riâo rit, amâo lŏ mâo êlan dưi mdrao ôh”. Mnuih bi khăng ai tiê amâo srăng dưi tlaih ôh mơ̆ng ƀưi ñu lĕ bhiâo riâo rit. Anei jing rup phung kahan Pharaôn djiê ti krah Êa Ksĭ Hrah.
Hŏng phung mnuih mgao, yap diñu yơh djŏ nanao, čuăn bi kdơ̆ng hŏng Klei Aê Diê Blŭ snăn klei tŭ boh jhat jing djŏ yơh, amâo dưi tlaih ôh, leh anăn “amâo lŏ mâo êlan dưi mdrao ôh”. Boh jhat anei dưi kbiă hriê mơ̆ng klei Aê Diê phat kđi, leh anăn năng ai jing boh mơ̆ng bruă ngă mluk mgu diñu pô. Boh jhat anei truh msĕ si “bhiâo riâo rit klei bi rai srăng truh”dưi atăt truh kơ klei djiê (I Têsalônik 5:3), leh anăn srăng truh wăt êjai dôk hdĭp mơh. Hŏng phung đăo kơ Khua Yang ƀiădah ăt dôk khăng ai tiê amâo gưt asăp kơ Khua Yang ôh leh anăn amâo kmhal ôh snăn Ñu srăng hrui wĭt klei Ñu răng mgang lui mnuih anăn tŭ boh jhat klei bi kmhal (I Kôrantô 5:5).
Êlan Klei Bi Hriêng anei mñă kơ grăp čô drei brei kăp răng kơ klei bi knăl hưn êlâo brei răng kbiă hriê mơ̆ng Aê Diê. Tăp năng klei anăn jing klei blŭ mơ̆ng Khua Yang hriê bhiâo riâo rit msĕ si klei ruă kjham, klei truh knap mñai huĭ hyưt, amâodah klei djiê sa čô găp jhat ƀai. Tơdah sa čô mnuih ăt dlăng hơăi mang kơ jih jang klei Aê Diê ƀuah mkra, snăn klei bi rai srăng truh bhiâo riâo rit leh anăn amâo lŏ mâo êlan dưi mdrao ôh. Klei khăp leh anăn klei pap Aê Diê amâo mâo knhal ƀiădah mmông găl pioh kơ anak mnuih mâo kdriêl knhal. Đăm bi khăng ai tiê ôh čiăng dưi mă tŭ klei pap brei mơ̆ng Aê Diê.
Si ngă drei dôk khăng ai tiê mơ̆ ti anăp klei Khua Yang mñă kơ drei?
Wah lač: Ơ Khua Yang, pap brei kơ kâo, đăm lui kâo jing sa čô mnuih khăng ai tiê ôh, ƀiădah akâo Khua Yang ƀuah mkra, mtô lač, čiăng kơ kâo thâo kmhal tơdah ngă soh leh anăn hdĭp sa klei hdĭp thâo mĭn, bi mơak kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y-Yôhan 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
