Pajlug 28:14
Nqe cim:
“Niaj hnub mloog tus TSWV tej lus koj thiaj ua neej kaj siab lug. Yog koj ua neeg tawv ncauj, koj yuav raug kev puastsuaj.” (Pajlug 28:14)
Lus nug rau sawvdaws xav:
– Li cas yog tus neeg siab hnyav?
– Tus neeg siab hnyav yuav txais nuj nqis li cas?
– Dhau nqe Pajlug no ntuas peb txog yam dab tsi?
Yog feem thawj ntawm nqe 14 hais txog tus neeg pheej tshee hnyo rau yus tus kheej uas yog neeg phem thiab ntawm Vajtswv tus uas dawbhuv lub xubntiag, ces feem tim ob hais txog tus duab sib txawv, uas yog tus neeg “tawv ncauj”. Pajlug 29:1 hais txog tib lub ntsiab li ntawd, uas yog tus neeg “tawv ncauj”. No yog lolus taw txog ib tug neeg uas txhob txwm tsim kev kub ntxhov, thiab tsis kam mloog lwm tus tej lus qhia. Lolus no pheej txhais hais tias “tsis mloog lus” lossis “tawv ncauj”. Ntawd yog “lub siab tawv” rau Vajtswv thiab Vajtswv Txojlus, lub siab tawv rau qhov tseeb txog tej kev txhaum hauv yus lub siab, thiaj tsis lees paub kev txhaum thiab tsis kam tso kev txhaum tseg. Tus neeg uas tsis tso kev txhaum hauv nqe 13 yuav dhau los ua tus neeg “siab tawv” hauv nqe 14. Kev khav theeb ua rau tib neeg dig muag ntawm sab ntsujplig, tsis mloog lus, tsis muaj peevxwm tso tau kev txhaum tseg.
Nuj nqis ntawm tus neeg tawv ncauj yog “yuav raug kev puastsuaj”. “Kev puastsuaj” ntawm no muaj lub ntsiab yog “raug puastsuaj xav tsis thoob”. Tus neeg tawv ncauj tsis mloog Vajtswv lus thiab tsis kam tig saib yus kev txhaum yuav zoo li tus tsiaj uas tib ntsais muag xwb poob nkaus rau hauv lub vojhlua. Pajlug 29:1 hais meej dua hais tias: “yuav puastsuaj thiab tsis muaj hnub zoo ntxiv li lawm”. Tus neeg tawv ncauj yuav dim tsis taus lub vojhlua uas tib ntsais muag nws poob rau hauv lawm. Ntawd yog Falaus pab tub rog uas raug poob rau hauv Hiavtxwv Liab tuag tas lawm.
Hais txog cov neeg khavtheeb, pheej xav tias tus kheej thiaj yog, siv zog tawmtsam Vajtswv ces lawv yuav tau txais nuj nqis khiav tsis dim li, thiab “tsis muaj hnub zoo ntxiv li lawm”. Tej thaum qhov nuj nqis lawv raug yog Vajtswv rau txim, tej thaum yog los ntawm lawv tej haujlwm ruam. Tej nuj nqis no tshwm tuaj zoo li “tamsim ntawd lawv yuav raug kev puastsuaj” (1 Thexalaunikes 5:3), thiab kuj yuav tshwm kiag thaum tseem ua neej nyob. Hais txog tus ntseeg yog pheej tawv ncauj tsis mloog Vajtswv lus, tsis tso kev txhaum tseg ces Vajtswv yuav rho Nws kev tiv thaiv tseg, cia tej nuj nqis ntawd rau txim rau tus ntawd (1 Kauleethaus 5:5).
Nqe Pajlug no ntuas peb yuavtsum ua tib zoo txog tej cim ceebtoom ntawm Vajtswv tuaj. Tej thaum Vajtswv lolus ceebtoom zoo li raug ib tug mob khwv kho, kev sib nrau tsheb txaus ntshai lossis ib tug phoojywg phem kev tuag. Yog ib tug neeg tsis quav ntsej Vajtswv tej lus ntuas ces yuav puastsuaj thiab tsis muaj hnub zoo ntxiv li lawm. Vajtswv kev hlub thiab koob hmoov tsis muaj nrim tiamsis sijhawm rau tibneeg muaj nrim. Yog li ntawd tsis txhob tawv ncauj, cia li tso kev txhaum tseg kom tau txais Vajtswv kev zam txim.
Thov Vajtswv,
Vajtswv, thov hlub tshua nyuam yaus, thov tsis txhob cia nyuam yaus ua neeg tawv ncauj, tiamsis thov cia Vajtswv Koj qhia, qhuab ntuas thiab nplawm thaum ua txhaum kom paub tso kev txhaum tseg, los ua neeg ntse haum Vajtswv siab. Nyuam yaus tuav Tswv Yexus Khetos lub npe thov, Amees.
Peb puas tseem tabtom nyob lub tsamthawj tawv ncauj ntawm Vajtswv kev qhuab ntuas?
Nyeem Vajluskub hauv peb lub xyoos: 1 Yauhas 4
Kênh Youtube BHKTHN:
