I Pêtrôs 1:22-25
“Bơ̆n chu lui kơ tơdrong ‘Bok Kei-Dei boih, bơ̆n băt kơ lê̆ đĭ dôm tơdrong yoch, băt ‘mêm mơnat kơ bôl buăl ‘nhŏng oh bơngai lui. Bơ̆n athei iŏk tơdrong ‘mêm mơnat dih băl ling lang khŏm khŏm hăm đĭ jơhngơ̆m.” (I Pêtrôs 1:22)
Nơ̆r jet tơchĕng pơwao:
– Tơdrong kiơ pơm kơ Bơngai Lui ưh kơ gơh ‘mêm kơ bơngai nai?
– ‘Bok Pêtrôs đei tơ’bôh ‘bar tơdrong ‘mêm ayơ?
– Tơdrong kiơ pơm kơ bơngai lui arih chu kiơ̆ tơdrong ‘Bok Kei-Dei?
Kră Yang Yêsu chu lôch tơ ‘long pơglang yua kơ tơdrong yoch kon bơngai, na bơngai lui kơ Kră Yang athei chu lôch lê̆ tơdrong arih so lôch hơdai hăm Kră Yang. Kră Yang iung arih đơ̆ng lôch bơih wă ăn kơ bơngai bu lui kơ Kră Yang arih hơdai hăm Sư lăm tơdrong arih ‘nao. Mălei oei đei minh tơdrong sơ’ngon, đei lơ kon Kră Yang oei ăn tơdrong so pơgơ̆r na ưh kơ pôm đon dih băl, ưh tam mă đĭ jơhngơ̆m ‘mêm băl thoi nơ̆r Kră Yang bơtho. Yua kơ lu bơ̆n tam mă chu kiơ̆ tơdrong ‘Bok Kei-Dei, ưh kơ gơnang kơ Yang Bơhngol ‘Lơ̆ng pơm rơgoh jơhngơ̆m bơ̆n đơ̆ng tơdrong kơnê̆, ơh sơ’ngon, ưh kơ wă ăn Kră Yang pơgơ̆r, thoi noh na lu bơ̆n ưh kơ ‘mêm kơ bơngai nai.
‘Bok Pêtrôs bơtho: “Bơ̆n chu lui kơ tơdrong ‘Bok Kei-Dei boih, bơ̆n băt kơ lê̆ đĭ dôm tơdrong yoch, băt ‘mêm mơnat kơ bôl buăl ‘nhŏng oh bơngai lui. Bơ̆n athei iŏk tơdrong ‘mêm mơnat dih băl ling lang khŏm khŏm hăm đĭ jơhngơ̆m.” (trong 22). Lăm nơ̆r ‘nâu, đei ‘bar nơ̆r pơma gah tơdrong ‘mêm: “Jơhngơ̆m ‘mêm kơ ‘nhŏng oh” pơma kơ “Phila” păng “’mêm mơnat băl đĭ jơhngơ̆m” pơma kơ “Agapê” ‘nâu bơih tơdrong ‘mêm chu hŭt akâu thoi Kră Yang. ‘Bok Pêtrôs bơtho kơ lu bơ̆n: “Chu lui kơ tơdrong ‘Bok Kei-Dei, bơ̆n băt kơ lê̆ tơdrong yoch,” wă khan băt lui sơng iŏk Kră Yang, chu lui băt ‘mêm mơnat kơ bôl buăl ‘nhŏng oh bơngai lui wơ̆ ‘lŏ lăm tơdrong ‘mêm, đĭ jơhngơ̆m ‘mêm kơ ‘nhŏng oh thoi Kră Yang ‘mêm kơ bơ̆n.
Phŏ lăp khul bơngai lui hiơt bơih tơdrong ‘nâu: “Tơdrong bơ̆n tơpŭ ming ‘nao ưh kơ sĭ đơ̆ng kon bơngai pơjing ôh, yua kơ kon bơngai nŏng kơ lôch; tơdrong tơpŭ ming ‘nao đơ̆ng ‘Bok Kei-Dei pơjing, ‘Bok Kei-Dei ưh kơ layơ lôch. Sư pơjing bơ̆n jing bơngai ‘nao yua kơ bơ̆n lui kơ nơ̆r Sư pơma, nơ̆r Sư ưh kơ layơ tơplih. Yua kơ nơ̆r Sư, na bơ̆n gơh arih ling lang.” (trong 23). Thoi noh, Pêtrôs bơtho, tơ ‘blŏk kơ rim bơngai lui athei ‘blŏk bơ̆n bơngai tơpŭ ming ‘nao đơ̆ng Yang Bơhngol ‘Lơ̆ng, đei tơplih rim năr kiơ̆ nơ̆r Kră Yang, jơ̆ nơ̆r arih wă kơ lu bơ̆n arih kang thoi Kră Yang hloh. Hloh kơ noh đơ̆ng, bơngai lui kăl kơ băt đĭ đăng tôm tơdrong tơ ala teh âu ưh kơ đei sot ôh, gô hiong tôch. “Tơdrong noh kư̆m thoi đe chih lê̆ tơ lăm sơ̆p hla bơar Sư thoi âu: “Đĭ đăng kon bơngai thoi lĕ kơ hla ‘nhĕt, tơdrong ‘lơ̆ng rŏ sư thoi lĕ kơ pơkao ‘nhĕt. ‘Nhĕt sư jing jô, pơkao sư gô đum hơlŭng,” (trong 24). Nơ̆r Kră Yang đĕch oei đei hơnơ̆ng, noh bơih nơ̆r arih mă lu bơ̆n đei pơhrăm iŏk “mă-lei gah nơ̆r ‘Bok Kei-Dei ưh kơ layơ hiong tôch ôh.” Nơ̆r noh boih Tơdrong ‘Nao ‘Lơ̆ng mă đe bơtho ăn kơ iĕm.” (trong 25). Trong tuch luch 25 ‘nâu tơ’blŏk kơ lu bơ̆n bơngai lui bơih kơ Yêsu đei ră roi Tơdrong ‘Nao ‘Lơ̆ng Sư, lei na lu bơ̆n athei arih băt ‘mêm mơnat kơ lu bơngai tam mă băt kơ Kră Yang na lu bơ̆n đĭ jơhngơ̆m ră roi ăn Tơdrong ‘Nao ‘Lơ̆ng kơ lu sư.
Kơkuh kơ Ih Kră Yang, bơnê kơ Ih Kră Yang Yêsu đei jur tơ ala teh âu, chu kiơ̆ kơ ‘Bă wơh Ih lôch, wă ăn kơ inh tơdrong arih ling lang. Apinh Ih ăn jơhngơ̆m pran ‘nao, thim tơdrong adrin wă kơ inh gơh pơhrăm iŏk tơdrong arih chu kiơ̆ Kră Yang arih băt ‘mêm mơnat dih băl kiơ̆ nơ̆r Kră Yang bơtho krao khan yua anăn Kră Yang Yêsu Krist, Amen!
Lu bơ̆n tơ’bôh tơdrong arih chu lui kiơ̆ ‘Bok Kei-Dei thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 4
Kênh Youtube BHKTHN:
