Yakơ 5:10
Pơm Kơmĭl Gah Tơdrong Chơ̆n Ĕnh
“Ơ ‘nhŏng oh, bơ̆n athei adrin pơm kiơ̆ thoi lu bơngai pơtruh nơ̆r ‘Bok Kei-Dei sơ̆ bĕ; yua kơ sơ̆ đe pơm kơ lu sư lơ tơdrong pơmat-tat, mă-lei lu sư ưh kơ achăng lê̆ tơdrong lui ôh.” (Yakơ 5:10)
Nơ̆r jet tơchĕng pơwao:
– Lu bơngai pơtruh nơ̆r ‘Bok Kei-Dei hlôi chơ̆n ĕnh lăm tơdrong kiơ păng lu sư chơ̆n ĕnh thoi yơ?
– Bơ̆n hŏk iŏk tơdrong kiơ đơ̆ng lu sư pơm kơmĭl gah tơdrong chơ̆n ĕnh noh?
Hla bơar Yakơ bơtho lu bơ̆n lơ ‘bai hŏk gĭt kăl gah tơdrong arih lăm đon lui kơplah đei tơdrong pơlong truh lăm chăl arih bơ̆n ‘nâu. Lăm Yakơ 5:10, bơ̆n gơh hŏk iŏk đơ̆ng lu bơngai pơtruh nơ̆r ‘Bok Kei-Dei sơ̆ tơdrong lu sư pơm kơmĭl kơ bơ̆n gah tơdrong lu sư chu pŭ iŏk pơmat păng tơdrong lu sư chơ̆n ĕnh.
Lăm âu, Yakơ ưh kơ roi bơngai pơtruh nơ̆r ‘Bok Kei-Dei noh hơđăl anăn sư bu hloi ôh, mă-lei sĭt sư tơchĕng kơ lu bơngai pơtruh nơ̆r’Bok Kei-Dei lăm Pah So, lăm lu đe ei đei Yôhan ‘Batem hai.Lu sư bơngai “yua anăn Kră Yang khan lê̆ hơdrol”.Hmă sư, mưh kơtơ̆ng nơ̆r “khan lê̆ hơdrol”,lơ bơngai tơchĕng kơ nơ̆r ‘nei đe khan lê̆ lu tơdrong wă truh tơ anăp. Mă tơpă sư, đei lu mơ’nah, đei khan lê̆ hơdrol gah lu tơdrong wă truh tơ anăp ning-mônh, lu sư khan noh yua kơ Kră Yang tơ’bôh ăn kơ lu sư wă kơ lu sư khan lê̆ hơdrol, mă-lei tơdrong jang mă Kră Yang pơjao tơm wă kơ lu bơngai khan lê̆ hơdrol pŭ iŏk jang noh tang măt Kră Yang roi ăn kơ đe, tơbăt kơ đe tơdrong nơ̆r Kră Yang bơtho. Lơ sư, nơ̆r Kră Yang mă lu sư tơbăt noh ‘bơm kơ tơdrong krao kon pơlei athei tơbral tơdrong yoch,tơplih tơdrong arih. ‘Noh lu nơ̆r tơ’blŏk, nơ̆r tơbăt athei kơchăng kơ tơdrong wă truh, nơ̆r roi tơbăt tơdrong kiơ ei mưh pơm gô răm na athei ‘nĕ kơ pơm kơnh răm,lu nơ̆r đơ̆ng lu bơngai khan lê̆ hơdrol ‘nei juăt sư noh nơ̆r mă “anat kơ mơ̆ng”. Yua kơ thoi noh bơih na lơ lu bơngai mă khan lê̆ hơdrol noh đe tơwih kơ lu sư hăm tơdrong kuă kơ mơ̆ng, tơwih hăm tơdrong ayăt hơmăt plơ̆ lu sư dơ̆ng, tơwih hăm jơhngơ̆m areh arĕnh trĕn khŏn, tơwih hăm tơdrong pơm kơnê̆ kơ lu sư…Lu bơngai khan lê̆ hơdrol,mơ’nah đe tôn teh,lu mơ’nah đe chĭt lăm hnam phak,kư̆m đei lu mơ’nah đe pơlôch hloi (lăng lăm Mathiơ 5:12; 23:31,37). Mă khan lei ră, lu sư oei lăp đon chu iŏk pơmat păng chơ̆n ĕnh khŏm jang pơkeh dôm tơdrong jang đơ̆ng Kră Yang pơjao, yua kơ lu sư tơnăp kơjăp hăm Tơ’ngla mă krao lu sư jang.
Bơ̆n dang ei kư̆m lei-lăi thoi lu bơngai khan lê̆ hơdrol sơ̆ mơ̆n,rim ‘nu bơ̆n kư̆m đơ̆ng Kră Yang krao,rơih wă kơ bơ̆n “yua anăn Kră Yang na pơma,” bơtho tơdrong sĭt Kră Yang.Kră Yang pơjao ăn kơ rim ‘nu bơ̆n tơdrong jang kăl gĭt athei bơtho ră roi Tơdrong ‘Nao ‘Lơ̆ng, krao rim ‘nu bơngai athei tơbral dôm tơdrong yoch, păng lui sơng iŏk Kră Yang Yêsu. Kư̆m ưh kơ pha ra kiơ kơ lu bơngai mă khan lê̆ hơdrol sơ̆ noh mơ̆n, tơdrong mă bơ̆n bơtho noh phŏ kơnh đe kuă kơ mơ̆ng mơ̆n, phŏ kơnh lu bơngai kơtơ̆ng bơ̆n bơtho noh, lu sư tơwih kơ bơ̆n hăm jơhngơ̆m ayăt hơmăt plơ̆ bơ̆n, pơm kơnê̆ kơ bơ̆n dơ̆ng. Mă-lei ‘Bok Kei-Dei Tơ’ngla mă oei hơdai păng ăn kĕ pran, ăn kơ lu bơngai pơtruh nơ̆r Sư, jang tơdrong jang Sư sơ̆, Sư kư̆m tŏk-bŏk oei hơdai dŏng tơgŭm bơ̆n dang ei mơ̆n. Yua kơ thoi noh na bơ̆n athei rok kơmĭl lu bơngai pơtruh nơ̆r’Bok Kei-Dei sơ̆, kư̆ kơ đĭ jơhngơ̆m lui gơnang kơ Kră Yang,awih awăn kơ Sư mă tơnăp, hưch hanh bơtho ră roi Tơdrong ‘Nao Lơ̆ng ăn lu bơngai tăp dăr kơ bơ̆n mă năr anat anot dah năr tơproh ‘lơ̆ng. Tơdrong Kră Yang apah kơ lu bơngai pơtruh nơ̆r Sư sơ̆ păng apah bơ̆n dang ei ưh kơ pôm apah lăm teh đak âu đĕch ôh, Sư gô apah tih kăl lơ tơpă hơtăl hơtăl tơ Dêh Char Sư mă oei oei ‘lơ̆ng rŏ ling-lang khŏm khŏm ưh kơ layơ tôch hiong.
Kơkuh kơ Ih Kră Yang, inh bơnê kơ Ih yua kơ lu bơngai pơtruh nơ̆r Ih sơ̆ pơm kơmĭl gah tơdrong chơ̆n ĕnh, chu iŏk pơmat.Apĭnh Ih tơgŭm inh pơhrăm iŏk rok kiơ̆ kơmĭl lu sư. Lui tơpă kơ Ih Tơ’ngla pơm thoi Ih pơkă, Ih‘lơ̆ng tơpăt, păng tơnăp tơnen bơtho ră roi Tơdrong ‘Nao ‘Lơ̆ng Ih. Năr tơ’bơ̆p tơdrong gleh anat, tơplơ̆ hăm tơdrong inh wă, apinh Ih ăn kơ inh băt gơnang kơ nơ̆r Ih pơkă’lơ̆ng pơkă sĭt, Ih Tơ’ngla pơm thoi Ih pơkă wă kơ inh huay kơ bơ̆l hăl, huay kơ kơdŭn tơ rŏng, năm tơ anăp yua kơ băt sĭt jơ năr Ih jur dơ̆ng wă jê̆ ngei bơih. Inh krao khan yua anăn Kră Yang Yêsu Krist, Amen!
Bơ̆n hăm lăp đon rok kiơ̆ kơmĭl lu bơngai pơtruh nơ̆r ‘Bok Kei-Dei sơ̆,mă đe pơm kơnê̆ pơgăn,bơ̆n hăm oei tơnăp kơjăp păng đĭ jơhngơ̆m bơtho ră roi Tơdrong ‘Nao ‘Lơ̆ng Kră Yang ưh?
Kră Yang pơjao ăn kơ bơ̆n tơdrong tih kăl,
Adrin bơtho ră roi Tơdrong’Nao ‘Lơ̆ng ăn kơ rim bơngai,
Mă tơ’bơ̆p tơdrong pơmat tat lăm chăl arih,
Oei hơnơ̆ng kơ tơnăp kơjăp wei nơ̆r Kră Yang pơkă.
Đŏk Sơ̆p Hla bơar ‘Bok Kei-Dei lăm pêng sơnăm: Yakơ 3
Kênh Youtube BHKTHN:
