Klei Aê Diê Blŭ: Klei Mtô Mñă Klei Bhiăn 11:8-17
Êlan kliăng: “Ƀiădah čar diih srăng găn mă bha jing ala čar kngư leh anăn tlung, ala čar mnăm êa hjan mơ̆ng adiê, ala čar Yêhôwa Aê Diê ih răng kriê, ala čar ală Yêhôwa Aê Diê ih dlăng nanao mơ̆ng phŭn truh kơ tuč thŭn.” (Klei Mtô Mñă Klei Bhiăn 11:11-12).
Klei êmuh ksiêm mĭn: Ya klei Aê Diê ƀuăn leh hŏng phung ƀuôn sang Israel? Ya mta klei bi djŏ mtuôm ti krah klei gưt asăp kơ Aê Diê leh anăn klei hdĭp mdrŏng sah hlăm ala čar Aê Diê ƀuăn? Si klei gưt asăp kơ Aê Diê kruak čua kơ klei hdĭp diñu hlăm čar Kanaan? Si knhuah brei drei dôk hdĭp čiăng dưi dôk nanao hlăm klei răng kriê leh anăn klei jăk jĭn Aê Diê brei?
Trăn Klei Aê Diê Blŭ hruê anei čih mdah dua pŏk rup bi klăk, bi êdah klei hdĭp mă bruă dleh suăi phung ƀuôn sang Israel hlăk đưm ti čar Êjip leh anăn rup bi êdah klei hdĭp hlăm hruê ti anăp jăk mơak msĕ si klei êpei, mâo angĭn hjan djŏ yan, dôk guôn diñu ti ala čar Aê Diê ƀuăn. Klei bi klăk anei kñăm čiăng đru phung ƀuôn sang Aê Diê thâo kral si jing klei mdê ti krah klei hdĭp jing hlŭn suăi knap hlăm čar arăng, hŏng klei hdĭp mdrŏng sah hlăk dưi jing găp djuê pioh hjăn kơ Aê Diê. Ala čar Aê Diê ƀuăn hŏng phung ƀuôn sang Israel amâo djŏ ôh knŏng jing anôk lăn bŏ hŏng êa ksâo leh anăn êa hnue, ƀiădah anôk jing klei Aê Diê ƀuăn hŏng phung ƀuôn sang Ñu mơh. Ti anôk anăn, Aê Diê ƀuăn srăng brei kơ diñu mâo sa klei hdĭp mdrŏng sah hŏng yan puôt wiă mboh jing lu êbeh kyua “ala čar mnăm êa hjan mơ̆ng adiê” (êlan 11). Amâo djŏ knŏng mâo mdiê kuê hŏng boh kroh ôh, Ñu ăt ƀuăn brei rơ̆k hlăm hma pioh čiêm hlô mnơ̆ng rông mơh (êlan 15).
Ti djiêu klei ƀuăn brei kơ diñu mnơ̆ng dhơ̆ng mbĭt hŏng klei Aê Diê răng kriê pioh kơ phung ƀuôn sang Ñu, Aê Diê ăt brei mơh klei čoh čuăn kơ diñu čiăng dưi dưn mơ̆ng klei ƀuăn pioh kơ diñu. Anăn jing, brei diñu gưt djă pioh klei bhiăn, klei mtă Aê Diê brei kơ diñu, khăp kơ Yêhôwa Aê Diê, leh anăn mă bruă kơ Ñu hŏng jih ai tiê leh anăn hŏng jih mngăt. Drei ƀuh mâo klei bi mguôp sĭt suôr ti krah klei gưt asăp Aê Diê hŏng klei hdĭp mdrŏng sah hlăm ala čar Aê Diê ƀuăn. Lač msĕ snăn, amâo djŏ ôh Aê Diê “blei” klei gưt asăp phung ƀuôn sang Ñu, ƀiădah klei anăn jing sa kdrêč hlăm dŭm mta klei čuăn hlăm klei bi mguôp ti krah Aê Diê hŏng phung ƀuôn sang Israel brei diñu gưt ngă hluê. Mta klei yuôm hĭn jing phung ƀuôn sang Aê Diê brei thâo kral kơ diñu jing găp djuê Aê Diê pioh hjăn kơ Ñu, leh anăn Aê Diê čiăng yua klei hdĭp diñu brei lu găp djuê mkăn thâo kral Aê Diê.
Klei răng kriê, klei jăk jĭn ăt jing klei Aê Diê ƀuăn brei kơ phung anak ƀuôn sang Ñu hruê anei msĕ mơh. Ƀiădah klei răng kriê leh anăn klei jăk jĭn anăn knŏng mâo klei rơ̆ng tơdah drei êbat hlăm êlan Ñu leh anăn klei Ñu čiăng. Tơdah drei kmăng êran tui tiŏ mta klei hơăi mang ti lăn ala čiăng mâo klei mdrŏng sah mnơ̆ng nhuă êbeh dlai, drei srăng bi luč Khua Yang jing phŭn kơ klei jăk jĭn leh anăn hơ̆k mơak sĭt. Ăt kăn dưi rei čoh cuăn hŏng Aê Diê, tơdah drei gưt asăp ngă hlue si klei Khua Yang čiăng, snăn brei Aê Diê hơêč hmưi kơ drei klei jăk mơak tui si drei čiăng, ƀiădah brei đăo bĕ kơ Pô klei khăp brei nanao kơ drei klei jăk hĭn tui si klei thâo mĭn Ñu pô.
Si ngă drei dôk hdĭp hlăm klei Khua Yang kiă kriê leh anăn klei jăk jĭn Aê Diê brei mơ̆?
Wah lač: Ơ Khua Yang, bi mni lač jăk kơ Ih kyua klei Ih răng kriê leh anăn thiê brei djăp mta klei jăk jĭn kơ klei hdĭp kâo. Akâo Ih đru kâo dôk hdĭp huĭ mpŭ kơ Ih leh anăn êbat hlăm êlan Ih nanao čiăng kơ kâo amâo bi luč ôh klei jăk jĭn Ih brei.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Bruă Mtao 8:1-26
Kênh Youtube BHKTHN:
