Klei Aê Diê Blŭ: Klei Mtô Mñă Klei Bhiăn 32:26‑33
Êlan kliăng: “Si ngă sa čô dưi tiŏ sa êbâo čô, leh anăn dua čô dưi suôt mđuĕ pluh êbâo čô, knŏng tơdah Boh Tâo diñu čhĭ leh diñu, leh anăn tơdah Yêhôwa jao leh diñu?” (Klei Mtô Mñă Klei Bhiăn 32:30)
Klei êmuh ksiêm mĭn: Si bruă kkuh kơ rup yang ngă kơ phung ƀuôn sang Aê Diê luč hĕ jih klei mĭn djŏ? Ya klei bi mklă klei dưi hŏng amâo dưi hlăm grăp klei bi blah plah wah phung ƀuôn sang Israel leh anăn phung ƀuôn sang tue? Tơdah lui hĕ Aê Diê êngao klei hdĭp drei, si boh jhat drei srăng klam?
Hlue si klei hdĭp grăp hruê, arăng khăng mâo klei bi knăl lui hĕ sa mta klei amâo jăk čiăng mâo mă klei jăk hĭn. Ƀiădah phung ƀuôn sang Israel jing sa găp djuê amâo ngă snăn ôh, diñu amâo uêñ ôh kơ klei Yêhôwa hưn brei răng čiăng lui hĕ klei jăk hĭn leh anăn bi mlih hŏng klei jhat kjham hĭn. Lač klă jing phung ƀuôn sang Israel lui leh Aê Diê jing phŭn đru leh anăn khil răng mgang diñu hlăm dŭm thŭn mlan, knŏng čiăng tui tiŏ phung rup yang ti êngao amâo mâo sĭt, jing rup hơăi mang, amâo mâo klei dưi ôh kơ klei diñu kwưh akâo.
Klei kkuh kơ rup yang ti êngao amâo djŏ knŏng bi kruh klei êđăp ênang ala čar, klei trei mđao, mdrŏng sah hlăm klei hdĭp grăp hruê ôh, ƀiădah lŏ ngă kơ phung ƀuôn sang Israel kƀah klei thâo mĭn leh anăn luč jih klei thâo săng (êlan 28).
Klei kƀah klei thâo săng anăn prŏng tơl diñu amâo thâo ƀuh ôh, diñu amâo dưi ôh hŏng phung găp djuê tue amâo djŏ kyua bruă lĭng kahan awăt hĭn amâodah kyua klei thâo amâo ktang ôh, ƀiădah anăn jing kyua Aê Diê jao leh diñu hlăm kngan phung roh. Klei anei mblang kơ klei êpul kahan phung ƀuôn sang Israel êbâo čô ƀiădah êran đuĕ kơ sa čô roh tiŏ, amâodah čiăng tlao hĭn jing êpul kahan pluh êbâo čô êran đuĕ kơ dua čô roh tiŏ! Klei hơuh mđao leh anăn djăp ênŭm hlăm klei hdĭp mnơ̆ng dhơ̆ng ngă kơ phung ƀuôn sang Israel wơr jih klei bi blah tuh êrah phung aê diñu găn leh anăn thâo leh, Aê Diê jing Aê Diê kơ jih jang kdrăn mblah.
Klei lui hĕ Aê Diê hlăm klei bi mklă điêt prŏng hlăm klei hdĭp pô jing bruă ngă ba lu klei luč liê leh anăn ênguôt hnĭng snăk. Leh anăn amâo mâo pô mkăn ôh hĭn kơ drei jing phung srăng klam klei luč liê kjham anăn. Kyua tơdah drei ruah êlan amâo mâo Aê Diê nao mbĭt, drei srăng klam leh anăn tuôm hŏng djăp mta klei dleh dlan hlăm klei hdĭp amâo mâo ôh sa klei đru hriê mơ̆ng Aê Diê. Mâo lu blư̆ hlăm klei tui hlue Khua Yang, drei bi mĭn pô djăp klei thâo čiăng ngă bruă hlue si klei pô čiăng, lui hĕ klei Aê Diê mñă hlăm Klei Aê Diê Blŭ, leh anăn boh jhat kơ bruă ngă mluk anăn jing klei knap mñai kjham snăk. Brei drei thâo, dưi amâodah hơăi, tŭ jing amâo tlaih, jih jang dôk hlăm kngan myang Aê Diê sơăi, amâo mâo pô mkăn ôh, Aê Diê yơh jing Aê Diê kơ jih jang kdrăn mblah.
Drei tuôm găn leh ya klei ênguôt hnĭng tơdah lui hĕ Aê Diê mơ̆ng klei hdĭp pô?
Wah lač: Ơ Khua Yang, jing Aê Diê kơ jih jang kdrăn mblah. Akâo kơ Ih mtô kâo dưm pô hlăm kngan Ih, sĭt suôr êbat tui hlue knŏng hjăn Ih, leh anăn akâo nanao Ih jing Khua Yang, jing Khua kơ klei hdĭp kâo hlăm djăp mta bruă điêt prŏng. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Luk 22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
