II Kevcai 32:26-33
Nqe cim.
“Vim li cas luag ib leeg tua yeej nej ib txhiab leej, thiab vim li cas luag ob leeg tua yeej nej kaum txhiab leej? Twb yog tus Tswv uas yog lawv tus Vajtswv tso lawv tseg lawm; lawv tus Vajtswv uas muaj hwjchim loj muab lawv cob rau lawv cov yeebncuab.” (II Kevcai 32:30)
Lus nug rau sawvdaws xav.
– Qhov uas mus pemlom ua rau Vajtswv haivneeg tsis meej pem zoo li cas?
– Qhov tseemceeb ua rau muaj yeej swb ntawm cov Yixalayees thiab lwm haivneeg kev sib tua yog dabtsi?
– Yog muab tus Tswv tshem tawm ibcag hauv lubneej yuav raug teebmeem licas?
Raws li ibtxwm, tibneeg pheej muaj kev xav tso tej yam tsis zoo tseg kom tau txais yam zoo dua qub. Tiamsis cov Yixalayees yog ib haivneeg ua txawv qhov ntawd, lawv tsis quavntsej tus Tswv tej lus ceebtoom, muab qhov zoo tshajplaws tso tseg thiab mus pauv qhov phem tshajplaws. Hais mus tob dua, yog cov Yixalayees tau muab Vajtswv tus uas yog lawv lub hauvpaus cawmdim thiab yog daim thaiv hniav ntaj tiv thaiv lawv ntau xyoo tso tseg, mus caum lwm haivneeg tej mlom uas tsis muaj qabhau, tsis paub hais lus, tsis muaj hwjchim teb lawv tej lus thov.
Kev pe lwm haivneeg tej mlom tsis yog tsuas rhuav lub tebchaws txojkev thajyeeb, kev muaj noj muaj hnav, muaj txiag npluanuj hauv lubneej txhua hnub, tiamsis tseem ua rau cov Yixalayees dhau los ua ib haivneeg tsis muaj tswvyim thiab tsis txawj xav lawm lossis tsis meejpem lawm (nqe 28). Qhov tsis meejpem no loj txog qib uas lawv tsis zeem paub tau hais tias, qhov uas lawv kov tsis yeej yeebncuab tsis yog vim lawv cov tubrog tsis muaj zog lossis lawv muaj nyiaj siv tsis txaus, tiamsis ntawd yog vim Vajtswv twb muab lawv cob rau yeebncuab txhais tes lawm. Qhov no txhais tau lub ntsiab ntawm daim duab hais txog tsheej txhiab tus tubrog Yixalayees raug lwm haivneeg ob tug tubrog caum tua khiav ri sua! Kev noj qab hnav sov sab nqaij tawv ua rau cov Yixalayees hnov qab tej kob tsovrog uas lawv cov yawgkoob tau ntsib thiab kawm tau hais tias, Vajtswv yog tus Tswv ntawm tej kob rog.
Qhov uas muab tus Tswv tshem tawm ibcag yog ib qhov kev txiav txim siab hlob yau hauv lubneej, yog tes haujlwm yuav coj mus rau kev puastsuaj thiab txomnyem tshajplaws. Thiab tsis yog leejtwg, tiamsis yog peb ntag, yog cov uas yuav raug ris tej kev puastsuaj txaus ntshai ntawd. Vim thaum peb xaiv taug txojkev tsis muaj tus Tswv nrog nraim, ces peb yuav tsum siv tus kheej lub zog los ris thiab tawmtsam tej kev txomnyem hauv lubneej, yuav tsis muaj ib txojkev pab twg ntawm tus Tswv lawm. Muaj ntau zaug nyob hauv kev nrog tus Tswv mus, peb xav hais tias tus kheej muaj txaus peevxwm tswj txhua yam raws li siab xav, tsis yuav Vajtswv tej lus qhuab ntuas hauv Vajluskub, thiab thaum kawg teebmeem rau tej haujlwm ruam ntawd yog raug swb nyuaj siab ntsuav. Peb yuav tsum zeem paub hais tias, yeej thiab swb, ua tau thiab tsis tau puavleej nyob hauv Vajtswv txhais tes uas muaj hwjchim, tsis muaj leejtwg ntxiv, tsuas yog Vajtswv xwb thiaj yog tus Tswv ntawm tej kob rog.
Thov Vajtswv,
Tus Tswv, yog Vajtswv ntawm tej kob rog. Thov qhia nyuam yaus paub muab tus kheej tso hauv koj ob txhais tes, ncaj ncees nrog Koj mus, thiab caw Koj los ua tus Tswv tswj txhua tes haujlwm hlob yau ntawm nyuam yaus lubneej. Nyuam yaus tuav Yexus Khetos lub npe thov, Amees.
Peb twb ntsib txojkev nyuaj siab twg thaum muab Vajtswv tshem tawm hauv peb lub neej mus lawm?
Nyeem Vajluskub hauv peb lub xyoos: Lukas 22
Kênh Youtube BHKTHN:
