Klei Aê Diê Blŭ: Y‑Mathiơ 5:17-20
Êlan kliăng: “Snăn hlei pô gao sa mta điêt hĭn hlăm klei bhiăn anei, leh anăn mtô kơ arăng ngă msĕ, ñu srăng jing pô điêt hĭn hlăm ƀuôn ala mtao adiê. Ƀiădah hlei pô gưt leh anăn mtô klei bhiăn anăn, ñu srăng jing prŏng hlăm ƀuôn ala mtao adiê.” (Y‑Mathiơ 5:19)
Klei êmuh ksiêm mĭn: Ya ngă phung Pharisi kčŭt kơ Khua Yang bi rai klei bhiăn? Ya kdrêč Khua Yang Yêsu kñăm hlăm klei gưt leh anăn mtô klei bhiăn? Hruê anei si drei gưt ngă leh anăn mtô klei bhiăn Khua Yang kơ pô mkăn?
Klei bhiăn ênuk Klei Bi Mguôp Hđăp dưi bi mbha jing tlâo mta, klei bhiăn kơ phung ƀuôn sang, klei bhiăn kơ knăm bhiăn leh anăn klei bhiăn kơ klei kpă ênô. Tal sa, klei bhiăn kơ phung ƀuôn sang, êdah hĭn jing klei bhiăn hlăm klei brei čan ling (Klei Mtô Mñă Klei Bhiăn 24:10-13). Klei bhiăn anei jing yuôm čiăng bi kjăp lăn čar ƀiădah ăt mâo klei bi mlih bi găl guôp tui si ênuk hdĭp mơh. Tal dua, klei bhiăn kơ knăm bhiăn yua hlăm klei kkuh mpŭ, msĕ si klei myơr mnơ̆ng myơr čuh (Bruă Lêwi 1). Jih klei bhiăn kơ knăm bhiăn anei jing rup kơ Yang Mêsi jing Khua Yang Yêsu srăng hriê (Kôlôs 2:16-17). Klei bhiăn anei bi sĭt leh leh anăn ngă ênŭm leh hlăk Khua Yang Yêsu, Êđai Biăp Aê Diê tŭ klei djiê hrô brei kơ phung mnuih soh ti kyâo bi kal (Y‑Yôhan 19:30). Tal tlâo, klei bhiăn kơ klei kpă ênô, msĕ si Pluh Mta Klei Bhiăn (Klei Kbiă 20). Klei bhiăn anei hưn mdah kơ knuih leh anăn klei mtă mơ̆ng Aê Diê kyuanăn amâo dưi bi mlih ôh.
Phung Pharisi yua klei bhiăn kơ knăm bhiăn čiăng kčŭt kơ Khua Yang ngă soh hŏng klei bhiăn. Khua Yang kñăm snei Ñu hriê amâo djŏ ôh čiăng bi rai klei bhiăn ƀiădah bi sĭt klă kluôm klei bhiăn klei kpă ênô, leh anăn Ñu mtô kơ phung tui hlue Ñu brei gưt sĭt êmĭt klei bhiăn anăn. Hlăm Y‑Mathiơ 5:21-48, Khua Yang lač kơ năm mta klei bi hmô kơ klei bhiăn klei kpă ênô. Amâo djŏ ôh msĕ si phung Pharisi diñu gưt ngă hlue klei bhiăn kyua knŏng čiăng hưn mdah ti êngao, bi mbliư̆ hĕ klei bhiăn jing mta klei bhiăn mtŭk mtŭl tui si klei mĭn diñu pô leh anăn mtô klei anăn kơ phung ƀuôn sang, tinei Khua Yang Yêsu kñăm kơ boh êlam mta phŭn leh anăn bi êdah hdră êlan gưt ngă jăk klă sĭt.
Hruê anei mâo lu phung anak Aê Diê lač snei, diñu mâo klei bi mtlaih kyua klei pap Khua Yang leh anăn kyua klei đăo diñu, amâo djŏ kyua bruă ngă ôh (Rôm 3:28; Êphêsô 2:8-9), anăn diñu čih leh hlăm hdruôm hră klei hdĭp, kyuanăn diñu amâo gưt ngă hŏng jih ai tiê ôh jih jang klei bhiăn klei kpă ênô, boh nik đa mta klei bhiăn tui si diñu jing amâo đei yuôm ôh, msĕ si brei blŭ klei sĭt nik (Y‑Mathiơ 5:33-37). Ƀiădah Khua Yang Yêsu lač klă snei bruă drei gưt klei bhiăn klei kpă ênô leh anăn bruă drei mtô pô mkăn kơ jih klei bhiăn anei hŏng klei kpă sĭt srăng mâo klei yap leh anăn dăp pruê̆ prŏng amâodah điêt hlăm ƀuôn ala mtao adiê (êlan 19). Kyuanăn, mta klei êlâo hĭn leh anăn atur hlăm bruă bi hriăm mjuăt mnuih lŏ čuê kơ Phung Sang Aê Diê hruê anei, brei pô bi hriăm kơ arăng mâo klei hdĭp bi hmô hlăm bruă gưt klei bhiăn Khua Yang leh anăn mtô kơ pô mkăn thâo săng leh anăn gưt klei bhiăn Ñu.
Si ngă drei gưt ngă leh anăn mtô klei bhiăn Khua Yang mơ̆?
Wah lač: Ơ Aê Diê, bi mni kơ Khua Yang bi mtlaih leh kâo leh anăn brei kơ kâo klei bhiăn Ih. Akâo Yang Mngăt Jăk Aê Diê mtrang mngač leh anăn thiăm kơ kâo ai ktang čiăng dưi gưt klei bhiăn bi mơak kơ Khua Yang leh anăn bi mguôp kdrêč pô hlăm bruă mtô klei đăo djŏ tui si klei Ih čiăng. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y‑Pêtrôs 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
