II Xwmtxheej Vajntxwv 21:18-20
Nqe cim:
“Thaum Yehaulas ua vajntxwv nws hnubnyoog muaj peb caug ob xyoos, thiab nws nyob hauv lub nroog Yeluxalees kav tau yim xyoo. Thaum Yehaulas tuag tsis muaj leej twg quaj thiab hlub tshua li…” (II Xwmtxheej Vajntxwv 21:20a).
Lus nug rau sawvdaws xav:
– Vim li cas Vajntxwv Yehaulas raug mob thiab tuag?
– Vim li cas cov pejxeem tsis muaj leejtwg hwm thiab hlub tshua vajntxwv thaum tuag?
– Yog ib hnub koj mus nrog tus Tswv nyob, raws li koj, cov neeg nyob ibncig koj yuav xav li cas rau koj?
Tsis yog lub sijhawm twg mob ces yog tus Tswv rau txim, tiamsis yog hais txog Vajntxwv Yehaulas ces yeej yog li ntawd. Vim Vajtswv rau txim, Vajntxwv Yehaulas thiaj “tuag tu siab heev li”. Txojkev tuag no haum rau vajntxwv lub neej sab ntsujplig. Vajntxwv muaj lub siab phem heev, ua phem ua qias, thiab tej plab hnyuv kuj raug mob “puas tas”. Vajntxwv raug mob tau ob xyoos, mob heev tiamsis thaum kawg los vajntxwv kuj tsis kam lees txim li.
Vajntxwv Yehaulas tsuas kav tau yim xyoo nyob hauv lub nroog Yeluxalees, qhov no qhia paub Vajtswv tsis foom koob hmoov rau vajntxwv lub neej. Tsis yog li ntawd xwb, yam uas tu siab tshaj tsis tau muaj dua yog thaum vajntxwv tuag tsis muaj leej quaj thiab hlub tshua li (nqe 20). Ib tug vajntxwv thaum tseem ua neej nyob ua phem ua qias rau tsevneeg, tua cov kwvtij kom tau meejmom, yog li tej pejxeem thiaj ntxub thiab saib tsis taus. Raws li cov pejxeem ntsia, Yehaulas tsis tsimnyog ua lawv tus vajntxwv. Yog li ntawd, lawv tsis hlub tshua vajntxwv, thaum vajntxwv tuag “cov pejxeem tsis rauv taws ua kevcai hwm nws ib yam li luag ua rau nws cov yawgkoob lawm.” (nqe 19). Lawv yeej faus vajntxwv hauv Daviv lub nroog tiamsis lawv tsis coj mus faus hauv cov vajntxwv lub toj ntxas. Thaum tseem ua neej nyob vajntxwv tsuas xav txog nws tus kheej yog li thaum vajntxwv tuag tsis muaj leejtwg hlub tshua.
Ntu Vajluskub hnub no hais txog qhov xaus ntawm ib tug neeg ua neej tsis muaj nuj nqis thiab pab tsis tau leejtwg li. Nov yog qhov xaus ntawm tus neeg muaj lub siab phem ua tsis ncaj rau tsevneeg, tsis mloog tus Tswv tej lus samhwm mus yuav tej ntxhais pemlom, xaiv taug cov neeg phem txojkev thiab ua phem ua qias, coj tej pejxeem mus pemlom, tso tus Tswv uas yog cov yawgkoob tus Vajtswv tseg (II Xwmtxheej Vajntxwv 21:4, 6, 10). Tagnrho tej kev tu siab raug rau Vajntxwv Yehaulas tsis yog nyob nyob cia li raug tiamsis yog Vajtswv rau txim thaum uas nws twb ceebtoom ua ntej rau vajntxwv, vajntxwv txojkev tuag, kevcai faus thiab lub ntees tsis muaj ib tug pejxeem hlub tshua yog tus Tswv rau txim. Zaj kawm uas Vajtswv xav kom peb kawm ntawm Vajntxwv Yehaulas lub neej xaus yog tsis txhob ua lub neej zoo ib yam li ntawd kom tsis raug txim. “…yeej tsis muaj ib tug yuav dag tau Vajtswv, txhua tus nyias yuav tsum tau sau raws li tej uas nyias tseb. Tus uas tseb tej uas neeg lub siab nyiam, tus ntawd yeej yuav tau sau kev ploj kev taug raws li tej uas nws tseb...” (Kalatias 6:7-8a).
Thov Vajtswv,
Tus Tswv, thov Koj pab nyuam yaus nquag kawm Koj Txojlus kom paub thiab ua raws li Koj lub siab nyiam hauv kev ua neej, nyuam yaus thiaj tsis raug tej kev tu siab vim tej kev txhaum nyuam yaus ua. Amees.
Qhov xaus ntawm Vajntxwv Yehaulas ceebtoom peb yam dabtsi?
Nyeem Vajluskub hauv peb lub xyoo: Tes Haujlwm 25
Kênh Youtube BHKTHN:
