Klei Aê Diê Blŭ: Hêbrơ 9:1-14
Êlan kliăng: “…êrah Krist, Pô myơr Ñu pô hŏng Yang Mngăt Jăk hlŏng lar kơ Aê Diê amâo mâo klei čhŏ ôh, dưi bi doh ai tiê kpă diih mơ̆ng bruă atăt kơ klei djiê, čiăng mă bruă kơ Aê Diê hdĭp” (Hêbrơ 9:14)
Klei êmuh ksiêm mĭn: Ya jing klei amâo klă ênŭm hlăm klei bhiăn kkuh mpŭ hđăp? Si ngă klei mdê mâo tơdah Yang Krist hriê? Si drei ngă čiăng kơ ai tiê kpă drei dưi mâo klei bi doh?
Hŏng phung Yuđa, Sang čhiăm leh anăn klei bhiăn kkuh mpŭ pŏk êlan kơ diñu nao ti anăp Aê Diê găn hŏng pô bi ala jing phung khua ngă yang. Ƀiădah knŏng hjăn Khua ngă yang prŏng yơh dưi nao giăm Aê Diê hĭn sa thŭn sa blư̆ hlăm Knăm Bi Doh Klei Soh, tơdah ñu djă ba êrah mnơ̆ng ngă yang kơ Adŭ Doh Jăk Hĭn. Tui si klei bhiăn, êrah anăn dưi bi doh klei čhŏ ti êngao kđeh pô kkuh mpŭ čiăng nao ti anăp Aê Diê doh jăk ƀiădah amâo srăng djiê ôh. Ƀiădah ksiêm hlăm lam snăn ai tiê kpă pô kkuh mpŭ ăt kăn dưi jing klă ênŭm rei (êlan 9).
Klei mrâo mrang jăk truh leh, Aê Diê pô mjing sa klei ngă yang mrâo, anăn jing Yang Krist hriê leh čiăng bi leh bruă Ñu jing sa čô Khua Ngă Yang Prŏng (êlan 11). Čiăng bi tuôm hŏng Aê Diê, Ñu amâo guôn mŭt hlăm Adŭ Doh Jăk Hĭn hlăm Sang čhiăm ôh, ƀiădah Ñu mŭt bi tuôm Ñu pô tlă anăp hŏng Ama Ñu ti Ƀuôn Jăk. Ñu amâo yua êrah mnơ̆ng myơr ôh ƀiădah Ñu yua êrah doh jăk Ñu pô bi tui klei soh leh anăn bi doh ai tiê kpă jih jang mnuih kkuh mpŭ (êlan 11-14). Tơdah êrah mnơ̆ng myơr hdĭp mñă brei pô kkuh mpŭ săng kyua klei soh digơ̆ snăn mnơ̆ng myơr tŭ klei djiê hrô brei ƀiădah klei soh digơ̆ ăt dôk, bi êrah Yêsu amâo djŏ knŏng mă hĕ klei bi kmhal ôh ƀiădah mâo wăt klei myang dưi pap brei klei soh, bi doh ai tiê kpă, bi mlih klei hdĭp mơh.
Phung đăo phung Yuđa mrâo đăo kơ Aê Diê khăng yua klei bhiăn kkuh mpŭ čiăng kơ ai tiê kpă digơ̆ mâo klei hdjŭl hĭn ƀiădah amâo mâo klei hdjŭl ôh. Jih jang mnơ̆ng ngă yang hdĭp arăng bi mdjiê ngă kơ ai tiê kpă diñu ktrŏ hĭn êjai. Msĕ snăn mơh, hruê anei mâo lu mnuih gĭr ktưn ngă lu bruă jăk čiăng kơ ai tiê kpă diñu dưi mâo klei êđăp ênang, bi tui klei soh diñu ngă leh hlăm hruê leh êgao, tơl mâo đa đa mnuih gĭr ngă lu bruă hlăm Phung Sang Aê Diê, myơr bi lu čiăng mâo klei Aê Diê tŭ. Ƀiădah jih jang bruă ngă anăn amâo dưi msir mkra klei soh ôh. Knŏng êrah Êđai Biăp Pô amâo mâo klei soh ôh dưi “bi doh ai tiê”. Knŏng klei bi mguôp drei pô hŏng Khua Yang Yêsu yơh dưi bi doh ai tiê kpă drei. Kyuanăn yơh, hlei pô êmăn kyua klei gĭr tui duah klei Aê Diê tŭ, hdơr bĕ jih jang klei drei gĭr ktưn čiăng kơ ai tiê kpă drei mâo klei êđăp ênang jing hơăi mang sơăi, knŏng hriê kơ Khua Yang Yêsu leh anăn mdei hlăm klei khăp hlŏng lar Ñu, bi mguôp kjăp hŏng Ñu čiăng Ñu bi doh ai tiê kpă drei leh anăn năng mă bruă kơ Aê Diê Hdĭp.
Si ngă drei mâo klei bi knal kơ ai tiê kpă drei bi doh leh kyua klei pap yuôm bhăn Khua Yang Yêsu?
Wah lač: Ơ Aê Diê Pô Doh Jăk, kâo thâo kơ kâo jing mnuih awăt êdu, amâo mâo klă ênŭm ôh leh anăn bŏ hŏng klei soh jhat. Bi mni kơ Ih kyuadah êrah Khua Yang Yêsu rao jih klei soh kâo, leh anăn bi mrâo ai tiê kpă doh hlăm kâo. Đru kâo thâo hdơr knga bi mni kơ Ih nanao, jih ai tiê mă bruă kơ Ih hŏng klei năng.
Dlăng Klei Aê Diê Blŭ hlăm tlâo thŭn: Y‑Yôhan 21:15-25
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
