Henplais 9:1-14
Nqe cim:
“… Yexus Khetos cov ntshav hajyam muaj nqis heev dua tej ntawd thiab. Vajtswv tus uas muaj sia nyob mus ibtxhis, nws tus Ntsujplig kom Yexus muab Yexus lub cev uas zoo kawg nkaus pub rau Vajtswv theej neeg lub txhoj. Nws cov ntshav ntxuav peb lub siab kom peb dim tej kev txhaum uas peb tau ua los lawm, peb thiaj yuav ua tau Vajtswv tus uas muaj txojsia nyob tes haujlwm…!” (Henplais 9:14).
Lus nug rau sawvdaws xav:
– Dab tsi yog qhov teeb meem ntawm txoj kev pehawm tiam Vajluskub qub?
– Yexus Khetos tsim muaj dua kabke pehawm tshiab txawv li cas?
– Yuav ua cas ntxuav tau peb lub siab kom huv?
Haiv neeg Yixalayees lub Tsev Ntaub nrog rau tej kabke pehawm yog ncauj kev rau lawv mus ntsib Vajtswv dhau los ntawm cov Povthawj. Tiamsis tus uas yuav ua tej kabke hnub ua Kevcai Theej Txhoj hauv txhua lub xyoos thiab yuav mus rau hauv Chav Dawbhuv kawg nkaus, tsuas yog tus Povthawj Hlob tau mus xwb. Raws li kevcai, ntshav ntxuav tau tus uas mus pehawm Vajtswv tej yam uas qias sab nraud kom huv ua ntej nws mus ntsib Vajtswv tus uas Dawbhuv thiaj tsis raug tuag. Tiamsis cov uas mus pehawm Vajtswv hnub thaud, lawv lub siab sab hauv yeej zoo tsis tau txaus (nqe 9).
Tiamsis muaj kev zoo siab uas yog Tswv Yexus los rau hauv lub ntiajteb, Nws rhawv tsim dua tej kabke tshiab rau kev pehawm thiab ua tes haujlwm ntawm tus Povthawj Hlob (nqe 11). Yexus tsis tsum mus rau hauv Chav Dawbhuv ntsib Vajtswv, tiamsis Nws tim ntsej tim muag mus ntsib Leej Txiv saum Ntuj Ceebtsheej. Yexus tsis siv tej ntshav tsiaj ua khoom fij tiamsis siv Nws cov ntshav uas dawbhuv los theej txhua tus txhoj thiab ntxuav txhua tus uas mus pehawm Vajtswv lub siab kom dawbhuv (nqe 11-14). Tus tsiaj tua fij theej txhoj cov ntshav zam tsis tau peb lub txim. Tiamsis Tswv Yexus cov ntshav tsis yog tshem peb txoj kev raug txim xwb, tseem muaj hwjchim zam txim, ntxuav peb lub siab kom huv thiab hloov tau peb lub neej dua tshiab.
Vajtswv haiv neeg Yixalayees tiam Vajluskub qub lawv cia siab hais tias tej kabke hauv kevcai pehawm, tej ntshav tsiaj yuav pab tau lawv thiab ntxuav kom lawv lub siab huv, tiamsis tsis yog zoo li lawv xav. Txhua tus tsiaj uas raug tua fij tseem ua rau lawv lub siab tsaus ntuj heev ntxiv. Ib yam li ntawd, niaj hnub nimno muaj qee tus siv zog ua ntau tes haujlwm zoo kom lawv muaj kev kaj siab thiab xav hais tias yuav txhiv tau tej yam uas lawv tau ua yuam kev lawm. Tiamsis txhua yam ntawd puavleej pab tsis tau kom lawv muaj lub siab dawbhuv, tsuas yog tus Tswv Yexus cov ntshav uas dawbhuv xwb thiaj li ntxuav tau peb lub siab kom huv. Yog li ntawd, txhua tus uas sab sab vim yog pheej siv zog ua yam ub yam no kom tau Vajtswv txais yuav, lossis xav muaj kev kaj siab los yeej pab tsis tau li. Cia li los cuag Tswv Yexus thiab so hauv Nws txoj kev hlub, sib raug zoo nrog Yexus kom tau Tswv Yexus cov ntshav ntxuav peb lub siab huv thiaj yuav ua tau Vajtswv tus muaj sia nyob mus ibtxhis tes haujlwm.
Thov Vajtswv
Vajtswv tus uas dawbhuv, nyuam yaus paub hais tias nyuam yaus ua tsis tau zoo vim puv npo tej kev txhaum. Tiamsis nyuam yaus ua Koj tsaug, uas tus Tswv Yexus cov ntshav dawbhuv twb ntxuav nyuam yaus tej kev txhaum huv tibsi mus lawm thiab ua rau nyuam yaus muaj lub siab tshiab. Thov pab nyuam yaus paub ua Koj tsaug thiab tas siab ua Koj tes haujlwm kom tsimnyog. Amees!
Peb muaj kev zoo siab li cas thaum paub peb lub siab tau ntxuav huv los ntawm tus Tswv Yexus cov ntshav dawbhuv lawm?
Nyeem Vajluskub hauv peb lub xyoos: Yauhas 21:15-25
Kênh Youtube BHKTHN:
