Klei Aê Diê Blŭ: Klei Kbiă 38:21-31
Êlan kliăng:“Snăn grăp čô drei srăng hưn bruă ñu ngă ti anăp Aê Diê.” (Rôm 14:12)
Klei êmuh ksiêm mĭn: Hlei phung klam bruă hwiêt tĭng ênoh ngă sang čhiăm? Hră ênoh tĭng čêč kdrêč brei drei ƀuh si ngă knuih leh anăn ai tiê mă bruă êpul rŭ mdơ̆ng jing? Ya klei hriăm mñă brei ih ngă čiăng bi leh jih bruă Aê Diê jao kơ ih klam?
Y‑Môis mtă kơ phung Lêwi klam bruă hwiêt tĭng jih ênoh bi liê kơ bruă ngă Sang čhiăm tui si klei Y‑Ithamar, anak êkei Khua ngă yang Y‑Arôn gai leh anăn răng kriê. Digơ̆ jing phung kăp čih jih ênoh mă tŭ leh anăn bi liê kơ bruă ngă Sang čhiăm. Tơdah bruă rŭ mdơ̆ng ruĕ leh, snăn digơ̆ bi mklin ênoh bi liê leh anăn hưn mdah ti anăp phung ƀuôn sang. Dua čô mnuih klam bruă phŭn hlăm klei rŭ mdơ̆ng anei jing Y‑Ƀêsalel, leh anăn pô đru jing Y‑Ôhôliap, digơ̆ ngă leh jih jang bruă djŏ tui si klei Aê Diê mtă leh kơ Y‑Môis. Klei Aê Diê Blŭ čih yăl dliê ênŭm kơ klei digơ̆ jing leh anăn kơ bruă digơ̆ ngă.
Mơ̆ng hră tĭng ênoh anăn, drei thâo hlăm ênoh hrui mă leh mâo kdrêč prăk rĭng hŏng klei mgô̆ leh anăn kdrêč prăk myơr hŏng klei čŏng čiăng; leh anăn hlăm ênoh bi liê mâo ênoh yua leh kơ grăp kdrêč bruă. Hră hwiêt tĭng ênoh hrui mă leh anăn bi liê kơ bruă ngă Sang čhiăm čih klă mngač snăk. Ênŭm ênap kơ grăp bruă bi liê; ênoh hrui mă, ênoh bi liê bi djŏ trĭp, amâo êbeh, kăn kƀah rei brei ƀuh Aê Diê brei djăp kơ mnơ̆ng digơ̆ čiăng. Boh nik nak hlăm hră hwiêt tĭng anei ênoh mnơ̆ng yuôm yua kơ bruă ngă Sang čhiăm lu snăk, mâo sa ton mah, êbeh tlâo ton prăk leh anăn êbeh dua ton kông. Jih jang jing dŏ phung ƀuôn sang Aê Diê, mơ̆ng khua gĭt gai hlŏng kơ mnuih ƀuôn sang myơr hŏng klei kmah sơăi.
Mơ̆ng klei hwiêt tĭng kơ bruă mdơ̆ng Sang čhiăm, drei ƀuh mơ̆ng khua gĭt gai jing Y‑Môis hlŏng kơ grăp čô mnuih hlăm êpul rŭ mdơ̆ng thâo săng sơăi anei jing bruă Aê Diê kyuanăn digơ̆ amâo ngă tui si klei mĭn digơ̆ pô ôh, ƀiădah digơ̆ ngă djŏ nanao tui si “jih mnơ̆ng Aê Diê mtă leh”. Kyuanăn mơ̆ng phŭn čưm hlŏng kơ ruĕ bruă rŭ mdơ̆ng amâo tuôm mâo klei bi mneh msao ôh. Klei čih hră mơar êghah leh anăn ênŭm mơ̆ng klei hrui mă leh anăn bi liê brei ƀuh grăp čô mnuih mâo klei thâo săng kơ klei diñu srăng hưn mdah bruă diñu ngă leh hŏng Aê Diê leh anăn ti anăp phung ƀuôn sang. Anei jing êlan hdră atur brei jih jang phung anak Aê Diê hriăm tơdah mdơ̆ng sang Aê Diê čiăng đăm amâo klei jhat truh ôh.
Khua ƀĭng kna Y‑Pôl mñă kơ jih jang phung đăo, “grăp čô drei srăng hưn bruă ñu ngă ti anăp Aê Diê” (Rôm 14:12). Brei phung đăo hdơr nanao mâo sa hruê drei srăng bi êdah jih jang bruă drei ngă leh ti anăp Aê Diê kyuadah drei knŏng jing dĭng buăl kiă kơ Ñu đuč. Čiăng ngă bi jăk bruă Aê Diê jao, brei drei ksiêm dlăng kơ bruă drei ngă grăp hruê, drei “hrui mă leh anăn bi liê” prăk kăk, mông, mông myun leh anăn talăng Aê Diê jao djŏ leh hĕ amâodah ka ôh.
Akâo Khua Yang đru drei prăp êmiêt leh anăn kăp răng nanao kơ hră drei srăng hưn mdah kơ klei hdĭp drei ti anăp Khua Yang.
Si ngă drei hdơr mơ̆ kơ drei knŏng jing pô kiă kơ Aê Diê tơdah drei yua prăk mah, mông…Aê Diê brei?
Wah lač: Ơ Aê Diê! Jih jang klei jăk jĭn leh anăn mnơ̆ng yuôm kâo mâo jing dŏ Ih brei sơăi. Đru kâo thâo knang kơ Ih grăp hruê čiăng dưi jing sa čô pô kiă thâo mĭn, êbat hlăm klei kpă ênô leh anăn dôk sĭt suôr hŏng Ih tuč klei hdĭp.
Dlăng Klei Aê Diê Blŭ hlăm tlâo thŭn: Y‑Yôhan 1:1-34
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
