Klei Aê Diê Blŭ: Klei Mtô Mñă Klei Bhiăn 22:13-21
Êlan kliăng:“Brei jih jang mnuih mpŭ kơ klei bi dôk ung mô̆, đăm bi čhŏ jhưng pĭt diih ôh, kyuadah Aê Diê srăng phat kđi phung knhông leh anăn phung tlĕ piu.” (Hêbrơ 13:4)
Klei êmuh ksiêm mĭn: Si ngă arăng srăng mkra pô jing ung tơdah ñu bi hing klei amâo sĭt ôh kơ mô̆ ñu amâo mâo dôk hrông? Si klei bi kmhal pô jing mô̆ srăng tŭ tơdah klei ung ñu kčŭt jing sĭt? Ya klei Aê Diê čiăng bi hriăm drei mơ̆ng trăn Klei Aê Diê Blŭ anei?
Trăn Klei Aê Diê Blŭ hruê anei bi êdah kơ klei sa čô êkei leh sui thŭn ñu hdĭp hŏng mô̆ ñu, ñu bi êmut kơ gơ̆, leh anăn bi hing gơ̆ amâo dôk hrông ôh tơdah hriê dôk ñu. Klei kčŭt kơ klei mô̆ amâo dôk hrông jing sa klei yuôm bhăn snăk kyuadah klei anăn djŏ kơ knuih knhiêng sa čô mniê, leh anăn yuôm hĭn mơh kyuadah klei anăn srăng bi hmăi kơ klei hdĭp gơ̆. Kyuanăn, hlăm mta klei msĕ snăn, amĭ ama mniê anăn srăng bi êdah mnơ̆ng bi knăl kơ klei anak mniê digơ̆ ăt dôk hrông ti anăp phung khua mduôn hlăm ƀuôn. Phung khua mduôn srăng yua mnơ̆ng bi knăl anăn ngă klei phat kđi. Tơdah djŏ sĭt msĕ si klei ung ñu lač leh, arăng srăng bhĭr bi mdjiê mniê anăn hŏng boh tâo kyuadah ñu dôk leh hŏng êkei êlâo kơ klei bi dôk ung mô̆. Tơdah klei ung ñu kčŭt amâo sĭt ôh, arăng srăng čăm êkei anăn hŏng giê, leh anăn ama mô̆ ñu srăng đŭ ñu sa êtuh sêkel prăk, leh anăn mniê anăn ăt srăng jing mô̆ ñu hlŏng kơ tuč klei hdĭp, ñu amâo dưi lui gơ̆ ôh.
Klei bhiăn anei pioh răng mgang klei tŭ dưn kơ êkei leh anăn kơ mniê hlăm klei bi dôk ung mô̆, mbĭt hŏng klei anăn đru djă pioh klei doh jăk hlăm klei bi dôk ung mô̆. Tơdah bi dôk ung mô̆, êkei leh anăn mniê srăng ngă sơăi bruă klam anei čiăng đăm mâo klei bi lui ôh tơdah bi dôk leh mbĭt. Ung srăng khăp kơ mô̆, amâo djŏ ôh kyua bi dôk sui thŭn leh snăn ngă klei bi êmut kơ mô̆ kyua “mâo êlan mnuih yap msĕ si kpă” (Klei Bi Hriêng 14:12). Bi mô̆, msĕ mơh djă pioh klei doh jăk truh ti hruê bi kuôl čiăng kơ klei hdĭp hdơ̆ng ung mô̆ mâo klei jăk jĭn.
Hruê anei, mâo lu mnuih kyua amâo thâo săng ôh kơ boh yuôm kơ klei bi dôk ung mô̆ ti anăp Aê Diê kyuanăn atăt truh kơ klei bi lui ung mô̆ (Hêbrơ 13:4). Drei ƀuh hlăm lăn ala anei mâo lu mnuih čuăn klei bi lui ung mô̆ kyuadah amâo dưi tŭ ôh klei jhat ung amâodah mô̆ ngă; amâodah ung hŏng mô̆ bi kčŭt truh kơ sang phat kđi mơh kyuadah diñu lač diñu amâo lŏ mâo klei bi khăp čiăng ôh…
Msĕ mơh, mâo lu phung mniê tŭ klei bi hmăi mơ̆ng phung mnuih ƀuôn sang luč klei kpă ênô, dlăng yuôm kơ klei dôk rông, tŭ kơ klei lông bi dôk, amâo mâo djă pioh ôh klei doh jăk kơ asei mlei pô, boh jhat mơ̆ng klei anăn bi êka kơ asei mlei wăt kơ ai tiê hlăm klei bi dôk ung mô̆. Brei phung đăo bi hriăm anak čô pô boh yuôm kơ klei phung đăo bi dôk ung mô̆ čiăng kơ digơ̆ thâo si ngă hnơ̆ng čuăn kơ klei bi dôk ung mô̆ hlăm Khua Yang čiăng kơ klei hdĭp hdơ̆ng ung mô̆ dôk kjăp, mơak mñai leh anăn bi guh kơang kơ Anăn Khua Yang.
Si ngă drei mpŭ mơ̆ kơ klei doh jăk êlâo kơ bi dôk ung mô̆ leh anăn hlăm klei bi dôk ung mô̆?
Wah lač: Ơ Aê Diê, Pô mjing leh klei bi dôk ung mô̆ kơ anak mnuih. Đru kâo thâo hdĭp tui si klei bhiăn hlăm klei bi dôk ung mô̆ čiăng mâo klei mơak mñai hlăm klei hdĭp ung mô̆ leh anăn bi mơak kơ Ih.
Dlăng Klei Aê Diê Blŭ hlăm tlâo thŭn: Y‑Luk 24:13-53
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
