Malakaus 15:15-20
Nqe cim:
“Vajtswv txoj kevcai twb ua rau peb raug foom tsis zoo lawm, tiamsis Yexus Khetos los hloov peb chaw, nws thiaj raug foom tsis zoo” (Kalatias 3:13a).
Phau HMOWSV txhais hais tias:
“Khetos raug tsawm foom this peb, thiaj txhiv peb dim qhov uas raug foom raws li txoj kevcai”
Lus nug rau sawvdaws xav:
– Tswv Yexus raug cov tubrog Loos ua saib tsis taus licas?
– Raws li nej xav, yog tim dabtsi Tswv Yexus, uas yog Vajntxwv ntawm tej vajntxwv, thiaj raug txomnyem thiab raug ua saib tsis taus li ntawd?
Txawm yog paub tseeb hais tias Tswv Yexus tsis muaj txim los yog vim ntshaw meejmom ua nom ua tswv thiab xav ua kom haum cov pejxeem siab, tswvxeev Philaj tau teem txim rau Tswv Yexus, hais kom cov tubrog coj Nws mus ntsia rau saum tus ntoo khaublig. Raug ntsia saum ntoo khaublig yog kev rau txim txaus ntshai kawg li, tiamsis tej uas Tswv Yexus raug tsis yog tsuas muaj npaum ntawd xwb. Raug ntsia saum ntoo khaublig tsuas yog qhov siab tshaj ntawm tej kev txomnyem uas Tswv Yexus yuav tsum raug.
Malakaus qhia paub hais tias muaj ib pab tubrog tau txib tuaj hauv Philaj lub loog coj Tswv Yexus mus. Cov tub soj ntsuam Vajluskub qhia paub hais tias ib pab tubrog zoo li ntawd muaj kwvlam 600 leej. Lawv tuaj ua ke ua ib teg haujlwm ntawd yog tsimtxom Tswv Yexus. Xubthawj, lawv muab ib lub tsho ntev tsamxem rau Tswv Yexus hnav thiab muab hmab pos ua kauj looj Tswv Yexus taubhau (nqe 17). Xim tsamxem yog piv rau vajntxwv, kaus mom piv rau meejmom, tiamsis cov tubrog Loos ua txhua yam no tsuas yog ua los saib tsis taus Tswv Yexus xwb. Lawv ua txuj hawm Tswv Yexus dog dig thiab hu Nws hais tias, “cov Yudais tus Vajntxwv” (nqe 18). Lawv txhos caug tsis yog pehawm, tsis yog txhawb nqa tiamsis yog ua saib tsis taus Tswv Yexus, tomqab ntawd lawv ntaus, nto qaubncaug rau Nws (nqe 19). Tus Vajntxwv uas kav Ntuj Ceebtsheej ci ntsa iab nimno raug luag ua saib tsis taus thiab tsimtxom hnyav kawg li.
Txawm raug luag tsimtxom mob thiab ua saib tsis taus, los Tswv Yexus yeej tsis hais tsis nti. Nws ua siab ntev tiv vim Nws paub hais tias txhua yam ntawd yog kev rau txim rau noobneej tej kev txhaum. Kev txhaum tsis yog tsuas ua rau lub cev raug mob xwb, tseem yog ib txojkev poob ntsejmuag thiab. “Vim li no Yexus yuav tsum ua zoo li nws cov kwvtij txhua yam huvsi, kom nws thiaj ua tau tus tuam pov thawj hlob uas muaj kev khuvleej thiab kev ncaj ncees ua koom tu Vajtswv thiaj ntxuav tau neeg lub txim” (Henplais 2:17). “Khetos raug tsawm foom this peb, thiaj txhiv peb dim qhov uas raug foom raws li txoj kevcai” (Kalatias 3:13a – HMOWSV).
Tswv Yexus ua siab ntev nyiaj qhov uas raug luag ua saib tsis taus yog Nws tiv hloov tibneeg qhov chaw, tiamsis tseem tshuav ib qhov vimchij ntxiv thiab, ntawd yog “Yexus raug kev txom nyem thiab raug kev sim siab, nws thiaj pab tau cov uas raug kev sim siab thiab” (Henplais 2:18). Tibneeg tabtom ua neej nyob hauv lub ntiajteb uas muaj kev txomnyem quaj ntsuag, raug poob ntsejmuag nyob hauv ntau sab thiab loj me sib txawv. Tswv Yexus twb tiv dhau tej ntawd lawm, Nws thiaj yog tus totaub, ua siab ntev thiab pab peb.
Thov Vajtswv,
Tswv Yexus, vim hlub nyuam yaus Koj thiaj tiv kev txomnyem, raug ua saib tsis taus, raug ris tibneeg tej kev txhaum. Nyob hauv lubneej no nyuam yaus yuav siv dabtsi los pauj tau txojkev hlub loj npaum ntawd! Thov kom nyuam yaus lubneej ua timkhawv tau rau lwm tus hais tias Koj yog Tus zoo kawg nkaus! Amees.
Txawm tias tibneeg ua saib tsis taus tus Vajntxwv Ceebtsheej, los Nws tseem hlub tibneeg. Yog li ntawd puas muaj yam dabtsi tabtom tav peb txoj haukev los cuag Tswv Yexus los ntawm nplooj siab lees txim thiab txojkev ntseeg tseeb?
Nyeem Vajluskub hauv peb lub xyoo: Mikhas 7
Kênh Youtube BHKTHN:
