Klei Aê Diê Blŭ: Y‑Markôs 15:15-20
Êlan kliăng: “Krist bi tui leh drei mơ̆ng klei tăm pah kbiă hriê mơ̆ng klei bhiăn, kyuadah Ñu jing leh pô arăng tăm pah kyua drei,” (Galati 3:13a)
Klei êmuh ksiêm mĭn: Si Khua Yang Yêsu tŭ leh klei phung kahan Rôm mưč? Tui si diih, ti phŭn knhal klei Khua Yang Yêsu, Mtao kơ jih jang mtao, tŭ găn klei ruă knap leh anăn arăng mưč msĕ snăn?
Wăt tơdah thâo klă kơ Khua Yang Yêsu amâo mâo klei soh ôh, ƀiădah kyua čiăng krơ̆ng bruă knuă kđi čar ñu pô leh anăn čiăng bi mơak kơ phung lu, Aê Pilat phat kđi leh Khua Yang Yêsu, jao Gơ̆ kơ phung kahan ba pơ̆ng msei kđĭn ti kyâo bi kal. Tŭ klei pơ̆ng msei kđĭn jing sa mta klei bi kmhal huĭ mduĭ êdimima, ƀiădah klei Khua Yang Yêsu găn amâo djŏ knŏng dŭm anăn ôh. Tŭ klei pơ̆ng msei kđĭn jing klei tŭ kdlưn hĭn hlăm jih knhuang tŭ klei ruă knap Khua Yang găn.
Y‑Markôs brei thâo mâo sa êpul phung kahan mŭt hlăm sang phat kđi mă ba bi mdjiê Khua Yang Yêsu. Phung ksiêm hriăm lu brei thâo sa êpul kahan mâo hlăm brô 600 čô kahan. Phung lu anei bi kƀĭn knŏng pioh ngă sa mta bruă jing bi knap Khua Yang Yêsu. Tal êlâo, diñu bi hơô kơ Khua Yang hŏng ao jhung hrah jŭ leh anăn bi mđua Gơ̆ hŏng đuôn mtao mñam hŏng êruê (êlan 17). Êa hrah jŭ jing êa pioh kơ găp djuê phung mtao, đuôn mtao bi hmô kơ anôk bruă, ƀiădah jih mta klei anăn ară anei knŏng jing hĕ klei bi hlăp lêñ kơ phung kahan Rôm. Diñu iêu mưč kơ Gơ̆ jing “kkuh kơ Ih, Ơ mtao phung Yuđa ah” (êlan 18). Diñu ngă čuôn kơŭt kkuh kơ Gơ̆ ƀiădah amâo djŏ kkuh mpŭ ôh ƀiădah čiăng mưč mač bi hêñ, leh anăn čăm Gơ̆, kčuh êa bah ti Gơ̆ (êlan 19). Mtao kơ Ƀuôn Jăk guh kơang ară anei hin dôk tŭ klei arăng mưč bi hêñ leh anăn ngă jhat kjham kjhuê̆.
Dôk ti anăp klei ruă knap, arăng mưč mač, Khua Yang Yêsu amâo mâo điêt đuôt klei lŏ bi kdơ̆ng ôh. Ñu gĭr tŭ kyuadah ñu thâo jih jang mta klei anăn jing klei bi kmhal pioh kơ klei soh jih jang mnuih. Klei soh amâo djŏ knŏng ba klei ruă knap hlăm asei mlei kđeh, ƀiădah wăt klei hêñ mưč prŏng prĭn. “Kyuanăn, yuôm ñu mâo klei jing msĕ si phung ayŏng adei ñu hlăm jih jang klei, ….čiăng ngă klei bi doh klei soh phung ƀuôn sang” (Hêbrơ 2:17). “Krist bi tui leh drei mơ̆ng klei tăm pah kbiă hriê mơ̆ng klei bhiăn, kyuadah ñu jing leh Pô arăng tăm pah kyua drei” (Galati 3:13a).
Khua Yang Yêsu tŭ klei arăng mưč mač tăm pah jing klei tŭ hrô brei kơ phung mnuih, ƀiădah ăt lŏ adôk sa mta phŭn knhal mơh, anăn jing “Kyuadah Ñu pô tŭ leh klei knap mñai êjai tuôm hŏng klei mplư, snăn Ñu đru phung tuôm hŏng klei mplư ” (Hêbrơ 2:18). Anak mnuih dôk hdĭp hlăm lăn ala bŏ hŏng klei êka ruă knap mñai, hêñ mưč tăm pah hlăm lu êlan leh anăn hnơ̆ng mdê mdê. Khua Yang Yêsu găn leh jih jang klei anăn snăn ñu thâo săng kluôm dhuôm leh anăn kăp đru krŭ drei.
Wăt tơdah anak mnuih lŏ ngă wĭt kơ Mtao Adiê hŏng klei hêñ mưč, klei tăm pah, ƀiădah Ñu ăt kăn mdei mơh khăp kơ anak mnuih. Kyuanăn mâo mơ̆ ya mta klei bi kgăn hĕ drei êran nao kơ Khua Yang Yêsu hŏng ai tiê thâo kmhal leh anăn đăo sĭt?
Wah lač: Ơ Khua Yang Yêsu, kyua khăp kơ kâo Ih tŭ klei ruă knap, klei hêñ mưč djă ba jih djăp mta klei soh jhat năng mưč mơ̆ng anak mnuih. Hlăm lăn ala anei hŏng ya mta klei kâo dưi lŏ bi wĭt klei khăp prŏng prĭn msĕ snăn! Brei klei hdĭp kâo jing klei hưn bi sĭt kơ jih jang mnuih Khua Yang yơh jing pô tloh ênoh êdimima !
Dlăng Klei Aê Diê Blŭ hlăm tlâo thŭn: Y‑Mika 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
