Klei Aê Diê Blŭ: Klei Mtô Mñă Klei Bhiăn 18:15-22
Êlan kliăng: “Kâo srăng mđĭ kơ diñu sa čô khua pô hưn êlâo msĕ si ih mơ̆ng krah phung ayŏng adei diñu; Kâo srăng dưm klei Kâo blŭ hlăm ƀăng êgei ñu, leh anăn ñu srăng blŭ kơ diñu jih klei Kâo mtă kơ ñu” (Klei Mtô Mñă Klei Bhiăn 18:18)
Klei êmuh ksiêm mĭn: Ya bruă klam phung khua pô hưn êlâo? Ya bruă brei phung ƀuôn sang Aê Diê ngă êlâo kơ klei phung khua pô hưn êlâo hiu hưn? Ya boh jhat kơ sa čô khua pô hưn êlâo hưn kơ klei amâo hriê mơ̆ng Klei Aê Diê Blŭ? Si drei hlue ngă klei hriăm anei?
Phung djuê ana čar tač êngao knŏng tui duah phung mjâo, phung blŭ hŏng klang mnuih djiê čiăng thâo klei yang diñu čiăng, bi phung Israel, diñu nao kơ phung khua pô hưn êlâo Aê Diê mdưm leh čiăng thâo si klei Aê Diê čiăng. Hlăm ênuk Bi Mguôp Hđăp, Aê Diê yua phung khua pô hưn êlâo jing pô bi ala nao hưn klei Ñu blŭ leh anăn klei Ñu čiăng kơ phung ƀuôn sang Ñu, hŏng klei anăn phung ƀuôn sang thâo klei Aê Diê čiăng. Bi bruă phung ƀuôn sang lĕ, diñu srăng gưt kơ klei phung khua pô hưn êlâo mă tŭ leh mơ̆ng Aê Diê lŏ hưn kơ diñu. Hlei pô bi kdơ̆ng hŏng klei phung khua pô hưn êlâo hưn srăng tŭ klei bi kmhal.
Wăt snăn dưn, hlăm hƀuê ênuk phung Israel mâo lu phung khua pô hưn êlâo mgưt jhŏng yua anăn Aê Diê blŭ klei Aê Diê amâo tuôm mtă kơ diñu blŭ ôh. Boh klă klei ngă anei brei drei ƀuh amâo djŏ jih jang phung khua pô hưn êlâo hưn djŏ tui si klei Aê Diê mtă leh brei diñu blŭ ôh. Kyuanăn Y‑Môis mtô phung ƀuôn sang êlan dưi thâo kral khua pô êlao sĭt leh anăn khua pô hưn êlâo mgưt. Anăn jing ksiêm bi nik kơ klei hưn êlâo wăt tơdah klei hưn êlâo anăn blŭ hŏng anăn Khua Yang dưn mơh, tơdah klei hưn êlâo anăn amâo mâo bi sĭt ôh, pô anăn jing khua pô hưn êlâo mgưt. Leh anăn “pô hưn êlâo anăn srăng djiê” (êlan 20).
Hruê anei, Aê Diê iêô phung khua pô mtô, pô mtô, phung hiu hưn Klei Mrâo Mrang Jăk pioh mtô Klei Ñu Blŭ. Hŏng klei anăn, phung đăo kơ Krist dưi thâo kral klei Aê Diê čiăng hlăm klei hdĭp digơ̆ leh anăn gưt kơ klei Aê Diê mtă. Ƀiădah, Yang Yêsu pô mtă leh brei răng kyuadah grăp gưl ênuk mâo nanao pô hưn êlâo mgưt, pô mtô mgưt. Sa čô pô mtô kơ Aê Diê sĭt srăng mtô djŏ tui si klei Aê Diê blŭ leh hlăm hdruôm hră Klei Aê Diê Blŭ amâo djŏ mtô tui si klei ñu pô čiăng ôh. Aê Diê brei klei Ñu blŭ kơ phung ƀuôn sang Ñu, kyuanăn brei grăp čô pô đăo hur har hriăm Klei Aê Diê Blŭ hjăn kơ ñu pô čiăng hŏng klei anăn dưi bi msĕ hŏng ya klei ñu hmư̆ leh. Phung đăo ti ƀuôn Ƀêrê mâo klei bi mni “kyuadah digơ̆ tŭ klei Aê Diê blŭ hŏng klei čiăng snăk, ksiêm dlăng grăp hruê Klei Aê Diê Blŭ čiăng thâo tơdah klei mtô anăn jing sĭt” (Bruă Phung Khua Ƀĭng Kna 17:11). Amâo djŏ drei đing kơ klei phung dĭng buăl Aê Diê hưn ôh, ƀiădah mphŭn dô Aê Diê mtô leh kơ phung ƀuôn sang Ñu êlan thâo bi kah pô hưn êlâo sĭt, pô hưn êlâo mgưt. Msĕ mơh, hruê anei Khua Yang čiăng drei mprăp kơ drei pô klei thâo săng kơ klei Ñu blŭ čiăng đăm drei gưt kơ klei mtô soh hŏng Klei Aê Diê Blŭ.
Drei pioh mông ksiêm hriăm Klei Aê Diê Blŭ hjăn drei pô leh mơ̆? Ya hdră êlan diih yua tơdah hriăm Klei Aê Diê Blŭ?
Wal lač: Ơ Khua Yang, kâo bi mni kơ Ih kyua klei mtô mơ̆ng phung dĭng buăl sĭt suôr leh anăn klei kpă Ih. Hŏng klei anăn kâo thâo kral klei Ih čiăng leh anăn atăt gai hlăm klei hdĭp kâo.
Dlăng Klei Aê Diê Blŭ hlăm tlâo thŭn: Y‑Êskiêl 7:10-27.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
