II Kevcai 18:15-22
Nqe cim.
“Kuv yuav xaiv lawv haivneeg ib tug los ua tus cevlus ib yam li koj; Kuv yuav qhia kom tus cevlus ntawd piav Kuv tej lus txhua lo rau sawvdaws” (II Kevcai 18:18).
Lus nug rau sawvdaws xav:
- Tus cevlus li feemxyuam yog dabtsi?
- Tus Tswv haivneeg yuav tsum ua licas rau tus cevlus tej lus?
- Tus cevlus hais tej uas tus Tswv tsis qhia yuav raug dabtsi?
- Peb kawm tau dabtsi hauv zaj no?
Lwm haivneeg tsuas paub mus cuag cov neeg txawj saib hmoov, saib yaig kom paub lawv tej vajtswv lub siab nyiam, tiamsis haivneeg Yixalayees tuaj cuag cov cevlus uas tus Tswv xaiv raws li Nws lub siab nyiam. Nyob tiam Phau Vajluskub Qub, tus Tswv siv cov cevlus ua cov nyob nruab nrab cev Vajtswv tej lus rau Nws haivneeg. Tus cevlus li feemxyuam yog ncajncees qhia tej lus tus Tswv hais rau cov pejxeem, lawv thiaj paub tus Tswv lub siab nyiam. Dua li cov pejxeem li feemxyuam yog ua raws li tej lus tus Tswv tus cevlus taw qhia. Leejtwg tawmtsam tus cevlus yuav raug rau txim.
Txawm li ntawd, los nyob hauv keebkwm cov Yixalayees kuj muaj cov cevlus cuav tshwmsim, lawv lam tuav tus Tswv lub npe qhia tej uas tus Tswv tsis tau hais rau lawv. Lossis muaj tej tug cevlus tuav lwm tus vajtswv lub npe los cevlus. Qhov tseeb no qhia paub hais tias tsis yog txhua tus cevlus puavleej qhia tawm tej lus uas tus Tswv kom lawv qhia. Yog li ntawd Mauxes thiaj qhia rau tus Tswv haivneeg lub tswvyim zeem paub cov cevlus tseeb thiab cov cevlus cuav. Ntawd yog yuav tsum tshuaj xyuas tej lus uas tus cevlus hais tawm txawm yog nws tuav tus Tswv lub npe los hais, yog hais tias tsis muaj tshwmsim raws li tus ntawd hais, ces tus ntawd yog cevlus cuav. Thiab nws “yuav tuag” (nqe 20).
Niaj hnub nimno, tus Tswv nqua hu tej kws xibhwb, xibhwb, tej tub xa Txojmoo Zoo los qhia Vajtswv Txojlus. Dhau qhov ntawd, cov ntseeg paub txog tus Tswv lub siab nyiam thiab ua tau lub neej raws li Vajtswv Txojlus qhia. Tiamsis, Tswv Yexus ceebtoom hais tias nyob rau tiam twg kuj yuav muaj cov cevlus cuav, xibhwb cuav. Ib tug xibhwb tseeb tsuas qhia tej uas Vajtswv hais hauv Vajluskub xwb tsis yog qhia raws tus kheej siab nyiam. Vajtswv pub Nws Txojlus rau Nws haivneeg, yog li ntawd txhua tus ntseeg yuav tsum ncaj ncees kawm Vajtswv Txojlus ntawm tus kheej thiaj yuav zeem paub txog tej uas lawv hnov. Cov ntseeg hauv nroog Npele-as tau qhuas vim lawv “kub siab lug mloog Vajtswv Txojlus thiab lawv niaj hnub kawm Vajtswv Txojlus saib puas muaj tseeb raws li Paulus qhia” (Tes Haujlwm 17:11). Tsis yog peb tsis ntseeg tus Tswv cov tub qhe zaj qhia. Tiamsis thaum ub Vajtswv qhia Nws haivneeg zeem paub cov cevlus tseeb, cov cev lus cuav; niaj hnub nimno tus Tswv kuj xav kom peb paub Vajtswv Txojlus peb thiaj tsis ua raws tej lus qhia uas tsis haum Vajluskub.
Thov Vajtswv
Vajtswv, nyuam yaus ua Koj tsaug vim Koj Txojlus tau qhia tawm los ntawm Koj cov tub txib uas dawbhuv thiab ncajncees. Dhau ntawd nyuam yaus thiaj paub Koj lub siab nyiam rau nyuam yaus lub neej. Amees.
Peb tus kheej puas tau tseg sijhawm los kawm Vajtswv Txojlus lawm tau? Nej kawm Vajtswv Txojlus raws txojlw twg?
Nyeem Vajluskub hauv peb lub xyoos: Exekees 7:10-27
Kênh Youtube BHKTHN:
