Klei Aê Diê Blŭ: Y‑Luk 1:46-55
Êlan kliăng: “Leh anăn H’Mari lač:“Mngăt kâo mpŭ mni kơ Khua Yang, ai mĭn kâo mâo klei mơak hlăm Aê Diê Pô Bi Mtlaih kâo” (Y‑Luk 1:46-47)
Klei êmuh ksiêm mĭn: Ya ngă H’Mari myơr klei bi mni kơ Aê Diê? Ya klei ñu mñă hlăm klei ñu mmuñ bi mni kơ Aê Diê? Ya ngă diih mpŭ mni kơ Aê Diê hlăm Noel thŭn anei?
Leh dĭng buăl jăk hưn hŏng H’Mari ñu srăng ba tian leh anăn hđeh điêt anăn jing “Anak Aê Diê” (êlan 32,35), ñu knŏng wĭt lač, “Brei klei anăn truh kơ kâo tui si klei ih blŭ leh.” (Y‑Luk 1:38). Khădah, leh H’Êlisabet bi mklă dŭm klei dĭng buăl jăk hưn leh hŏng pô, H’Mari hơ̆k mơak. Klei ñu mơak jing klei mmuñ bi mni kơ Aê Diê dôk lă lar, dưi pia jing klei mmuñ Magnificat. Ya klei ngă kơ H’Mari mơak bi mni kơ Aê Diê?
Tal sa, H’Mari mpŭ mni kơ Aê Diê kyua ƀuh pô “mâo klei jăk jĭn” (êlan 48). Êlâo hĭn, dua blư̆ dĭng buăl jăk Gabriel lač ñu “pô Aê Diê pap” (Y‑Luk 1:28, 30), leh anăn dua blư̆ H’Êlisabet lač ñu “mâo klei jăk hĭn” (êlan 42, 45), ƀiădah anei jing gưl tal êlâo H’Mari lač pô mâo klei jăk jĭn. Ñu ƀuh pô mâo klei jăk jĭn kyua “Ñu dlăng leh kơ klei luă gŭ dĭng buăl mniê Ñu” leh anăn “Pô Myang snăk ngă leh klei yuôm bhăn kơ kâo” (êlan 48-49). Wăt tơdah H’Mari dưi ktưn hưn pô dôk mă bruă prŏng kơ Aê Diê, ƀiădah hơăi, ñu mpŭ mni kơ Aê Diê kyua Aê Diê dôk ngă bruă prŏng kơ ñu. Ñu hơ̆k mơak kyua Aê Diê dlăng leh anăn yua sa čô mniê ti sa boh ƀuôn điêt msĕ si ñu. Aê Diê dưi ruah hlei pô êdah hĭn, mdrŏng hĭn, ƀiădah Aê Diê lŏ ruah ñu, sa čô mniê điêt dhiêt. Bi mklă djŏ kơ asei mlei pô đru ñu mpŭ mni Aê Diê kyua dŭm bruă “Aê Diê ngă leh” (7 blư̆), amâo djŏ mpŭ mni Aê Diê kyua “kâo ngă leh”, sa klei čŏng bi mni kơ pô mdăp hlăm klei mpŭ mni Aê Diê. Tal dua, H’Mari mpŭ mni Aê Diê kyua Ñu amâo djŏ knŏng pap leh anăn brei klei jăk jĭn hjăn kơ gơ̆ ôh, Ñu lŏ pap leh anăn mgang phung ƀun, phung êdu awăt, phung nah êngao ala ƀuôn (êlan 50-53). Hlăm ala ƀuôn hlăk anăn ăt msĕ si ară anei mơh, phung mdrŏng leh anăn mâo kơhưm kơh jing phung mâo lu mnuih mđing. Phung ƀun ƀin, êdu awăt arăng khăng dlăng hơăi mang. Mơ̆ng klei hdĭp pô, H’Mari dlăng kbưi hĭn, leh anăn năng ai ñu lŏ hdơr Aê Diê ăt pap kơ phung mkăn mơh đa. Drei dưi blŭ jăk hŏng đa đa mnuih ƀiădah knŏng Aê Diê jing Pô bŏ hŏng klei pap, thâo khăp leh anăn mgang grăp čô mnuih, kyua thâo pap jing knuih Aê Diê. Tal tlâo, H’Mari mpŭ mni Aê Diê kyua Ñu pap leh leh anăn đru kơ lu gưl ênuk. Si Ñu ngă leh kơ Y‑Abraham, Ñu ăt ngă nanao snăn mơh kơ phung anak čô gơ̆ (êlan 54-55). Aê Diê jing Pô mdrŏng klei thâo pap.
Yan Noel thŭn anei, brei pioh ai tiê lŏ dlăng wĭt bruă Aê Diê ngă leh kơ pô čiăng myơr klei mpŭ mni kơ Khua Yang Pô Bi Mtlaih drei.
Drei dôk ƀuh “klei jăk jĭn” kyua Aê Diê dlăng leh mơ̆?
Wah lač: Ơ Pô bŏ hŏng klei pap, bi hdơr Noel thŭn anei, akâo kơ Ih đru kâo hdơr hlei kâo jing leh anăn bruă Aê Diê ngă leh čiăng jih ai tiê mpŭ mni kơ Ih kyua thâo sĭt nik kâo mâo klei jăk jĭn.
Dlăng Klei Aê Diê Blŭ hlăm tlâo thŭn: Y‑Yêrêmi 44:7-30
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
