Mathais 12:6-8
Nqe cim:
“rau qhov Neeg Leej Tub yog tus Tswv Hnub Xanpataus” (Mathais 12:8).
Lus nug rau sawvdaws xav:
- Tswv Yexus hais rau cov neeg Falixais hais tias yuav tsum saib Nws tseemceeb dua yam dabtsi?
- Vim li cas Nws hais li ntawd?
- Tus Tswv xav kom cov neeg Falixais zeem paub yam dabtsi?
- Tus Tswv xav tau dabtsi ntawm peb thaum peb pehawm Nws?
Lub sijhawm cov neeg Falixais nrhiav tswvyim tawmtsam Tswv Yexus thiab cov thwjtim hais tias tsis coj raws li txoj cai hnub Xanpataus, Yexus hais rau lawv hais tias “nyob ntawm no muaj ib yam uas tseemceeb dua lub Tuamtsev” (nqe 6), tus Tswv xav qhia tshwm Nws tus kheej yog Vajtswv. Tswv Yexus muab Hauxeyas 6:6 los hais:“ Qhov uas Kuv xav tau yog kom nej muaj txojkev hlub, tsis yog tus tsiaj uas nej muab tua theej txhoj. Kuv xav kom kuv haivneeg paub Kuv tseeb dua li uas cia lawv coj khoom tuaj fij rau Kuv”, kom cov neeg Falixais totaub Vajtswv txojkev hlub. Tus Tswv xav kom Nws haivneeg ua raws li txoj kevcai, ua neeg muaj kev hlub. Cov neeg Falixais coj kevcai nruj tsis muaj lub siab hlub lwm tus. Raws li Levis Kevcai 19:9-10 thiab II-Kevcai 23:24-25, Yexus cov thwjtim tsis ua txhaum txoj kevcai, lawv muaj cai de hnab nplej noj vim lawv tabtom tshaib plab. Tus Tswv xav kom hnub Xanpatuas kuj yog hnub uas qhia tshwm txojkev hlub, hmov tshua hauv Nws haivneeg.
Tswv Yexus hais ntxiv hais tias, “rau qhov Neeg Leej Tub yog tus Tswv Hnub Xanpataus.” (nqe 8). Lo lus “Neeg Leej Tub” tsis yog hais txog tibneeg tiamsis yog hais txog Tswv Yexus, Nws qhia hais tias Nws yog tus muaj hwjchim tswj hnub Xanpataus thiab tsuas yog Nws xwb thiaj txaus peevxwm txhais tawm hnub Xanpataus lub ntsiab. Hauv Malakaus 2:27 Tswv Yexus kuj qhia paub, “…Vajtswv tsim Hnub Xanpataus rau neeg.” Nws xav kom hnub Xanpataus muaj nqis rau neeg, ua rau neeg lub cev muaj zog, muaj kev sib raug zoo nrog tus Tswv thiab ib leeg qhia tawm txojkev hlub rau ib leeg.
Nimno, peb ib leeg ntuas ib leeg hais txog lub ntsiab hnub Xanpataus, peb kuj tig saib yus tus cwjpwm ua rau cov kwvtij ntseeg, qee zaug vim coj nruj peb tsis ua siab ntev thiab tsis hlub yus cov kwvtij ntseeg. Tej zaum lawv tabtom tshaib plab, lossis lawv tabtom ntsib kev nyuaj siab hauv lub neej, lossis lawv tabtom muaj tej kev tsis sib haum nrog lwm tus hauv tuamtsev… yog li lawv tsis kaj siab tuaj pehawm Vajtswv. Tus Tswv xav kom cov neeg tuaj pehawm Vajtswv yuav tsum qhia tshwm kev hlub, hmov tshua thiab ib leeg ua siab ntev rau ib leeg. Cia li xyaum tus Tswv haivneeg tiam Nehemis nyob lub siab thaum tuaj pehawm Vajtswv, Nehemis hais rau lawv hais tias, “nej cia li rov mus tsev, noj tej nqaij rog thiab haus tej cawv qab zib thiab muab ibtxhia pub rau cov neeg uas tsis tau npaj dabtsi noj; rau qhov hnub no yog hnub uas dawbhuv rau peb tus Tswv; thiab tsis txhob nyuaj siab, vim txojkev zoo siab uas los ntawm tus Tswv twb txhawb tau nej lub zog lawm.” (Nehemis 8:10).
Thov Vajtswv,
Tus Tswv, thov Koj pab kom nyuam yaus tsis coj nruj tiamsis muaj lub siab hmov tshua thiab hlub tej kwvtij nkaujmuam ntseeg, koom siab pehawm Koj. Amees.
Peb puas zeem paub hnub pehawm Vajtswv yog hnub qhia tshwm txojkev sib raug zoo thiab ib leeg ua zoo rau ib leeg?
Nyeem Vajluskub hauv peb lub xyoos: Yelemis 36
Kênh Youtube BHKTHN:
