Mathais 14:22-23
Nqe cim:
“Thaum sawvdaws mus tas lawm, Yexus nce mus thov Vajtswv pem roob” (Malakaus 6:46).
Lus nug rau sawvdaws xav: Tswv Yexus ua dabtsi tom qab uas Nws hais kom sawvdaws rov mus tsev? Vim li cas tus Tswv cheemtsum nyob ib leeg ntsiag to? Peb pheej siv lub sijhawm los thov Vajtswv zoo li cas?
Lub sijhawm Tswv Yexus ua haujlwm, Nws niaj hnub muaj kev thov Vajtswv. Hauv cov Phau Ntawv Txojmoo Zoo hais txog kwvlam li 38 zaug qhov uas Tswv Yexus thov Vajtswv. Hauv ntu Vajluskub no, Timthawj Mathais sau tseg hais tias Tswv Yexus mus thov Vajtswv ib leeg ua ntej thiab tom qab uas Nws ua mov rau tsib txhiab leej noj (Mathais 14:13-23). Qhov no qhia paub Yexus thiab Leej Txiv muaj kev sib raug zoo, thiab Nws ua haujlwm hauv ntiajteb no raws li Leej Txiv lub siab nyiam. Txawm Tswv Yexus yog Vajtswv los, thaum Nws los yug ua neeg Nws yeej siv sijhawm los thov Leej Txiv. Thov Vajtswv yog tes haujlwm uas tus Tswv niaj hnub ua nrog Vajtswv Vaj Peb Leeg.
Cov neeg Yudais saib qhov kev thov Vajtswv tseemceeb, ib hnub lawv thov Vajtswv ntau zaug. Thaum Tswv Yexus thov Vajtswv, qhia paub Nws ua zoo ib yam cov txivneej uas cov neeg Yudais. Tus Tswv kuj xav ua ib tug qauv thov Vajtswv tseg rau cov thwjtim thiab cov neeg uas ntseeg Nws xyaum, kom lawv paub ua lub neej niaj hnub ua raws Leej Txiv tus muaj hwjchim loj kawg nkaus lub siab nyiam dhau los ntawm qhov kev thov Vajtswv.
Peb pom Tswv Yexus siv sijhawm thov Vajtswv txhua hnub. Txawm yog muaj haujlwm ntau, los Nws yeej qee zias lub sijhawm thov Vajtswv. Tus Tswv thov Vajtswv thaum sawv ntxov (Malakaus 1:35). Nws thov Vajtswv thaum tsaus ntuj (Mathais 14:23). Nws thov Vajtswv ib hmos kaj ntug (Lukas 6:12). Tus Tswv kuj thov Vajtswv pab rau lwm tus (Lukas 23:34; Yauhas 17:7, 20-21). Ua ntej nws raug ntes, Tswv Yexus kuj thov Vajtswv hauv lub vaj Khexemanes (Lukas 22:39-46). Tswv Yexus muaj lub neej thov Vajtswv txij thaum pib ua haujlwm mus txog thaum nws raug ntsia saum tus ntoo khaublig. Plaub Phau Ntawv Txojmoo Zoo puavleej hais txog ntau zaus Tswv Yexus mus rau qhov chaw ntsiag to thov Vajtswv. Nws mloog thiab ua raws li Vajtswv lub siab nyiam los ntawm qhov Nws siv sijhawm thov Leej Txiv pab.
Lub sijhawm nrog tus Tswv sib txuas lus yog qhov tseemceeb thiab cheemtsum ntawm txhua tus ntseeg Yexus. Kev thov Vajtswv yog lub sijhawm peb nrog Nws sib raug zoo, sib txuas lus thiab mloog Nws qhia. Peb yuav tau txais lub zog kom tiv taus tej kev txomnyem hauv lub neej. Lub sijhawm thov Vajtswv yog lub sijhawm ua kom peb muaj kev sib raug zoo nrog Leej Txiv, peb thiaj paub ua raws li peb Leej Txiv tus uas nyob saum ntuj lub siab nyiam. Tus Tswv cov menyuam yuav tau koom ua ke thov Vajtswv hauv tuamtsev, hauv tej pab pawg, hauv tsevneeg,… tiamsis peb tus kheej kuj yuav tsum tau siv sijhawm ntsiag to thov Vajtswv. Thaum muaj lub neej thov Vajtswv, yuav ua rau tus Tswv cov menyuam muaj kev ntseeg thiab ua neej tawg pab txi txiv pub rau Nws.
Thov Vajtswv,
Vajtswv, nyuam yaus ua Koj tsaug uas Koj pub nyuam yaus nrog tau Koj txuas lus. Thov Koj pab kom nyuam yaus paub tswj, nrhiav sijhawm ntsiag to thov Vajtswv txhua hnub, nyuam yaus thiaj muaj lub neej nrog tau Leej Txiv sib raug zoo thiab ua haum Koj siab. Amees.
Peb puas tau siv sijhawm tshwjxeeb los thov Vajtswv lawm tau?
Nyeem Vajluskub hauv peb lub xyoos: Tej Lus Qhia 11:1-12:14
Kênh Youtube BHKTHN:
