Klei Aê Diê Blŭ: Y-Mathiơ 14:22-23
Êlan kliăng: “Leh Ñu bi wĭt phung anăn, Ñu đĭ čư̆ čiăng wah lač.” (Y‑Markôs 6:46).
Klei êmuh ksiêm mĭn: Ya klei Khua Yang Yêsu ngă leh Ñu brei phung lu đuĕ wĭt? Ya ngă Ñu čiăng mâo mmông dôk hjăn Ñu? Si drei khăng pioh mmông dôk hjăn hŏng Khua Yang?
Hlăm dŭm thŭn Khua Yang Yêsu mă bruă, Ñu bi êdah nanao sa klei hdĭp wah lač. Mâo ƀiă êdi 38 blư̆ hlăm hdruôm hră Klei Mrâo Mrang Jăk čih kơ klei Khua Yang Yêsu wah lač. Hlăm trăn anei, khua ƀĭng kna Y-Mathiơ čih kơ klei Khua Yang pioh mmông wah lač hjăn Ñu mtam, êlâo leh anăn êdei kơ ngă klei yuôm bhăn bliư̆ kpŭng čiêm êbeh kơ êma êbâo čô mnuih ƀơ̆ng (Y‑Mathiơ 14:13‑23). Klei anei hưn bi sĭt kơ klei Ñu bi mguôp sŭk suôr hŏng Aê Diê Ama, leh anăn bruă Ñu ngă êjai dôk ti lăn ala tui hlue si klei Ama čiăng nanao. Wăt tơdah Khua Yang Yêsu ăt jing Aê Diê, ƀiădah êjai jing mnuih, Ñu ăt pioh mmông wah lač hjăn hŏng Ama. Wah lač jing bruă Khua Yang khăng ngă čiăng bi mguôp hŏng Aê Diê Tlâo Čô Yang.
Phung Israel yap yuôm snăk klei wah lač, diñu wah lač lu blư̆ hlăm hruê. Tơdah Khua Yang Yêsu wah lač, Ñu bi êdah kơ Ñu pô jing sa čô mnuih msĕ si phung êkei Israel mkăn. Ñu čiăng lui sa klei bi hmô klei hdĭp wah lač kơ phung ƀĭng kna leh anăn kơ phung tui hlue Ñu, anăn jing sa klei hdĭp tui duah klei Aê Diê Ama čiăng hŏng mmông wah lač hjăn.
Drei ƀuh Khua Yang Yêsu pioh mmông wah lač hjăn hlăm djăp blư̆. Êjai mâo lu klei gun kpăk hlăm bruă, Ñu ăt êlâo hĭn pioh mmông wah lač. Khua Yang wah lač hlăk aguah ưm (Y‑Markôs 1:35). Ñu wah lač hlăk tlam mmăt (Y‑Mathiơ 14:23). Ñu krŏng ală wah lač jih mlam (Y‑Luk 6:12). Khua Yang wah lač brei kơ pô mkăn mơh (Y‑Luk 23:34; Y‑Yôhan 17:7, 20‑21). Êlâo kơ arăng mă, Khua Yang Yêsu ăt bi blah hlăm klei wah lač ti war mnga Gêtsêmanê (Y‑Luk 22:39‑46). Khua Yang Yêsu bi êdah sa klei hdĭp wah lač dơ̆ng mơ̆ng kčưm mă bruă tơl truh kơ mmông tŭ klei djiê ti kyâo bi kal. Jih pă pô čih hră Klei Mrâo Mrang Jăk čih sơăi lu blư̆ Khua Yang Yêsu duah anôk kriêp ñăt čiăng wah lač. Ñu đup gưt klei Aê Diê čiăng leh anăn kñăm hŏng mmông pioh dôk hjăn hŏng Ama.
Mmông dôk hjăn hŏng Khua Yang jing yuôm leh anăn čiăng snăk kơ grăp čô phung đăo. Anăn jing mmông drei bi mguôp, blŭ hrăm leh anăn mđing hmư̆ asăp Khua Yang. Drei ăt srăng mă tŭ klei ktang mơ̆ng adiê dlông čiăng dưi dôk ti anăp lu klei dleh dlan hlăm klei hdĭp. Anei ăt jing mmông čiêm rông klei bi mguôp hŏng Ama čiăng thâo kral klei Ñu čiăng leh anăn gưt ngă tui si klei Ama drei hlăm adiê čiăng. Phung anak ƀuôn sang Aê Diê dưi bi mguôp mbĭt hŏng phung đăo mkăn hlăm mmông wah lač ti Sang Aê Diê, hlăm êpul bi kƀĭn điêt, hlăm gŏ sang, … Ƀiădah amâo dưi lui ôh mmông pioh wah lač hjăn hŏng Khua Yang. Bi mđĭ klei hdĭp wah lač leh anăn pioh mmông dôk hjăn hŏng Khua Yang srăng đru phung anak ƀuôn sang Aê Diê djă pioh kjăp klei đăo leh anăn hdĭp mâo boh tŭ dưn kơ Khua Yang.
Si ngă drei pioh mmông wah lač hjăn hŏng Khua Yang êlâo hĭn mơ̆?
Wah lač: Ơ Khua Yang, bi mni lač jăk kơ Ih brei kơ kâo klei pap dưi bi mguôp hŏng Ih. Akâo kơ Ih đru kâo thâo kpĭ mjuăt pô, djă pioh mmông wah lač hjăn hŏng Khua Yang grăp hruê čiăng čiêm rông klei bi mguôp sŭk suôr hŏng Ama leh anăn hdĭp bi mơak kơ Khua Yang.
Dlăng Klei Aê Diê Blŭ hlăm tlâo thŭn: Khua Pô Mtô 11:1 – 12:14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
