Klei Aê Diê Blŭ: Y‑Yêrêmi 37:1-10.
Êlan kliăng: “Tơdah phung kpă ur kwưh klei đru, Yêhôwa hmư̆, leh anăn bi mtlaih digơ̆ mơ̆ng jih jang klei knap mñai” (Klei Mmuñ Hđăp 34:17).
Klei êmuh ksiêm mĭn: Mtao Sêđêkia bi mklă ya klei ngă leh phung kahan Kaldê kwang dar? Si klei Yêhôwa Aê Diê wĭt lač kơ mtao? Ya ngă Yêhôwa Aê Diê amâo hmư̆ klei mtao Yuđa akâo? Si brei drei hdĭp čiăng Aê Diê hmư̆ leh anăn wĭt lač?
Y‑Sêđêkia mâo Mtao Nebukatnetsar brei jing mtao Yuđa “hrô Y‑Jêhôyakin anak êkei Y‑Jêhôyakim” (êlan 1). Leh mtao Sêđêkia ƀuh klei Aê Diê bi êdah kơ Khua pô hưn êlâo Y‑Yêrêmi ƀrư̆ jing sĭt, leh anăn hŏng boh klei mtao hŏng phung ƀuôn sang dôk tŭ klei phung kahan Kalde kwang dar hlăm ƀuôn prŏng, anăn “Mtao Sêđêkia tiŏ nao Y‑Jêhukal anak êkei Y‑Sêlêmia leh anăn khua ngă yang Y‑Sôphôni anak êkei Y‑Maseya kơ khua pô hưn êlâo Y‑Yêrêmi” (êlan 3) čiăng akâo ñu kwưh kơ Yêhôwa bi mtlaih. Leh anăn, Mtao Sêđêkia ƀuh kahan Kaldê pŏk kwang dar ƀuôn prŏng kyua hmư̆ klei hâo hưn phung lĭng kahan Pharaôn dôk nao kwang dar Yêrusalem, anăn mtao bi mĭn êpul kahan Kaldê srăng kbiă mơ̆ng lăn čar. Ƀiădah Klei Yêhôwa blŭ hŏng Khua pô hưn êlâo Y‑Yêrêmi lĭng kahan Pharaôn srăng lŏ wĭt kơ Êjip, jing diñu amâo srăng dưi đru msĕ si klei mtao čiăng ôh, “Phung Kaldê srăng lŏ hriê bi blah hŏng ƀuôn anei; diñu srăng mă ƀuôn anei leh anăn čuh gơ̆ hŏng pui” (êlan 8). Klei Aê Diê Blŭ lŏ lač, wăt tơdah êpul kahan Kaldê arăng blah rai knŏng adôk ƀiă kahan, snăn ăt srăng čuh ƀuôn prŏng mơh. Snăn tơdah čang hmăng phung Kaldê kbiă đuê̆, amâo kwang dar ôh leh anăn amâo plah mmiă Yêrusalem ôh ăt knŏng jing klei mtao Yuđa čang hmăng hơaĭ mang đuč.
Si ngă Yêhôwa dưi hmư̆ asăp bi mtlaih Mtao Sêđêkia hlăk êjai sa čô nah mtao akâo kơ Khua pô hưn êlâo Y‑Yêrêmi wah lač brei kơ pô, “Ƀiădah ñu, phung dĭng buăl ñu, wăt phung ƀuôn sang hlăm čar amâo dôk hmư̆ ôh kơ klei Yêhôwa blŭ leh hŏng khua pô hưn êlâo Y‑Yêrêmi” (câu 2). Mtao mĭn klei dĭng buăl Aê Diê wah lač srăng truh sĭt hĭn kơ pô, khădah snăn mta phŭn ngă kơ klei mtao akâo amâo dưi wĭt lač jing knuih amâo đăo leh anăn ai tiê bi kdơ̆ng amâo kmhal. Hŏng klei thâo klei hdĭp pô, Mtao Đawit bi mklă hlăm Klei Mmuñ Hđăp 34:17: “Tơdah phung kpă ur kwưh klei đru, Yêhôwa hmư̆, leh anăn bi mtlaih digơ̆ mơ̆ng jih jang klei knap mñai”. Kyua anăn hdră sa anăn čiăng kơ Mtao Sêđêkia mâo klei Yêhôwa Aê Diê bi mtlaih jing bi mlih ai tiê bi kdơ̆ng, kmhal klei soh, amâo djŏ hdĭp soh leh anăn knang kơ pô mkăn wah lač brei kơ pô ôh.
Hruê anei msĕ mơh, grăp čô drei kyua klei Khua Yang Yêsu bu mtlaih leh dưi nao giăm Aê Diê (Êphêsô 3:12), kyua anăn čiăng kơ klei drei akâo mâo Aê Diê hmư̆ leh anăn wĭt lač brei drei lăm lui klei soh, măk ƀai , leh anăn brei hdĭp kpă ênô hlue si Klei Aê Diê Blŭ mtô (Y‑Êsai 59:1‑2).
Ya klei mñă kơ drei hlăm klei hdĭp mơ̆ng klei hriăm Aê Diê hngah kơ klei Mtao Sêdêkia akâo?
Wah lač: Ơ Aê Diê Kpă Ênô! Kâo bi mni lač jăk kơ Ih kyua Ih ƀuăn srăng mđing hmư̆ nanao klei akâo mơ̆ng phung kpă ênô. Akâo kơ Khua Yang đru kâo hdĭp kpă ênuah hlue si klei Ih mtô čiăng klei kâo wah lač dưi bi mơak kơ Aê Diê.
Dlăng Klei Aê Diê Blŭ hlăm tlâo thŭn: Klei Bi Hriêng 27:1‑27
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
