Yelemis 37:1-10
Nqe cim:
“Thaum cov neeg ncaj ncees thov tus Tswv, nws mloog lawv tej lus thov, nws cawm lawv dim ntawm lawv tej kev ntxhov siab” (Ntawv Nkauj 34:17).
Lus nug rau sawvdaws xav:
- Vajntxwv Xedekiyas ua li cas thaum Npanpiloos cov tub rog tuaj vij lub nroog?
- Vajntxwv xav hais tias tus Tswv yuav teb tej lus thov ntawd li cas?
- Vim li cas tus Tswv tsis teb tus vajntxwv Yudais tej lus thov?
- Peb yuav tsum ua lub neej zoo li cas thiaj tau Vajtswv teb tej lus thov?
Xedekiyas tau vajntxwv Nenpukajnexales tsa ua vajntxwv kav lub tebchaws Yudas “hloov Yehauyakees tus tub Yehauyakhees” (nqe 1).Thaum vajntxwv pom tus Xibfwb cev Vajtswv lus Yelemis muaj tiav li ntawd, thiab vajntxwv Npanpiloos txib tub rog tuaj vij lub nroog, vajntxwv “txib Selemiyas tus tub Yehukas thiab Ma-axeyas tus tub Xefaniyas uas ua povthawj tuaj cuag Yelemis” (nqe 3) thov Vajtswv pab lawv. Thaum pom Npanpiloos cov tub rog thim rov qab, vajntxwv Xedekiyas xav hais tias Iziv cov tub rog twb sawv kev tuaj pab lawv lawm. Tiamsis tus cev lus Yelemis hais rau lawv hais tias; cov Iziv tej tub rog yuav rov qab, tsis pab tau cov Yudas thiab “…cov tubrog Npanpiloos yuav rov tuaj tua, txeeb lub nroog thiab muab hlawv povtseg” (nqe 8). Vajtswv tseem hais ntxiv, txawm hais tias Npanpiloos cov tubrog raug swb rog los, cov tubrog raug sab nyob hauv tsev ntaub yuav sawv los hlawv lub nroog. Yog li ntawd, qhov uas cia siab hais tias Npanpiloos cov tubrog yuav thim rov tsis vij lub nroog yog kev cia siab tsis muaj tseeb.
Vajtswv yuav ua cas teb Xedekiyas tej lus thov thaum nws ib ke cia siab rau Yelemis kev thov Vajtswv pab, tiamsis nws “…cov nomtswv lossis cov pejxeem tsis mloog tej lus uas tus Tswv kom Yelemis hais rau lawv” (nqe 2). Vajntxwv xav hais tias Vajtswv tus neeg tej lus thov yuav tau Vajtswv teb, tiamsis qhov uas Vajtswv tsis teb tej lus thov raws li vajntxwv ntshaw yog vim vajntxwv lub siab tsis ntseeg thiab tsis lees kev txhaum. Raws li kev ua neej dhau los, Vajntxwv Daviv qhia hais tias: “Thaum cov neeg ncaj ncees thov tus Tswv, nws mloog lawv tej lus thov, nws cawm lawv dim ntawm lawv tej kev ntxhov siab” Ntawv Nkauj 34:17. Yog li ntawd, qhov uas vajntxwv Xedekiyas xav tau Vajtswv teb tej lus thov, nws yuav tsum hloov siab thiab tso kev txhaum tseg, tsis yog pheej ua txhaum mam mus caw lwm tus thov Vajtswv pab rau yus.
Niaj hnub nim no yog koom nrog Tswv Yexus Khetos, peb los cuag tau Vajtswv (Efexus 3:12), yog xav kom Vajtswv teb peb tej lus thov, peb yuav tsum tso kev txhaum tseg, ua lub neej ncaj ncees raws li Vajluskub qhia (Yaxayas 59:1-2).
Thov Vajtswv,
Vajtswv ntuj tus uas ncaj ncees! Nyuam yaus ua Koj tsaug vim Koj mloog cov neeg ncaj ncees tej lus thov. Thov pab nyuam yaus paub ua lub neej ncaj ncees raws li Koj tej lus qhia, kom tau Koj teb tej lus thov. Amees.
Vajtswv tsis teb Xedekiyas tej lus thov pab, qhia peb txog yam dab tsi?
Nyeem Vajluskub hauv peb lub xyoo: Pajlug 27
Kênh Youtube BHKTHN:
https://www.youtube.com/c/bhkthn
