Klei Aê Diê Blŭ: Klei Mtô Mñă Klei Bhiăn 16:13-17
Êlan kliăng: “Êjai kjuh hruê brei diih hdơr pioh knăm anei kơ Yêhôwa Aê Diê diih ti anôk Yêhôwa srăng ruah; kyuadah Yêhôwa Aê Diê diih srăng hơêč hmưi klei jăk jĭn kơ diih hlăm jih boh diih mâo leh anăn jih bruă kngan diih ngă. Snăn diih srăng bŏ hŏng klei hơ̆k mơak mđrăm mbĭt.” (Klei Mtô Mñă Klei Bhiăn 16:15).
Klei êmuh ksiêm mĭn: Ya jing knăm Sang Čhiăm? Ya bruă phung ƀuôn sang Aê Diê ngă hlăm gưl knăm anei? Ya klei yuôm bhăn hŏng phung ƀuôn sang Israel hlăm bruă hdơr pioh knăm Sang čhiăm? Ya klei drei ngă čiăng bi êdah ai tiê hdơr knga kơ Aê Diê leh anăn myơr klei bi mni kơ Ñu?
Jih hdruôm hră Klei Mtô Mñă Klei Bhiăn, Y‑Môis iêô mthưr phung ƀuôn sang Israel hdơr klei Yêhôwa ngă leh kơ diñu. Kyua anăn bruă hdơr pioh dŭm knăm mdê mdê hlăm thŭn jing bruă yuôm bhăn hlăm klei hdĭp kkuh mpŭ phung ƀuôn sang Israel kñăm bi êdah ai tiê diñu hdơr knga hŏng Aê Diê. Hlăm anăn, Knăm Sang Čhiăm jing sa hlăm tlâo knăm prŏng phung ƀuôn sang Israel.
Kjuh hruê mơak Knăm Sang Čhiăm jing gưl čiăng bi hdơr kơ klei Aê Diê răng mgang bŏ pă pluh thŭn phung ƀuôn sang hdĭp êjai hlăm dŭm sang čhiăm ti kdrăn tač. Hlăm wưng bi hdơr Knăm Sang Čhiăm mkŏ mjing hlăm yan hla êluh grăp thŭn, leh hrui wiă mdiê kuê, boh kriăk ƀâo, êa praĭ leh anăn djăp mta boh kroh pla mjing, kyua anăn anei ăt jing gưl phung ƀuôn sang Aê Diê bi mni kơ Aê Diê kơ klei Ñu hơêč hmưi kơ yan boh mnga. Ai êwa knăm anei bŏ hŏng klei hơ̆k mơak kyua phung ƀuôn sang Israel dưi êngiê kyua klei Aê Diê bi mtlaih. Khădah, phung ƀuôn sang Aê Diê srăng amâo mâo ôh klei hơ̆k mơak kluôm ênŭm tơdah hlăm diñu adôk mâo phung ƀun ƀin, phung amâo mâo anôk dôk ăt dleh dlan. Kyua anăn Knăm Sang Čhiăm lŏ jing gưl čiăng kơ phung ƀuôn sang Aê Diê kah mbha klei Aê Diê hơêč hmưi kơ pô hŏng phung dleh dlan, kñăm čiăng kơ jih jang mnuih mdrŏng amâodah ƀun, wăt tơdah mnuih ƀuôn sang tinăn amâodah phung tue êgar ăt sa ai bi mni kơ Aê Diê kyua klei jăk Ñu ngă leh nanao kơ phung ƀuôn sang Israel.
Hruê anei, drei amâo lŏ hdơr pioh ôh Knăm Sang Čhiăm kyua knăm anei knŏng yuôm bhăn hŏng phung ƀuôn sang Israel jing phung găn leh thŭn mlan hdĭp hlăm kdrăn tač leh anăn thâo klei Aê Diê răng mgang yuôm bhăn. Wăt tơdah drei amâo găn ôh hruê mlan đuĕ hiu msĕ si phung ƀuôn sang Israel ôh, ƀiădah hlăm hdră tui hlue Aê Diê, năng ai grăp čô drei tuôm găn leh dŭm wưng dleh dlan dưi msĕ si klei hdĭp phung ƀuôn sang Israel hlăm kdrăn tač. Drei ăt tuôm thâo klei Aê Diê răng mgang, mkăp brei hlăm wưng dleh dlan hlăm klei hdĭp. Kyua anăn, hlăm dŭm gưl mdê hjăn mơ̆ng grăp čô, brei drei pioh hruê mông čiăng lŏ hdơr ya klei Aê Diê ngă leh kơ pô leh anăn myơr klei bi mni kơ Aê Diê. Klei yuôm bhăn hĭn jing brei mâo bruă ngă đru brei, kah mbha hŏng phung dleh dlan riêng gah pô čiăng kơ mơ̆ng bruă ngă anăn, digơ̆ ăt thâo kơ sa Aê Diê jăk, Pô ktuê dlăng nanao leh anăn mkăp brei kơ anak mnuih hŏng lu hdră mdê mdê.
Ya klei drei hdơr hĭn kơ klei jăk Aê Diê ngă leh kơ klei hdĭp pô?
Wah lač: Ơ Khua Yang jing Pô jăk, akâo kơ Ih đru kâo hdĭp hŏng ai tiê hdơr knga kơ Aê Diê leh anăn mđing dlăng kah mbha klei Aê Diê brei kơ kâo hŏng phung dôk găn klei dleh dlan Ih mdưm riêng gah kâo.
Dlăng Klei Aê Diê Blŭ hlăm tlâo thŭn: Klei Bi Hriêng22:1‑29
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
