2 Kevcai 16:13-17
Nqe cim:
“Nej ua kevcai nyob tsev pheebsuab xya hnub qhuas tus Tswv uas yog nej tus Vajtswv, ntawm qhov chaw uas nej pehawm Nws; nej cia li zoo siab rau qhov tus Tswv foom koob hmoov rau nej tej qoobloo thiab tej haujlwm uas nej ua.” (2 Kevcai 16:15).
Lus nug rau sawvdaws xav:
- Rooj Kevcai nyob tsev pheebsuab yog li cas? Thiab Vajtswv yuav tsum ua dab tsi thaum koom rooj kevcai no?
- Koom rooj kevcai nyob tsev pheebsuab muaj qab hau dab tsi rau Vajtswv haiv neeg?
- Peb yuav ua dab tsi kom nco Vajtswv txiajntsig thiab ua Nws tsaug?
Tas nrho phau 2 Kevcai, Mauxes nqua hu kom haiv neeg Yixalayees yuav tsum nco ntsoov tej uas tus Tswv twb ua rau lawv lawm. Vim li ntawd, ceev hnub ua Kevcai hauv txhua xyoo yog ib tes haujlwm tseemceeb ntawm qhia tshwm txog cov neeg Yixalayees kev pehawm tus Tswv. Kevcai Nyob Tsev Pheebsuab yog ib rooj kevcai loj ntawm peb rooj kevcai uas cov Yixalayees pheej ua.
Xya hnub ua Kevcai Nyob Tsev Pheebsuab yog sijhawm zoo los nco txog Vajtswv kev tiv thaiv thaum cov Yixalayees nyob plaub caug xyoo tom tiaj suabpuam. Rooj kevcai npaj rau thaum tom qab sau Qoobloo, sau tej txiv hmab txiv ntoo tas, kuj yog lub sijhawm zoo los ua Vajtswv tsaug rau Nws kev foom pub sau tau Qoobloo. Mojyam ntawm cov neeg koom rooj kevcai yog muaj kev zoo siab kawg, vim haiv neeg Yixalayees tau txais kev cawm dim los nyob ywjpheej hauv Vajtswv kev hlub. Txawm li ntawd los, Vajtswv haiv neeg yeej tsis muaj kev zoo siab puv ntoob yog hauv lawv cov tseem muaj tus raug txomnyem, tsis tau txaus noj txaus hnav thiab tej neeg tuaj ua qhua tsis tau chaw so… Yog li ntawd, ua Kevcai Nyob Tsev Pheebsuab kuj yog lub sijhawm rau Vajtswv haiv neeg muab tej uas lawv muaj faib pub tej neeg txomnyem uas nyob ib ncig hauv lawv lub tebchaws, kom txhua tus tsis hais muaj thiab pluag puavleej tau nrog lawv ua Vajtswv tsaug txog Nws kev ua zoo rau haiv neeg Yixalayees.
Niaj hnub nimno peb tsis ua Kevcai Nyob Tsev Pheebsuab lawm, vim rooj kevcai no tsuas muaj qab hau rau haiv neeg Yixalayees nkaus xwb, rau qhov lawv tau Vajtswv tiv thaiv pab cawm lawv tshwjxeeb thaum nyob plaub caug xyoo tom tiaj suabpuam. Txawm peb tsis khiav tebchaws rau ub rau no li haiv neeg Yixalayees, tiamsis thaum los nrog Tswv Yexus mus, tej zaum peb kuj ntsib kev nyuajsiab tuaj tab kaum uas muab piv tau ib yam li haiv neeg Yixalayees tab tom taug kev tom tiaj suabpuam ntag. Peb kuj tau saj Vajtswv kev pab cawm ntau zaug, ntau yam hauv lub neej dhau los. Yog li ntawd, peb txhua tus yuav tsum muaj sijhawm zoo los nco txog tej uas Vajtswv tau pab lawm thiab muaj lus ua Vajtswv tsaug. Qhov tseemceeb tshaj yog peb cov ntseeg yuav tsum ua lub neej ncav mus pab tej neeg txomnyem nyob ib ncig ntawm yus, kom lawv paub Vajtswv thiab tau Vajtswv hlub lawv ib yam nkaus.
Thov Vajtswv,
Tus Tswv uas yog tus zoo, thov Koj pab nyuam yaus paub nco ntsoov Koj tej txiajntsig, paub pab lwm tus uas raug txomnyem nyob ib ncig ntawm nyuam yaus. Amees.
Yam uas peb nco tshaj txog tus Tswv kev pab hauv peb lub neej yog dab tsi?
Nyeem Vajluskub hauv peb lub xyoo: Pajlug 22
Kênh Youtube BHKTHN:
