Klei Aê Diê Blŭ: Klei Bi Hriêng 15:16
Êlan kliăng: Jăk hĭn mâo mnơ̆ng ƀiă mbĭt hŏng klei huĭ mpŭ kơ Yêhôwa,
hŏng mâo lu ngăn drăp mbĭt hŏng klei rŭng răng. (Klei Bi Hriêng 15:16)
Klei êmuh ksiêm mĭn: Ya mta Mtao Salômôn đru kơ anak ñu ruah? Ya klei tŭ kơ anak mnuih tơdah huĭ mpŭ kơ Aê Diê? Ya klei mdrŏng dưi brei leh anăn amâo dưi brei kơ anak mnuih? Si klei brei drei bi mlih kơ klei mĭn pô hlăm klei hdĭp ?
Mtao Salômôn yua boh blŭ mkă “Jăk hĭn ….hŏng” čiăng bi hriăm anak ñu bi mĭn hlăm bruă ruah. Êlan 16 bi hriăm anak ñu brei mđing tal êlâo “Huĭ mpŭ kơ Aê Diê” hĭn kơ “lu ngăn drăp”. Phung ƀuôn sang Aê Diê brei dưm ênoh yuôm hlăm mngăt yuôm hĭn kơ ênoh yuôm hlăm kđeh. Hdruôm hră Klei Bi Hriêng bi hriăm lu snăk kơ klei tŭ dưn mơ̆ng klei huĭ mpŭ kơ Aê Diê: Huĭ mpŭ kơ Aê Diê yuôm hĭn kơ ngăn drăp kyua jing “akŏ êa kơ klei hdĭp” (Klei Bi Hriêng 14:27) leh anăn “atăt kơ klei hdĭp” (19:23). Huĭ mpŭ kơ Aê Diê ba klei “knang kjăp” (14:26), klei čang hmăng (23:17-18) kơ phung ƀuôn sang Ñu. Huĭ mpŭ kơ Aê Diê đru kơ anak mnuih ñĕ đuĕ kơ klei soh (8:13), lăm klei wê (16:6) leh anăn êbat hlăm klei kpă ênô Aê Diê (14:2)…
Kriăng mă bruă, kpă ênuah kpưn kơ mdrŏng amâo djŏ soh ôh kyua klei mdrŏng sah ăt jing sa klei jăk hĭn Aê Diê brei: “Klei mưn kơ klei luă gŭ leh anăn klei huĭ mpŭ kơ Yêhôwa, jing klei mdrŏng, klei arăng mpŭ, leh anăn klei hdĭp” (Klei Bi Hriêng 22:4). Ƀiădah tơdah knang kơ ngăn drăp pô leh anăn ngă mgao, amâo knang ôh kơ Aê Diê jing soh, Aê Diê srăng bi rai klei mgao anăn, “Hlei pô knang kơ klei mdrŏng ñu pô srăng lĕ, ƀiădah phung kpă ênô srăng đĭ kyar msĕ si hla kyâo mtah” (11:28). Brei drei thâo ngăn drăp srăng amâo bi mtlaih ôh phung soh hlăm hruê phat kđi (11:4); diñu amâo dưi blei ôh klei êđăp ênang (15:16-17) amâodah klei hing ang jăk (22:1). Ngăn drăp mâo klei bi knăl jing êjai, hruê anei adôk, mgi luč (23:4-5; 27:23-24). Ngăn drăp jing mnơ̆ng kăp đru jăk jĭn hŏng phung luă gŭ ƀiădah jing pô kiă huĭ hyưt hŏng phung ngă mgao. Prăk mah lu snăn ba klei rŭng răng, amâo êđăp ênang ƀrư̆ lu hĭn.
Ala ƀuôn hruê anei đĭ kyar kơ klei kreh knhâo pral snăk ƀiădah anak mnuih dlăng hơaĭ mang kơ ênoh yuôm knuih hdĭp jăk. Kyua tui tiŏ kơ mnơ̆ng dhơ̆ng anăn ai tiê anak mnuih jing khăng, amâo djŏ knŏng luč klei khăp đuč ôh ƀiădah lŏ dlăng hơaĭ mang kơ ênoh yuôm hlăm mngăt. Prăk mah bi mlih ai tiê jăk hlăm lu mnuih. Akâo kơ Khua Yang đru drei thâo hlue ngă Klei Aê Diê Blŭ mtô: ruah ênoh yuôm mngăt hơĭt kjăp hĭn kơ ruah mnơ̆ng dhơ̆ng mâo êjai hlăm lăn ala anei. Tŭ mâo ƀiă prăk ƀiădah huĭ mpŭ kơ Aê Diê čiăng mâo klei êđăp ênang. Gĭr mă bruă, thâo ya mnơ̆ng pô mâo jing kyua Aê Diê pô brei. Bi mni lač jăk kơ Aê Diê leh anăn ăt thâo kah mbha kơ ayŏng adei hlăm Sang Aê Diê leh anăn phung mkăn tuôm hŏng dleh dlan.
Drei klă sĭt ruah klei jăk hĭn leh mơh ka? Diih dôk rŭng răng mơ̆ kơ prăk mah leh anăn wơr hĕ hnơ̆ng yuôm bhăn mơ̆ng mngăt ai tiê leh anăn hrŏ hĕ klei huĭ mpŭ kơ Aê Diê?
Wah lač: Ơ Khua Yang, kâo bi mni lač jăk kơ Ih kyua Ih mñă kơ kâo ruah klei jăk hĭn kơ klei hdĭp kâo. Akâo kơ Ih đru kâo thâo huĭ mpŭ kơ Aê Diê, thâo bi mni lač jăk kơ Aê Diê hŏng ngăn drăp Aê Diê brei, hdĭp mơak leh anăn thâo kah mbha kơ phung ƀun ƀin.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y‑Nêhêmi 11
Kênh Youtube BHKTHN:
