Pajlug 15:16
16 Ua neeg pluag uas paub ntshai tus Tswv zoo dua li ua neeg npluanuj, tiamsis muaj teebmeem.
Lus nug rau sawvdaws xav:
- Vajntxwv Xalumoos qhia peb yuav tsum xaiv li cas?
- Hwm tus Tswv tibneeg yuav tau nqi zog dabtsi?
- Npluanuj ua rau tibneeg tau dabtsi thiab tsis tau dabtsi?
- Peb cheemtsim hloov yus txojkev xav hauv lub neej zoo licas?
Ib tsoom cov mloog txhua tus,
Vajntxwv Xalumoos siv cov lus sib piv “pluag… zoo dua” los qhia rau peb paub xav rau txojkev xaiv ua neej. Nqe 16 qhia kom peb “hwm tus Tswv” zoo dua “npluanuj” lossis “muaj txhua yam ntau”. Tus Tswv haivneeg yuav tsum muab qhov muaj nqis ntawm sab ntsujplig saib tseemceeb dua sab nqaij tawv. Phau Pajlug qhia ntau yam txog qhov zoo thaum hwm tus Tswv: Hwm tus Tswv zoo dua muaj txhua yam vim ntawd yog “lub qhovdej cawm txojsia” (Pajlug 14:27) thiab “muaj sia ua neej nyob ntev” (19:23). Hwm tus Tswv yuav ua rau “muaj chaw cia siab” (14:26), muaj kev cia siab (23:17-18) thiab ua neej nyob ntev (Pajlug 10:27) rau Nws haivneeg. Hwm tus Tswv pab kom peb ntxub txojkev txhaum (8:13), tso kev phem tseg (16:6) thiab ua ncaj ncees rau tus Tswv (14:2).
Nquag ua haujlwm, ua ncaj ncees tau npluanuj tsis muaj dabtsi txhaum, vim npluanuj kuj yog ib txoj koob hmoov uas tus Tswv pub: “Txo koj lub hwjchim thiab hwm tus Tswv, koj thiaj yuav muaj txiag npluanuj, muaj koob meej thiab muaj sia ua neej nyob ntev” (Pajlug 22:4). Tiamsis yog muaj txiag npluanuj ua neeg khavtheeb, tsis cia siab rau tus Tswv ces yog ua txhaum, tus Tswv yuav txo cov neeg khavtheeb, “Cov neeg uas tso siab rau lawv txojkev npluanuj yuav poob ib yam li tej nplooj thaum lub caij nplooj ntoos zeeg, tiamsis cov neeg ncaj ncees yuav vammeej ib yam li tej nplooj thaum lub caij nplooj ntoos hlav” (11:28). Yuav tsum paub hais tias, tej khoom txhua yam yuav cawm tsis tau tus neeg txhaum dim hnub txiav txim (11:4); lawv yuav tsis tau txojkev kaj siab (15:16-17) lossis lub koob meej zoo (22:1). Khoom txhua yam nws nyob tsis ntev, hnub no muaj, kaj ntug tas (23:4-5; 27:23-24). Khoom txhua yam yog cov neeg txo hwjchim tus tubqhe tiamsis yog cov neeg khavtheeb tus thawj uas txaus ntshai. Nyiaj txiag yim ntau ces kev txob kev txhawj yim muaj ntau ntxiv.
Tibneeg ntiajteb tamsim no tej kev txawj ntse vammeej heev, tiamsis hais txog kev ua neeg zoo mas tibneeg saib tsis muaj nqis. Vim yog tej khoom txhua yam ua rau tibneeg muaj lub siab tawv li pobzeb, tsis yog tsis txawj sib hlub xwb nws tseem saib lub neej sab ntsujplig tsis tseemceeb thiab. Daim nyiaj hloov ntau tus tibneeg zoo mus ua phem. Thov tus Tswv qhia kom peb paub ua raws li Vajtswv Txojlus qhia: Xaiv qhov muaj nqis nyob ruaj khov ntawm sab ntsujplig heev dua li xaiv tej khoom nyob ib vuag dua mus. Tau khoom tsawg hwm tus Tswv thiaj tau kev kaj siab thiab nyob thajyeeb. Siv zog ua haujlwm thiab zeem paub tej uas yus muaj yog tus Tswv pub. Paub ua tus Tswv tsaug, paub faib pub rau cov kwvtij ntseeg thiab cov tsis tau ntseeg uas raug kev txomnyem.
Thov Vajtswv,
Tus Tswv, nyuam yaus ua Koj tsaug vim koj qhia nyuam yaus paub xaiv yam uas zoo tshaj rau nyuam yaus lub neej. Thov Koj pub kom nyuam yaus paub hwm tus Tswv, paub ua tsaug rau tej khoom uas Koj pub, txaus siab thiab paub faib tej uas nyuam yaus muaj pub rau cov neeg txomnyem. Amees.
Ib tsoom cov mloog uas hmov thiab tshua,
Peb twb xaiv yam uas zoo dua lawm los tsis tau? Nej txhua tus puas tabtom txhawj txog tej nyiaj txiag ua rau yus cia li hnov qab qhov tseemceeb ntawm sab ntsujplig thiab tsis muaj lub siab hwm tus Tswv?
Nyeem Vajluskub hauv peb lub xyoo: Nehemis 11
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
