Klei Aê Diê Blŭ: Y‑Mathiơ 9:35
Êlan kliăng: “Yêsu hiu hlăm jih jang ƀuôn prŏng ƀuôn điêt, bi hriăm hlăm sang bi kƀĭn, leh anăn mtô klei mrâo mrang jăk kơ ƀuôn ala mtao, leh anăn bi hlao djăp mta klei ruă duam.” (Y‑Mathiơ 9:35).
Klei êmuh ksiêm mĭn: Ya klei Khua Yang Yêsu ngă hlăk Ñu hiu hlăm jih jang ƀuôn prŏng ƀuôn điêt? Ya klei yuôm bhăn leh anăn bruă klam mơ̆ng klei bi hlao klei ruă duam hlăm bruă Khua Yang Yêsu ngă? Ya klei drei bi mklă leh hriăm kơ bruă Khua Yang Yêsu ngă leh?
Hlăm kdrêč Khua ƀĭng kna Y‑Mathiơ klah čŭn kơ bruă Khua Yang Yêsu ngă leh ti Galilê, hruê mbruê drei hriăm leh kơ dŭm anôk Khua Yang nao leh leh anăn mă bruă kơ Ñu nao hlăm klei bi kƀĭn leh anăn bi hriăm hlăm dŭm Sang bi kƀĭn.
Bruă tal tlâo Khua Yang Yêsu ngă jing “mtô klei mrâo mrang jăk kơ ƀuôn ala mtao”, boh blŭ “mtô” jing hưn Klei Mrâo Mrang Jăk kơ lu mnuih hmư̆. Hlăk nao ti jih jang ƀuôn prŏng, ƀuôn điêt, Khua Yang Yêsu hiu hưn Klei Mrâo Mrang Jăk Aê Diê kyua Ñu čiăng grăp čô mnuih dưi hmư̆ Klei Mrâo Mrang Jăk kơ Ƀuôn ala mtao, thâo ya bruă ngă čiăng dưi mŭt hlăm Ƀuôn ala mtao. Khua Yang Yêsu mtô Klei Mrâo Mrang jăk amâo djŏ knŏng hlăm sang bi kƀĭn ôh, ƀiădah Ñu mtô Klei Mrâo Mrang Jăk Ƀuôn ala mtao hlăm ti anôk Ñu nao msĕ si sang mnia, hang êa ksĭ, jơ̆ng čư̆, sang hjăn…
Bruă tal pă jing Khua Yang Yêsu bi hlao lu klei ruă duam. Hdră kñăm mơ̆ng bruă bi hlao klei ruă duam jing čiăng bi êdah klei myang Aê Diê, bruă bi hlao klei ruă duam mbĭt hŏng klei mtô leh anăn bi hriăm čiăng bi mklă kơ klei mtang Ƀuôn ala mtao. Khua Yang Yêsu amâo mjhua ôh bruă mdrao hlao klei ruă duam ăt msĕ mơh amâo yua ôh klei mdrao hlao čiăng hưn kơ Ñu pô. Hlăm dŭm klei yăl dliê kơ klei mdrao hlao, phung dưi bi hlao hlăm kđeh ăt mâo klei bi hlao hlăm mngăt, boh phŭn bruă Khua Yang Yêsu ngă jing amâo djŏ mdrao hlăm kđeh asăr ôh ƀiădah ba klei bi mtlaih kơ mngăt.
Tui hlue leh anăn ngă msĕ si Khua Yang Yêsu, phung đaŏ kơ Krist hruê anei brei ba yua djăp klei găl čiăng hiu hưn Klei Mrâo Jăk Aê Diê kơ phung riêng gah drei, phung mă bruă mbĭt hlăm knơ̆ng bruă, sang mkra mjing, hriăm sa boh adŭ, sang hră…, anăn jing dŭm klei găl jăk čiăng hiu hưn Klei Mrâo Mrang Jăk. Ai tiê phung hiu hưn ăt ktang leh anăn jhŏng kyua klă sĭt pô thâo leh Ƀuôn ala mtao leh anăn srăng hưn kơ Ƀuôn ala mtao kơ lu mnuih thâo.
Hlăm yan klei ruă tưp mrâo êgao, lu mnuih rŭng răng huĭ hyưt kyua klei arưp aram kơ klei hdĭp pô, anei ăt jing mông găl čiăng drei hưn mthâo kơ Khua Yang Yêsu jing Pô bi hlao klei ruă duam, Ñu amâo djŏ knŏng bi hlao hlăm asei mlei kđeh ôh ƀiădah ăt bi hlao hlăm mngăt ai tiê. Sĭt dlăng hlăm ênoh mnuih ƀuôn sang leh anăn ênoh mnuih Việt Nam đaŏ kơ Aê Diê, drei ƀuh adôk lu mnuih ka thâo ôh Khua Yang, mngăt diñu ka dưi bi hlao ôh êlâo kơ Khua Yang lŏ hriê. Akâo kơ Khua Yang mdưm hlăm ai tiê grăp čô drei klei ktrŏ anei čiăng dưi hiu hưn “Klei Mrâo Mrang Jăk Aê Diê” kơ lu mnuih dưi hmư̆ leh anăn dưi mdrao hlao hlăm mngăt.
Drei jhŏng hiu hưn Klei Mrâo Mrang Jăk Aê Diê ba klei bi hlao hlăm mngăt kơ lu mnuih leh mơh ka?
Wah lač: Ơ Khua Yang! Akâo kơ Ih mdưm hlăm ai tiê kâo bruă klam kơ phung ka dưi hmư̆ Klei Mrâo Mrang Jăk, čiăng kâo jhŏng hiu hưn Klei Mrâo Mrang Jăk bi mtlaih lu phung soh tui hlue si Pô Bi Mtlaih Khua Yang Yêsu ênuk đưm.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y‑Nêhêmi 9:38-10:39
Kênh Youtube BHKTHN:
