Mathais 9:35
35 Yexus mus txhua nrho hauv tej nroog thiab hauv tej zos. Nws qhuab qhia hauv tej tsev sablaj, nws qhia Txojmoo Zoo uas hais txog Vajtswv lub Tebchaws, thiab kho tej neeg uas muaj mob, txawm yog tus mob licas los Yexus kho tau zoo huv tibsi.
Lus nug rau sawvdaws xav:
– Tswv Yexus ua dabtsi thaum Nws mus hauv tej nroog thiab tej zos?
– Lub ntsiab thiab qhov tseemceeb ntawm Tswv Yexus tes haujlwm kho mob yog dabtsi?
– Peb muaj kev txiav txim siab li cas thaum peb kawm paub tej haujlwm Tswv Yexus ua?
Ib tsoom cov mloog txhua tus,
Nyob hauv yam xub thawj uas Timthawj Mathais sau txog Tswv Yexus tej haujlwm uas Nws ua nyob cheebtsam Kalilais, nag hmo peb twb kawm txog tej chaw Tswv Yexus mus, Yexus kev mus pehawm thiab qhia hauv tej tsev sablaj lawm.
Tes haujlwm tim peb uas Tswv Yexus ua txuas ntxiv yog “qhia Txojmoo Zoo uas hais txog Vajtswv lub Tebchaws”, lo lus “qhia” txhais hais tias tshajtawm txojlus rau txhua tus tau hnov. Thaum mus txhua nrho tej nroog thiab tej zos, Tswv Yexus qhia Txojmoo Zoo uas hais txog Vajtswv lub Tebchaws rau txhua tus hnov, vim Nws xav kom txhua tus tibneeg puavleej tau hnov tej xov zoo uas hais txog Vajtswv lub Tebchaws thiab paub txojkev yuav mus rau hauv lub Tebchaws ntawd. Tswv Yexus tsis yog qhia Txojmoo Zoo hauv tej tsev sablaj xwb, tiamsis Nws qhia Vajtswv lub Tebchaws rau txhua qhov chaw uas Nws mus txog zoo li tej kiab khw, ntawm ntug hiavtxwv, saum tej laj roob, hauv tej tsev uas muaj neeg txoos ua ke.
Tes haujlwm tim plaub yog Tswv Yexus kho cov neeg muaj mob ntau yam zoo. Lub homphiaj uas tus Tswv kho mob yog qhia tawm Vajtswv lub hwjchim, tes haujlwm kho mob mus ua ke nrog kev qhia txog qhia txog Vajtswv lub tebchaws, vim thaum kho mob zoo yog timkhawv qhia tshwm txog lub fwjchim ntawm Vajtswv lub tebchaws. Tswv Yexus tsis yog muab tes haujlwm kho mob lossis siv kev kho mob zoo los khav txog Nws tus kheej. Nyob hauv cov zaj lus uas hais txog kev kho mob, tus neeg uas tau txais kev zoo mob sab nqaij tawv, lawv kuj tau txais kev hloov los ntawm sab ntsujplig. Qhov tseemceeb ntawm Tswv Yexus tes haujlwm tsis yog kho kom zoo mob sab nqaij tawv xwb tiamsis ua kom cawm tau tus ntsujplig dim.
Xyaum Tswv Yexus tus qauv thiab ua li Nws ua, cov ntseeg Yexus nimno yuav tsum siv txhua lub sijhawm kom qhia tau Txojmoo Zoo uas hais txog Vajtswv lub Tebchaws rau cov neeg uas nyob ibncig yus, cov neeg nrog yus ua haujlwm ua ke hauv tej tsev ua haujlwm thiab hauv tsev kawm ntawv… ntawd yog tej lub sijhawm zoo uas yuav qhia tau Txojmoo Zoo. Tus neeg qhia Txojmoo Zoo yuav tsum muaj lub siab kub lug thiab ua siab tawv qhawv rau qhov yus twb paub Vajtswv lub Tebchaws lawm thiab txaus siab hlo qhia lub tebchaws ntawd rau lwm tus.
Nyob hauv ncua sijhawm muaj kab mob kis dhau los, ntau tus tibneeg txhawj ntshai txog kev tas simneej, yog lub sijhawm zoo qhia txog Tswv Yexus yog tus kws tshuaj uas yuav kho tau sawvdaws tej mob zoo. Tswv Yexus tsis yog kho sab nqaij tawv xwb, tiamsis tseem kho sab ntsujplig huv tibsi thiab. Thaum saib rau tej tibneeg tibneeg thiab cov ntseeg Yexus uas nyob hauv tebchaws Viet Nam, peb pom hais tias tseem muaj coob leej tsis tau paub txog tus Tswv, lawv sab ntsujplig cheemtsum tau tus Tswv kho ua ntej hnub uas Tswv Yexus rov qab los. Thov tus Tswv pub rau peb muaj lub siab kub lug tawm mus qhia “Txojmoo Zoo uas hais txog Vajtswv lub Tebchaws” rau ntau leej tau hnov thiab tau txais kev zoo mob ntawm sab ntsujplig.
Thov Vajtswv,
Tus Tswv, thov Koj qhia kom nyuam yaus muaj lub siab hlub txog cov neeg uas tsis tau hnov Koj Txojmoo Zoo. Thov Koj pub kom nyuam yaus muaj lub siab tawv mus qhia Koj Txojmoo Zoo kom cawm ntau leej raws li Tswv Yexus tus qauv thaum ub Nws ua. Amees.
Ib tsoom cov mloog uas hmov thiab tshua,
Peb puas tau ua lub siab tawv qhawv tshajtawm Txojmoo Zoo uas hais txog Vajtswv lub Tebchaws, coj txojkev kho sab ntsujplig mus rau lwm tus lawm los tsis tau?
T Nyeem Vajluskub hauv peb lub xyoo: Nehemis 9:38-10:39
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
