Klei Aê Diê Blŭ: Klei Mphŭn Dơ̆ng 4:6-7
Êlan kliăng: “Tơdah sa čô tuôm hŏng klei mplư, đăm brei ñu lač ôh, “Aê Diê yơh mplư kâo;” kyuadah klei jhat amâo dưi mplư Aê Diê ôh, leh anăn Aê Diê pô amâo tuôm mplư arăng ôh. Ƀiădah grăp čô mnuih mâo klei mplư tơdah klei ñu pô tluh hrip leh anăn mdluh ñu. Tơdah klei tluh hriê kơ prŏng, ñu kkiêng kơ klei soh; tơdah klei soh hriê kơ prŏng, ñu bi truh klei djiê.” (Y‑Yakơ 1:13-15).
Klei êmuh ksiêm mĭn: Ya klei Aê Diê hưn êlâo kơ Y‑Kain brei răng? Ya klei mñă kơ drei mơ̆ng klei hriăm anei?
Jih jang phung hlăm sang amâo mâo pô thâo ôh ai tiê klei mĭn Y‑Kain dôk ăl ngêñ, ƀiădah amâo mâo sa mta klei dưi mdăp hŏng Khua Yang ôh, Ñu êmuh Y‑Kain: “Si ngă ih ăl leh anăn ƀô̆ mta ih ktrŏ?” (êlan 6). Klei êmuh anăn amâo djŏ čiăng kơ Y‑Kain wĭt lač kơ Ñu ôh ƀiădah čiăng kơ Y‑Kain wĭt lač kơ ñu pô. Khua Yang čiăng lač kơ Y‑Kain snei: “Diih jing phung kkuh mpŭ, ƀiădah Kâo jing Pô diih kkuh mpŭ, leh anăn knŏng hjăn păn Kâo jing Pô mâo klei dưi čuăn kơ klei diih kkuh mpŭ, Pô čuăn mă tŭ klei hlei pô kkuh mpŭ. Hlei ih jing ƀiădah jhŏng dôk ti anăp Kâo blŭ kơ klei mtăp mđơr?” (Y‑Yôp 41:2; 42:3). Năng ai kyua klei mgao ngă kơ Y‑Kain wơr bĭt hĕ ñu jing anak mnuih tal êlâo hĭn kkiêng hlăm djuê ana phung mnuih soh, leh anăn drei amâo dưi ngă sa mta klei čiăng dưi jing kpă ênô ti anăp Aê Diê ôh. Brei drei hdơr nanao Aê Diê mâo klei dưi ngă tui si Ñu čiăng leh anăn amâo mâo ôh pô mâo klei dưi brei Ñu ngă tui si klei drei čiăng.
Klei mgao ăt ngă mơh kơ Y‑Kain jing mnuih mluk mgu, amâo thâo săng ôh Aê Diê amâo tŭ mnơ̆ng ñu myơr amâo djŏ ôh Aê Diê hngah kơ ñu. Tơdah hngah kơ ñu ya ngă Aê Diê lŏ duah ñu leh anăn hưn êlâo brei ñu răng? Klei mgao bi bum ală ñu, amâo thâo kral ôh bruă ñu ngă jing soh (êlan 7a). Mnuih mgao yap ñu pô yơh jing phŭn kyuanăn kƀah klei thâo săng hŏng klei Aê Diê hưn mdah ƀiădah thâo săng snăk kơ klei ñu pô mĭn jing klei bi êka ai tiê ñu. Diñu jing hĕ mluk mgu kyuadah gĭr dŏng mgang diñu pô.
Amâo djŏ knŏng dŭm năn ôh, Aê Diê ăt hưn êlâo brei ñu răng kơ Satan dôk kăp nanao čiăng ksŭng blah leh anăn lun ƀơ̆ng Y‑Kain (êlan 7b). Ñu amâo dưi thâo ôh knŏng sa klei mĭn soh wê ƀiădah atăt ñu truh kơ boh tŭ klei mmăt jŭ jhat êdimi. Năng ai amâo mâo ôh pô mĭn klei soh bi mdjiê mnuih tal êlâo hĭn kčưm hŏng klei myơr mnơ̆ng ngă yang! Yang jhat ksŭng blah wăt êjai drei dôk kkuh mpŭ leh anăn êjai dôk mă bruă kơ Aê Diê!
Aê Diê brei Y‑Kain thâo wăt tơdah tŭ klei Satan ksŭng blah dưn ƀiădah “brei ih dưi hŏng ñu” (êlan 7b). Blŭ mdê hĭn, Y‑Kain ngă soh kyuadah ñu amâo dưi kiă kriê ai tiê ñu pô, đăm mplĕ êlư kơ klei Aê Diê amâo tŭ mnơ̆ng ñu myơr ngă yang ôh, kăn mplĕ kơ Y‑Aƀel, amâodah wăt mplĕ kơ Satan rei! Grăp čô brei tŭ bruă klam kơ klei soh drei pô ngă leh (Y‑Yakơ 1:13-15), tơdah amâo hưn ôh klei soh pô leh anăn amâo kmhal ôh snăn amâo srăng mâo klei pap brei klei soh ôh.
Si ngă drei thâo săng klei Khua Yang hưn êlâo brei răng leh anăn djăl kmhal kơ klei soh mtam mơ̆?
Wah lač: Ơ Khua Yang, akâo kơ Ih đru kâo thâo săng klei Ih hưn êlâo kơ kâo brei răng, leh anăn grăp blư̆ kâo ngă soh akâo kơ Khua Yang pap brei kơ klei awăt kâo leh anăn brei kơ kâo ai tiê luă gŭ thâo kmhal kơ klei soh leh anăn lŏ bi mrâo klei bi mguôp hŏng Ih.
Dlăng Klei Aê Diê Blŭ hlăm tlâo thŭn: Y‑Êsra 10:1-17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
