II-Xwmtxheej Vajntxwv 9:13-21
Nqe cim:
“Kuv yog tus uas muaj hwjchim yau dua Vajtswv haivneeg txhua tus huv tibsi los Vajtswv tseem muab Txojmoo Zoo uas hais txog Yexus Khetos txoj koob hmoov uas tsimtxiaj kawg nkaus rau kuv coj mus qhia lwm haivneeg” (Efexus 3:8).
Lus nug rau sawvdaws xav:
- Vajntxwv Xalumoos sau ib xyoo tau kub ntau npaum li cas?
- Vajntxwv siv tej kub ua dab tsi?
- Vajntxwv npluanuj los ntawm dab tsi?
- Los ntawm dab tsi peb thiaj npluanuj sab ntsujplig thiab tau lub neej zoo tsis paub kawg?
- Yuav ua li cas thaum paub hais tias peb npluanuj hauv Yexus Khetos?
Ntu Vajluskub hnub no hais txog vajntxwv Xalumoos kev npluanuj. Ib xyoo twg Xalumoos sau tau kub txog 670 choj uas yog muaj li 25 tas, tsis xam kev sau tau ntawm lwm yam khoom txawv. Vajntxwv siv tej kub mus ntaus ua 500 daim thaiv hniav ntaj uas tsis yog siv mus ntaus rog, tiamsis yog cia ua kev qhia hais tias nws npluanuj. Vajntxwv muab kaus ntxhw los ua ib lub zwmtxwv muaj rau theem qib ntai thiab 12 tus tsov ntxhuav sawv ob sab ntawm tej theem. Lub zwmtxwv qhia txog lub chaw zaum muaj plhus ntxiag, chaw ruaj khov thaum vajntxwv ua haujlwm tswj tebchaws. Duab tsov ntxhuav qhia txog vajntxwv lub tsev thiab fwjchim kav. Tas nrho tej cuabyeej siv hauv Chav tsev Havzoov Lanpanoos puavleej muab kub ua los, qhia txog vajntxwv kev npluanuj. Peb xyoo twg vajntxwv tej nkoj mus thauj kub, nyiaj dawb, kaus ntxhw, liab thiab yajyuam hauv lwm lub tebchaws los rau nws.
Vajntxwv Xalumoos kev npluanuj tau muab sau hais meej heev yog xav muab los qhia txog Vajtswv tus uas npluanuj kawg nkaus, Nws yog tus uas pub rau Xalumoos npluanuj. Vajntxwv Xalumoos tsuas yog ib tug vajntxwv uas tau Vajtswv tsa ua vajntxwv pub rau Vajtswv xwb (II-Xwmtxheej Vajntxwv 9:8). Nim no peb muaj ib tug Vajntxwv ntawm tej vajntxwv uas npluanuj tshaj vajntxwv Xalumoos ntau npaug. Vajntxwv Xalumoos kev npluanuj tsuas nyob ib pliag hauv lub ntiajteb no xwb, tiamsis Tswv Yexus kev npluanuj yog muaj nyob mus ibtxhis. Thaum vajntxwv Xalumoos uas neej nyob, nws tau ua lub neej zoo siab nrog nws kev npluanuj, tiamsis Yexus Khetos muab Nws kev npluanuj tso tseg. Yexus Khetos tsis khaum taw zaum muaj plhus ntxiag saum lub zwmtxwv kub, siv tej cuab yeej muab kub ua thiab tsis nyob saib tej tsiaj zoo nkauj lossis tsuas ua neej nrog kev npluanuj, tiamsis Yexus tau los rau hauv lub ntiajteb ua lub neej li ib tug tub qhe, muab Nws txojsia los txhiv peb. “Rau qhov nej yeej paub hais tias peb tus Tswv Yexus Khetos hlub peb kawg li. Txawm yog Nws yog tus uas npluanuj los Nws zoo siab los ua tus uas pluag. Nws ua li ntawd twb yog Nws xav pab nej kom nej ua tau neeg npluanuj” (II-Kauleethaus 8:9).
Vim npluanuj ntawm txojkev hlub uas pub dawb hauv Yexus Khetos peb thiaj tau txais kev zam txim, tau cawmdim thiab tau ib puas tsav yam koob hmoov zoo saum ntuj ceebtsheej los ua peb tug, vim peb nrog Yexus koom ib txojsia (Efexus 1:3-14). Kev npluanuj hauv tebchaws ceebtsheej tom ntej yog peb yuav tau mus txog hauv lub nroog Yeluxalees tshiab peb yuav muaj kev npluanuj uas xav tsis thoob vim tej ntawd peb tsis tau paub lossis tsis tau pom dua (Tshwmsim 21:21). Yog li ntawd, peb yuav tsum paub txaus siab, zoo siab, kaj siab, cia siab, muaj kev hlub thiab muaj Vaj Ntsujplig lub fwjchim nyob hauv peb, thiab qhia Yexus Khetos kev npluanuj rau peb cov neeg.
Peb puas pom hais tias peb npluanuj hauv Yexus Khetos?
Thov Vajtswv,
Tus Tswv, nyuam yaus ua Koj tsaug vim kev hlub Yexus Khetos thiaj tso txhua yam tseg los ua kom nyuam yaus npluanuj hauv sab ntsujplig. Thov Koj pab nyuam yaus paub nco Koj txiajntsig thiab qhia Koj kev npluanuj pub rau tej neeg sawvdaws. Amees.
Nyeem Vajluskub hauv peb lub xyoo: II.Xwmtxheej Vajntxwv 32:32-33:25
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
