Klei Aê Diê Blŭ: II Klei Yăl Dliê 9:13-21
Êlan kliăng: “Wăt tơdah kâo jing pô điêt hĭn kơ jih jang phung doh jăk, Ñu brei klei pap anăn kơ kâo, čiăng brei kâo mtô kơ phung tue klei mrâo mrang jăk klei mdrŏng Krist amâo dưi mkă ôh” (Êphêsô 3:8).
Klei êmuh ksiêm mĭn: Dŭm ênoh mah Mtao Y‑Salômôn mâo hlăm grăp thŭn? Ya bruă mtao yua mah? Mơ̆ng klei mtao mâo klei mdrŏng? Ya drei ngă leh thâo pô dưi mâo klei mdrŏng hlăm Krist?
Trăn Klei Aê Diê hruê anei lač kơ klei mdrŏng Mtao Y‑Salômôn. Grăp thŭn mtao mâo 670 talăng mah (jing êbeh 20 ton) êngao kơ dŭm ênoh hrui wĭt mkăn. Mtao yua ênoh mah anei pioh ngă 500 boh khil, amâo djŏ yua pioh nao bi blah ôh ƀiădah yua hlăm dŭm klei bhiăn leh anăn bi êdah klei mdrŏng sah. Mtao ngă sa boh jhưng mtao prŏng hŏng mla, leh anăn luôm gơ̆ hŏng mah doh hŏng pluh dua rup êmông gu dôk dơ̆ng dua nah. Jhưng bi êdah anôk dôk jăk, kjăp sĭt mtao dôk gŭ tinăn kiă kriê ala čar. Êmông gu jing klei bi hmô kơ sang mtao leh anăn klei dưi. Jih jang mnơ̆ng yua pioh mnăm êa leh anăn mnơ̆ng yua hlăm Sang Kmrơ̆ng Čar Liƀan dưi ngă hŏng mah brei ƀuh klei mdrŏng sah mơ̆ng mtao. Tlâo thŭn sa blư̆, kŭm păn hiu bliư̆ mnia nao hlăm êa ksĭ mơ̆ng mtao ba wĭt lu mah, prăk, mla, kuêñ, leh anăn amrak.
Klei mdrŏng sah Mtao Y‑Salômôn yap ƀhĭ klĭ tinei jing kñăm čiăng lač kơ klei mdrŏng sah Aê Diê amâo mâo knhal, Pô brei kơ ñu klei mdrŏng sah. Mtao Y‑Salômôn knŏng jing sa čô mtao Aê Diê dưm đĭ jing mtao čiăng ngă mtao kơ Ñu đuč (II Klei Yăl Dliê 9:8). Hruê anei, drei mâo sa čô Mtao kơ phung mtao, mdrŏng hĭn kơ Mtao Y‑Salômôn lu snăk. Klei mdrŏng Mtao Y‑Salômôn knŏng mâo êjai ti lăn ala anei đuč ƀiădah klei mdrŏng mơ̆ng Krist jing lă lar. Mtao Y‑Salômôn hlăk dôk hdĭp mâo leh klei mdrŏng sah, ƀiădah Krist lui leh klei mdrŏng sah Ñu. Ñu amâo dôk êyŏng jơ̆ng ti jhưng mtao hŏng mah ôh, mnăm êa hlăm kčok mah ôh, dlăng čĭm čap, hlô mnơ̆ng, dôk hlăm klei mdrŏng sah kơ hjăn pô ôh ƀiădah Ñu hriê leh ti lăn ala jing sa čô mă bruă, jao klei hdĭp Ñu kơ drei. “Kyuadah diih thâo leh klei pap Khua Yang drei Yêsu Krist: wăt tơdah Ñu jing mdrŏng, ăt Ñu bi ƀun Ñu pô kyua diih, čiăng kơ hŏng klei Ñu ƀun ƀin, diih dưi jing mdrŏng” (II Kôrantô 8:9)
Kyua klei mdrŏng kơ klei pap leh anăn klei khăp Krist drei dưi mâo klei pap, klei bi tui, dưi brei djăp klei jăk yuôm bhăn hlăm Khua Yang Yêsu Krist (Êphêsô 1:3-14), dưi dưn klei mdrŏng mơ̆ng ƀuôn ala mtao êdei ênăp sĭt mŭt hlăm ƀuôn Yêrusalem mrâo jing anôk mâo lu klei jăk hĭn kơ klei drei thâo (Klei Bi Êdah 21:21). Kyua anăn, drei čiăng mâo klei jăk mơak, êđăp ênang, čang hmăng, klei khăp, klei pap leh anăn klei myang mơ̆ng Yang Mngăt Jăk kiă kriê hlăm drei, leh anăn hiu hưn nanao klei mdrŏng sah amâo mâo knhal mơ̆ng Krist kơ jih jang mnuih.
Drei ƀuh pô mdrŏng mơ̆ hlăm Krist?
Wah lač: Ơ Khua Yang, kâo bi mni lač jăk kơ Ih kyua djăp klei jăk leh anăn klei mdrŏng klei hdĭp mngăt hlăm Krist kâo dưi mâo kyua klei Ih săn leh asei. Akâo kơ Ih đru kâo thâo hdơr knga kơ Aê Diê leh anăn hiu hưn klei mdrŏng sah amâo knhal Aê Diê kơ lu mnuih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 32:32 – 33:25
Kênh Youtube BHKTHN:
