Klei Aê Diê Blŭ: Y‑Luk 1:74-80
Êlan kliăng: “Bi ih, Ơ anak điêt, arăng srăng pia ih khua pô hưn êlâo kơ Pô Ti Dlông Hĭn, kyuadah ih srăng êbat ti anăp Khua Yang čiăng mkra êlan Ñu” (Y‑Luk 1:76).
Klei êmuh ksiêm mĭn: Hlăm klei mmuñ ñu bi mni, ya “klei pap” Y‑Sakari lač Aê Diê ƀuăn brei kơ găp djuê Y‑Abraham? Ya tlâo mta klei yuôm bhăn brei Y‑Yôhan hiu hưn? Ya klei jăk drei mă tŭ mơ̆ng Aê Diê? Si diih dôk mă bruă kơ Aê Diê?
Leh Y‑Sakari lač kơ Pô Bi Mtlaih hlăm klei ñu mmuñ bi mni (Y‑Luk 1:67-73), ñu lŏ dơ̆ng lač kơ dŭm “klei pap” Aê Diê ƀuăn brei kơ djuê ana Y‑Abraham. Boh blŭ “klei pap” hlăm êlan 74 jing klei dưi mă bruă kơ Aê Diê. Leh Aê Diê ngă bruă bi tui phung ƀuôn sang Ñu snăn diñu dưi êngiê mă bruă kơ Aê Diê, amâo lŏ mâo klei dưi bi kgăn diñu ôh. Phung dưi bi tui srăng hdĭp klei hdĭp kpă ênô leh anăn doh jăk ti anăp Aê Diê, diñu jhŏng nao ti anăp Aê Diê čiăng mă bruă kơ Ñu.
Y‑Sakari thâo kral anôk bruă yuôm bhăn leh anăn bruă klam prŏng prĭn mơ̆ng anak ñu jing Y‑Yôhan hlăm klei jing khua pô hưn êlâo kơ Pô Ti Dlông Hĭn, Y‑Yôhan srăng mkra êlan kơ bruă ngă Khua Yang Yêsu “čiăng brei kơ phung ƀuôn sang Ñu klei thâo săng kơ klei bi mtlaih hŏng klei pap brei klei soh diñu” (êlan 77). Tlâo klei yuôm bhăn mơ̆ng khua pô hưn êlâo Y‑Yôhan hưn anăn jing Aê Diê Pô Bi Mtlaih srăng ba “Klei Mngač”, “Klei Hdĭp”, leh anăn “Klei Êđăp Ênang” (êlan 78-79), jih jang dŭm klei anei dưi ba kơ anak mnuih kyua klei Aê Diê pap.
Hruê anei, mâo lu phung đaŏ dlăng klei mă bruă kơ Aê Diê jing bruă ktrŏ, luč lu hruê mmông ƀiădah amâo ba ôh klei tŭ dưn kơ pô; đa đa mkăn snăn tĭng yap hŏng Aê Diê, brei bi mâo klei tŭ dưn kơ pô sĭt mă bruă kơ Aê Diê; đa đa snăn mă bruă kơ Aê Diê hŏng ai tiê “ngă bruă jăk” kơ Sang Aê Diê. Tơdah mă bruă hŏng ai tiê msĕ snăn, si drei dưi mmuñ bi mni kơ klei jăk mơak kơ klei pap Aê Diê brei leh. Brei drei wĭt hŏng hruê Noel tal êlâo čiăng thâo sang tơdah Khua Yang Yêsu amâo trŭn hriê čiăng bi mtlaih phung drei mơ̆ng klei soh snăn drei amâo srăng mâo klei êngiê dưi kkuh mpŭ leh anăn mă bruă kơ Ñu ôh. Tơdah Aê Diê amâo bi doh phung drei leh anăn yap drei kpă ênô snăn drei amâo srăng djăp hnơ̆ng čuăn čiăng dưi mă bruă kơ Aê Diê ôh. Tơdah amâo djŏ kyua klei pap brei leh anăn klei Aê Diê bi mtlaih, drei amâo srăng thâo kral ôh “Klei Mngač, “Klei Hdĭp”, leh anăn “Klei Êđăp Ênang. Khua Yang Yêsu čiăng phung drei dưi jăk mơak hlăm Khua Yang leh anăn hlăm klei mă bruă kơ Ñu, Khua Yang ăt čiăng drei ba phung luč klei čang hmăng, rŭng răng wĭt kơ Khua Yang čiăng dưi thâo klei jăk mơak. Aê Diê lač leh hlăm Klei Mrâo Mrang Jăk Y‑Markôs 16:15 snei, “…Nao bĕ tar ƀar lăn ala leh anăn mtô klei mrâo mrang jăk kơ jih jang găp djuê mnuih.” Akâo kơ Aê Diê brei grăp čô phung drei jing phung khua pô bi ala đru kơ phung mkăn wĭt hŏng Khua Yang leh anăn thâo klei jăk mơak hlăm Pô Bi Mtlaih Khua Yang Yêsu.
Drei dôk hơ̆k mơak leh anăn jăk mơak mơ̆ kyua dưi mă bruă kơ Aê Diê?
Wah lač: Ơ Khua Yang, akâo kơ Ih đru kâo thâo hdơr knga kơ Ih kyua Ih bi mtlaih leh kâo, akâo kơ Ih đru kâo thâo klei jăk mơak sĭt kâo dưi mă bruă kơ Khua Yang čiăng kâo hur har hiu hưn klei jăk mơak yuôm bhăn anei kơ phung riêng gah.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Bruă Mtao 19:29 – 20:21
Kênh Youtube BHKTHN:
