Lukas 1:73-80
73-74 Nws coglus tseg rau peb yawgkoob Anplahas hais tias nws yuav pab kom
peb dim ntawm peb cov yeebncuab txhais tes, thiab yuav pab kom peb muaj siab tawv ua tau nws tes haujlwm tsis ntshai li,
- kom peb ua tau neeg dawbhuv thiab ncaj ncees raws li Vajtswv lub siab nyiam mus tas peb tiam neej.
- Kuv tus metub, sawvdaws yuav hu koj hais tias, koj yog ib tug cev Vajtswv tus uas muaj fwjchim loj kawg nkaus lus. Koj yuav ua tus Tswv ntej mus kho kev tos nws,
- Thiab qhia rau Vajtswv haivneeg, kom lawv paub hais tias, Vajtswv yuav zam lawv lub txim kom lawv dim.
- Rau qhov peb tus Vajtswv yog tus uas hlub peb kawg nkaus. Nws txojkev cawm dim ci tuaj rau peb ib yam li tus duab tshav ntuj ci thaum sawv ntxov,
- thiab yuav ci mus rau txhua tus uas nyob hauv qhov tsaus ntuj uas yog txojkev tuag, thiab yuav coj tau peb mus taug txojkev uas peb yuav tau nyob kaj siab lug.
- Tus metub ntawd loj hlob zoo thiab nws muaj tswvyim heev zuj zus, thiab nws nyob tom roob mojsab qhua mus txog hnub uas nws tawm los rau cov Yixalayees pom.
Nqi cim:
“Kuv tus metub, sawvdaws yuav hu koj hais tias, koj yog ib tug cev Vajtswv tus uas muaj fwjchim loj kawg nkaus lus. Koj yuav ua tus Tswv ntej mus kho kev tos nws” (Lukas 1:76).
Lus nug rau sawvdaws xav:
- Hauv Xakhaliyas zaj nkauj, hais txog tus Tswv txojkev “pab” uas nws tau coglus yuav ua rau Anplahas cov xeebntxwv yog licas?
- Peb yam tseemceeb uas Yauhas Npatitus yuav ua yog dabtsi?
- Peb twb tau txais Vajtswv txojkev “pab” li cas lawm?
- Peb sawvdaws tabtom ua tus Tswv tes haujlwm zoo li cas?
Tom qab uas Xakhaliyas hais txog tus Cawmseej hauv nws zaj nkauj (Lukas 1:67-72), nws rov hais ntxiv txog tej kev “pab” uas tus Tswv coglus tseg rau Anplahas cov xeebntxwv. Lo lus “pab” hauv nqi 73-74 muaj lub ntsiab hais tias tau koob hmoov los ua Vajtswv haujlwm. Thaum tus Tswv ua tes haujlwm cawm nws haivneeg ces lawv muaj kev ywjpheej los ua tus Tswv tes haujlwm, tsis muaj dabtsi yuav thaiv kev. Cov neeg uas dim txim lawm yuav ua lub neej ncaj ncees thiab dawbhuv ntawm Vajtswv xubntiag, lawv muaj lub siab tawv qhawv ua Vajtswv tes haujlwm.
Xakhaliyas paub nws tus tub Yauhas lub meejmom thiab lub luag haujlwm uas ua Vajtswv ib tug tubtxib uas yog kho kev tos tus Tswv los ntawm “qhia rau Vajtswv haivneeg, kom lawv paub hais tias, Vajtswv yuav zam lawv lub txim kom lawv dim” (nqi 77). Peb yam tseemceeb uas Yauhas tus muab neeg ua kevcai raus dej yuav tau uas yog: qhia txog tus Cawmseej coj “qhov kaj”, “txojsia” thiab “kev kaj siab lug” los rau tibneeg (nqi 78-79), tagnrho tej no puavleej yog Vajtswv hlub thiab muab pub rau tibneeg xwb.
Nimno, muaj ntau tus ntseeg Yexus saib kev ua Vajtswv haujlwm yog ib lub nra hnyav thiab poob sijhawm ntau tiamsis tsis muaj nqis rau lawv tus kheej; muaj qee tus ntseeg tseem nrog tus Tswv hais nqi, niaj hnub xam tej nqi zog uas ua Vajtswv haujlwm; muaj ibtxhia ces ua tus Tswv haujlwm muaj lub siab xav ua tus hlob nyob hauv Pawg ntseeg. Thaum muaj lub siab ua haujlwm zoo li no, yuav ua li cas muaj kev kaj siab hu nkauj qhuas tus Tswv txojkev “pab” peb! Cia li tig rov los xav txog zaj Tswv Yexus los yug, kom peb paub hais tias yog tsis muaj Yexus los yug cawm peb tawm hauv txojkev txhaum los, ces peb yuav tsis muaj kev ywjpheej los pehawm Vajtswv thiab ua nws tes haujlwm. Yog tus Tswv tsis ntxuav peb tej kev txhaum thiab suav hais tias peb yog neeg ncaj ncees, ces tsis muaj hnub peb tau cai los ua nws tes haujlwm li. Yog tsis muaj tus Tswv txoj koob hmoov hlub peb, ces peb yuav tsis pom “qhov kaj”, “txojsia”, thiab “nyob kaj siab lug” li. Tswv Yexus xav kom peb muaj txojkev kaj siab nyob hauv nws thiab hauv kev ua nws haujlwm. Tus Tswv xav kom peb coj cov neeg uas tabtom tas kev cia siab thiab qaug zog tig rov los cuag tus Tswv kom tau lubneej kaj siab. Tswv Yexus hais hauv phau Malakaus 16:15 hais tias, “Nej cia li mus thoob plaws lub ntiajteb no thiab qhia Txojmoo Zoo kom sawvdaws hnov”. Thov Vajtswv pab kom peb txhua tus ua tau cov tubtxib mus coj lwm tus los ntseeg Yexus kom muaj lub neej kaj siab lug nyob hauv tus Cawmseej Yexus.
Peb puas muaj kev zoo siab thiab kaj siab thaum tau ua tus Tswv haujlwm?
Thov Vajtswv:
Vajtswv, thov koj pab kom nyuam yaus niaj hnub nco ntsoov koj kev hlub, vim koj tau los cawm nyuam yaus, thov pub kom nyuam yaus muaj lub neej kaj siab thaum tau ua koj tes haujlwm, rau siab ntso qhia txojkev kaj siab uas zoo tshaj plaws no rau tej neeg uas nyob puag ncig nyuam yaus. Ameeg.
Email: kawmvajluskubtxhuahnub@gmail.com
Kênh Youtube BHKTHN:
