Klei Aê Diê Blŭ: Klei Mmuñ Hđăp 100:4
Êlan kliăng: “Mŭt bĕ ti ƀăng jang Ñu hŏng klei hdơr knga, leh anăn hlăm wăl sang Ñu hŏng klei bi mni; hdơr knga kơ Ñu bĕ, mpŭ mni kơ anăn Ñu.” (Klei Mmuñ Hđăp 100:4)
Klei êmuh ksiêm mĭn: Ya jing tlâo klei mtă hlăm êlan 4 leh anăn bi djŏ tuôm mbĭt ti anôk? Ya klei yuôm drei thâo kral kơ klei mpŭ mni leh anăn hdơr knga bi mni kơ Aê Diê? Si drei mă yua mơ̆ng klei mtô anei hlăm Phung Sang Aê Diê drei?
Klei ruă tưp COVID-19 ngă kơ phung anak ƀuôn sang Aê Diê kkuh mpŭ ti sang pô hŏng êlan mđung asăp mdah rup, leh anăn tơdah hlăk Sang Aê Diê dưi lŏ pŏk, mâo lu phung đăo kyua klei mưng amâodah kyua klei găl jăk ênưih kơ pô,… snăn amâo lŏ khăp čiăng nao bi kƀĭn ti Sang Aê Diê ôh. Klei Mmuñ Hđăp 100:4 hưn mdah tlâo klei mtă mtrŭn ti knhal tuč snei: “Mŭt bĕ ti ƀăng jang ñu”, “hlăm wăl sang ñu”, leh anăn “hŏng klei bi mni; hdơr knga kơ Ñu bĕ, mpŭ mni kơ anăn Ñu”. Klei mtă mtrŭn anei kñăm ktang kơ klei brei phung anak ƀuôn sang Aê Diê bi kƀĭn kkuh mpŭ kơ Ñu. Klei Aê Diê Blŭ amâo lăm ôh klei yuôm kkuh mpŭ leh anăn hdơr knga bi mni kơ Aê Diê hjăn pô, ƀiădah tinei čiăng lač klei mdê hĭn kơ klei phung anak ƀuôn sang Aê Diê mđrăm mbĭt kkuh mpŭ leh anăn hdơr knga bi mni kơ Ñu. Klei anei ăt jing jar bi hmô kơ Phung Sang Aê Diê ênuk Klei Bi Mguôp Mrâo mơh (Bruă Phung Khua Ƀĭng Kna 2:42-47), leh anăn ăt jing mmông găl čiăng kơ drei ngă sa mta bruă mkăn hlăm klei kkuh mpŭ jing bi mă bruă kơ hdơ̆ng drei msĕ mơh (Klei Mmuñ Hđăp 100:3), bi mkŏ mdơ̆ng, bi đru rŭ, leh anăn bi mtô lač hdơ̆ng pô hlăm klei đăo (Kôlôs 3:16). Kyuanăn, klei ruă tưp COVID-19 mñă bi hdơr kơ drei tơdah adôk mâo myun dưi mđrăm mbĭt kkuh mpŭ kơ Aê Diê hŏng klei hơ̆k mơak mbĭt hŏng ayŏng amai adei drei, snăn brei drei djă păn mtam mmông găl anăn kyuadah mmông găl msĕ snăn srăng ƀrư̆ hruê ƀrư̆ hrŏ hĭn êjai (Êphêsô 5:16).
“Hdơr knga…” – boh blŭ anei čiăng lač kơ klei hưn mdah, mmuñ bi mni, thâo săng, hơêč hmưi, leh anăn hdơr knga bi mni. Snăn “hdơr knga bi mni” amâo djŏ ôh knŏng jing klei lač jăk mang msĕ yang đar, ƀiădah jing klei hưn mdah čêč drêč klă mngač ya mta klei Aê Diê ngă leh kơ drei. Jhŏng hưn bi sĭt ti anăp Phung Sang Aê Diê, ti anăp găp djuê amâodah mah jiăng kơ klei pap, klei jăk drei mă tŭ leh Aê Diê ngă kơ drei: klei bi mtlaih, klei bi mlih mrâo, klei êđăp ênang, klei hơ̆k mơak, klei kiă kriê, răng mgang, klei bi hlao hlăm klei hdĭp mngăt myang wăt klei hdĭp kđeh…
“Bi mni…” – boh blŭ anei čiăng lač kơ klei pŭ yưl, hưn ktưn. Grăp čô drei brei khăp čiăng hưn bi êdah Pô drei kkuh mpŭ, hưn bi kraih klei jăk Aê Diê. Ya mta klei arăng dôk hmư̆ leh anăn ƀuh mơ̆ng klei hdĭp drei? Brei arăng ƀuh klei drei hơ̆k mơak bi êdah hŏng klei mmuñ, leh anăn klei blŭ hưn bi sĭt kơ klei prŏng yuôm bhăn leh anăn klei jăk Aê Diê drei dôk kkuh mpŭ.
“Mpŭ mni kơ anăn Ñu” – boh blŭ anei čiăng lač kơ klei čuôn kơŭt, mmuñ bi mni, kkuh hŏng klei mpŭ. Kkuh mpŭ jing bruă ngă bi êdah klei mpŭ mđĭ leh anăn krưp mpŭ kơ Aê Diê, hưn mdah Anăn Ñu jing dlông hĭn kơ jih jang anăn mkăn. Kkuh mpŭ kơ Aê Diê hlăm Sang Yang amâo djŏ ôh čiăng bi êdah klei thâo knhâo pô amâodah tui duah čiăng arăng bi mni kơ pô, ƀiădah kñăm pioh knŏng hjăn kơ Aê Diê leh anăn myơr klei guh kơang kơ Ñu.
Si ngă drei khăng myơr klei hdơr knga mpŭ mni kơ Aê Diê mđrăm mbĭt hŏng Phung Sang Aê Diê mơ̆?
Wah lač: Ơ Khua Yang, găn lu klei dleh dlan hlăm klei hdĭp, akâo kơ Khua Yang brei kâo djă pioh ai tiê sĭt suôr mbĭt hŏng phung anak ƀuôn sang Ih hlăm klei kkuh mpŭ, mpŭ mni leh anăn hdơr knga bi mni kơ Ih nanao.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Bruă Mtao 1:32-2:12
Kênh Youtube BHKTHN:
https://www.youtube.com/c/bhkthn
