Klei Aê Diê Blŭ: I Kôrantô 15:9-10a
Êlan kliăng: “Ƀiădah hŏng klei Aê Diê pap kâo jing msĕ si kâo jing anei, leh anăn klei Ñu pap kơ kâo amâo jing hơăi mang ôh. (I Kôrantô 15:10a).
Klei êmuh ksiêm mĭn: Ya ngă khua ƀĭng kna Y‑Pôl lač pô jing điêt hĭn kơ jih jang, amâo năng ôh arăng pia jing khua ƀĭng kna? Leh Khua Yang bi mtlaih, ya bruă khua ƀĭng kna Y‑Pôl ngă leh čiăng kơ klei pap Aê Diê brei leh kơ ñu amâo djŏ jing hơaĭ mang ôh? Ya klei bi mklă bi êdah klei pap Aê Diê brei leh kơ drei amâo hơaĭ mang?
Sĭt mkă pô hŏng phung khua ƀĭng kna mkăn, Khua ƀĭng kna Y‑Pôl ƀuh pô jing điêt hĭn leh anăn boh nik amâo năng dưi pia jing khua ƀĭng kna ôh. Mta phŭn kyua ñu amâo dưi wơr ôh, hlăk ñu ka tŭ mă klei Aê Diê pap čiăng thâo kral leh anăn kkuh mpŭ kơ Khua Yang Yêsu, ñu knŏng jih ai tiê hlăm bruă ngă jhat kơ phung tui hluê Khua Yang Pô Bi Mtlaih (Bruă Phung Khua Ƀĭng Kna 8:3; 9:1-9). Kyua anăn, ñu bi mklă hŏng phung Sang Aê Diê Kôrantô hlăm êlan 9 snei: “Kyuadah kâo jing khua ƀĭng kna điêt hĭn kơ jih jang, amâo năng ôh arăng pia kâo khua ƀĭng kna, kyuadah kâo ngă jhat leh kơ Phung Sang Aê Diê”.
Ƀiădah mơ̆ng leh dưi mâo klei Aê Diê pap, ñu jing dĭng buăl sĭt suôr kơ Aê Diê. Anăn jing hlăk ñu dưi bi mngač ală mngăt ai tiê hlăm ktuê êlan nao ti ƀuôn Damas hŏng hră hlăm kngan dưi brei mă leh anăn krư̆ hlăm mnă hlei pô đaŏ kơ Khua Yang Yêsu Pô Bi Mtlaih. Hlăm mmông mrâo bi tuôm hŏng Khua Yang Yêsu mtam leh anăn dưi bi mngač hlăm mngăt ai tiê, ñu amâo lŏ kĭ kơ̆ ôh ƀiădah bi êdah mtam klei đaŏ pô hlăm Khua Yang Yêsu Krist, leh anăn hur har hiu hưn Klei Mrâo Mrang Jăk kơ jih jang mnuih (Bruă Phung Khua Ƀĭng Kna 9:19-20). Leh anăn, Aê Diê yua ñu hưn leh anăn mkŏ mjing lu Sang Aê Diê, hlăm anăn, klei đaŏ phung Kôrantô kơ Khua Yang Yêsu Krist jing klei bi mklă kơ bruă ñu mâo klei Aê Diê pap brei kơ ñu msĕ si ñu lač: “leh anăn klei Ñu pap kơ kâo amâo jing hơăi mang ôh.” (êlan 10 a).
Aê Diê mâo hdră leh anăn mta kñăm klă klơ̆ng kơ grăp čô leh drei dưi mâo klei bi mtlaih kyua klei Aê Diê pap. Klei pap anăn amâo hơaĭ mang ôh sĭt phung Aê Diê bi mtlaih jih ai tiê hiu hưn Klei pap Aê Diê kơ lu phung mkăn. Jing pô hiu hưn kơ Khua Yang Yêsu Krist leh anăn hdĭp tŭ dưn kơ Ñu jing klei grăp čô drei brei mđing leh dưi bi mtlaih. Lu mnuih hlăm phung ƀuôn sang Aê Diê hruê anei ăt khăp kơ “hơaĭ mang” hlăm Sang Aê Diê (II Y‑Pêtrôs 1:8), wăt tơdah đaŏ leh anăn tui hluê Khua Yang lu thŭn leh ƀiădah ka tuôm hưn kơ Aê Diê kơ hlei pô ôh. Amâodah đa đa pô mkăn lŏ mdăp, amâo jhŏng hưn ôh klei đaŏ pô, amâodah mâo đa leh tŭ klei Aê Diê pap čiăng jing anak Ñu snăn lŏ dơ̆ng dôk čang guôn Aê Diê brei klei mkăn dơ̆ng, ƀiădah amâo mđing ôh ya bruă brei pô ngă čiăng klei pap Aê Diê brei leh kơ pô amâo jing hơaĭ mang ôh. Brei drei hdĭp hưn klei Aê Diê pap kơ drei čiăng kơ klei pap anăn ăt srăng dưi truh hŏng lu mnuih mơh.
Klei hdĭp drei klă sĭt jing pô hưn klei Aê Diê pap leh mơ̆ ka?
Wah lač: Ơ Khua Yang Aê Diê khăp hơiêng! Kâo mơak bi mni kơ Ih kyua Ih hdơr kơ kâo, sa čô mnuih soh dôk tŭ klei djiê, akâo kơ Ih đru kâo grăp hruê ƀrư̆ mâo boh tŭ dưn kơ Aê Diê mơ̆ng klei hdĭp hưn klei Ih pap kơ kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Y‑Samuel 13:1-22
Kênh Youtube BHKTHN:
