Klei Aê Diê Blŭ: Y-Mathiơ 7:15-20
Êlan kliăng: “Răng bĕ kơ phung khua pô hưn êlâo soh. Diñu hriê kơ diih hơô klĭt biăp, ƀiădah ti lam diñu jing asâo tan ră.” (Y-Mathiơ 7:15).
Klei êmuh ksiêm mĭn: Ya gru rup Khua Yang Yêsu yua čiăng lač kơ phung khua pô hưn êlâo soh? Ya klei msĕ leh anăn mdê mơ̆ng khua pô hưn êlâo soh hŏng khua hưn êlâo sĭt? Si ngă čiăng thâo kral hua pô hưn êlâo soh? Ya bruă drei ngă čiăng bi kdơ̆ng hŏng klei phung khua pô hưn êlâo soh hlăm Sang Aê Diê?
Khua Yang Yêsu lač kơ bruă amâo jăk leh anăn mâo lu, anăn jing khua pô hưn êlâo soh leh anăn hdră čiăng thâo kral. Khua pô hưn êlâo jing phung kpă ênuah hưn kơ phung ƀuôn sang klei Aê Diê lač hŏng digơ̆. Đa đa khua pô hưn êlâo Aê Diê brei dưi ngă klei myang tui si klei Aê Diê čiăng leh anăn klei Ñu kñăm. Khădah snăn, amâo djŏ ôh hlei pô yua Anăn Aê Diê blŭ klei hưn êlâo, ngă klei myang jing khua pô hưn êlâo sĭt sơaĭ. Khua Yang Yêsu hưn brei phung khua ƀĭng kna răng, khua pô hưn êlâo sĭt leh anăn khua pô hưn êlâo soh msĕ snăk. Khua pô hưn êlâo mgưt hơô ao amâodah yua boh blŭ hưn êlâo msĕ hŏng sa čô khua pô hưn êlâo sĭt. Diñu bi êdah ti êngao jing phung êdu êun, kpă ênuah msĕ si sa drei biăp, leh anăn mŭt hlăm êpul phung ƀuôn sang Aê Diê, ngă sa čô khua pô hưn êlâo sĭt ƀiădah hlăm lam diñu măk ƀai, ngă jhat kơ kơ phung ƀuôn sang Aê Diê amâo mdê ôh hŏng asâo ră.
Tơdah knŏng dlăng ti êngao snăn amâo dưi thâo kral ôh khua pô hưn êlâo soh leh anăn khua pô hưn êlâo sĭt. Kyua anăn, Khua Yang Yêsu bi hriăm phung ƀĭng kna brei dlăng kơ knuih hlăm lam leh anăn knuih hdĭp mơ̆ng sa čô ciăng thâo mgưt amâodah sĭt. Khua pô hưn êlâo soh dưi hluê ngă klei blŭ phung khua pô hưn êlâo sĭt čiăng mplư phung mkăn, ƀiădah klei hdĭp leh anăn knhuah hdĭp diñu lŏ lač kơ diñu pô. Khua Yang Yêsu mñă kơ phung ƀĭng kna đăm dlăng ôh knuih ti êngao ngă mgưt amâodah Klei bi hriăm jăk siam msĕ si sĭt mơ̆ng sa čô mnuih leh anăn lĕ hlăm klei arăng mplư, klei yuôm bhăn hĭn jing hlăm lam ai tiê leh anăn klei hdĭp diñu huĭ mpŭ kơ Aê Diê hlăm grăp hruê.
Hlăm Sang Aê Diê hruê anei, mâo lu mnih lĕ buh amâodah êdu awăt hlăm klei đaŏ kyua klei hdĭp mơ̆ng phung “khua pô hưn êlâo soh, phung đaŏ mgưt”. Mâo lu mnuih arăng mplư hluê klei đaŏ soh ăt jing kyua tui hluê klei mtô jăk siam mơ̆ng phung khua pô hưn êlâo mgưt anăn. Boh sĭt jing, klei phung khua pô hưn êlâo mgưt jing klei mâo leh mơ̆ng ênuk Klei bi mguôp hđăp, leh anăn truh ênuk Khua Yang Yêsu, ênuh phung khua ƀĭng kna, leh anăn klă sĭt ƀrư̆ truh hruê knhal tuič klei anei mâo lu hĭn êjai. Kyua anăn, drei đăm bi kngăr ôh amâodah êdu ai kơ bruă mâo phung khua pô hưn êlâo soh, phung đaŏ mgưt hlăm Sang Aê Diê. Klei brei drei ngă jing hdĭp nanao hlăm klei thâo răng, hriăm Klei Aê Diê Blŭ grăp hruê čiăng Klei Aê Diê Blŭ bi êdah klei soh, klei mgưt phung khua pô hưn êlâo soh, đăm lĕ hlăm klei hdĭp kbưi hŏng Aê Diê čiăng, amâodah kjham hĭn jing lui Aê Diê čiăng tui hluê phung khua pô hưn êlâo soh.
Drei hriăm Klei Aê Diê Blŭ hlăm grăp hruê mơ̆?
Ơ Khua Yang, ti krah klei sĭt, klei mgưt mâo hlăm grăp hruê, akâo kơ Ih đru kâo amâo rŭng răng ôh hlăm klei đaŏ ƀiădah kjăp ai tiê knang kơ Aê Diê răng mgang. Akâo kơ Ih đru kâo khăp leh anăn hriăm Klei Aê Diê Blŭ grăp hruê čiăng klei hdĭp kâo hdĭp djŏ hŏng klei Ih bi hriăm, amâo lĕ hlăm klei arăng mplư lui wir kbưi hŏng Ih ôh.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Phung Khua Phat Kđi 3
Kênh Youtube BHKTHN:
