Klei Aê Diê Blŭ: Klei Bi Hriêng 12:5-7
Êlan kliăng: “Ksiêm dlăng kâo bĕ, Ơ Aê Diê, leh anăn thâo kral ai tiê kâo; lông dlăng kâo, leh anăn thâo kral klei mĭn kâo. Dlăng bĕ thâodah kâo tui êlan jhat ƀai, leh anăn atăt kâo ti êlan dôk nanao hlŏng lar.” (Klei Mmuñ Hđăp 139:23-24).
Klei êmuh ksiêm mĭn: Si mtao Y-Salômôn brei ƀuh kơ klei bi mguôp bhiăn mâo, ti krah klei mĭn hŏng klei ngă? Si klei Khua Yang Yêsu mtô kơ klei soh tlĕ piu hlăm klei mĭn? Diih mâo mơ̆ klei akâo kơ Khua Yang đru bi mlih hlăm klei mĭn, klei blŭ, leh anăn klei ngă pô?
Mtao Y-Salômôn mtô anak brei thâo bi kah klei mĭn phung kpă ênô hŏng klei mĭn phung ƀai. Knŏng hŏng tlâo êlan (êlan 5-7), ñu brei anak ƀuh klă klei bi mguôp bhiăn mâo, ti krah klei mĭn leh anăn klei ngă. Hŏng phung kpă ênô, diñu mâo klei mĭn djŏ, kpă ênuah (êlan 5), snăn srăng atăt kơ klei blŭ sĭt kpă, jăk siam, weh đuĕ mơ̆ng klei soh (êlan 6), leh anăn boh kơ klei hdĭp phung kpă ênô jing kjăp leh anăn dôk nanao hlŏng lar (êlan 7). Mklăk wĭt, bi phung ƀai, hlăm boh kŏ diñu knŏng čiêm rông klei mĭn kčĕ čiăng mplư, atăt kơ klei blŭ bi têč hnêč, ngă bi êka ai tiê arăng leh anăn boh kơ klei hdĭp diñu jing dlưh rai. Dơ̆ng mơ̆ng klei mĭn jăk siam amâodah jhat ƀai atăt kơ klei blŭ, bruă ngă jăk amâodah jhat, leh anăn ti knhal tuč atăt kơ klei adôk hdĭp amâodah klei rai luč kơ sa klei hdĭp mnuih.
Arăng knŏng tŭ klei bhiăn phat kđi kyua mơ̆ng bruă diñu ngă soh, ƀiădah mnuih ngă soh hŏng Aê Diê hlăk klei mĭn diñu mĭn klei jhat ƀai. Khua Yang Yêsu mtô lač kơ klei soh tlĕ piu hlăm klei mĭn jing: “Diih hmư̆ leh arăng lač đưm, ‘Đăm tlĕ piu ôh.’Ƀiădah kâo lač kơ diih, hlei pô dlăng kơ mniê hŏng klei ƀô čiăng ngă soh, tlĕ piu leh hŏng mniê anăn hlăm ai tiê ñu.” (Y-Mathiơ 5:27-28). Mtao Y-Đawit jing sa čô huĭ mpŭ kơ Aê Diê, ƀiădah mơ̆ng klei tăm ƀuh hĕ H’Batsêba dôk mnei, snăn klei mĭn ñu ngă soh leh, mơ̆ng klei mĭn jhat atăt kơ klei tlĕ piu, leh anăn truh kơ klei lŏ ngă thiăm klei soh bi mdjiê mnuih (II Y-Samuel 11:2-17).
Klei mĭn atăt klei ngă, kyuanăn Khua Yang čiăng kơ drei brei răng hlăm klei mĭn, klei bi mĭn drei. Brei drei lăm bi rai jih phŭn agha klei soh dơ̆ng mơ̆ng hlăm klei mĭn, amâo lui klei mĭn soh jhat đĭ kơ prŏng hĭn, tơl ñu mâo myun ngă kơ drei lĕ hlăm klei soh ôh. Mtao YĐawit thâo kơ ñu jing awăt, amâo mâo klă kluôm, snăn, leh ñu kmhal kơ klei soh, ñu kwưh akâo nanao kơ Khua Yang ksiêm klei mĭn ñu, kčŭt ƀuah mkra ñu, čiăng atăt ñu mŭt hlăm êlan dôk nanao hlŏng lar, “Ksiêm dlăng kâo bĕ, Ơ Aê Diê, leh anăn thâo kral ai tiê kâo; lông dlăng kâo, leh anăn thâo kral klei mĭn kâo. Dlăng bĕ thâodah kâo tui êlan jhat ƀai, leh anăn atăt kâo ti êlan dôk nanao hlŏng lar.” (Klei Mmuñ Hđăp 139:23-24). Akâo kơ Aê Diê đru drei thâo ƀuh klei bi hmô jhat wăt klei bi hmô jăk mơ̆ng mtao Y-Đawit, čiăng akâo kơ Khua Yang brei drei mâo klei mĭn phung kpă ênô čiăng dưi mă tŭ klei hdĭp hlŏng lar.
Si ngă drei răng kriê klei mĭn drei hlăm klei kpă ênô mơ̆?
Ơ Khua Yang, bi mni kơ Ih mtô bi hriăm leh kâo brei răng hlăm klei mĭn, klei bi mĭn. Akâo Ih đru kâo thâo ƀuh ya klei mĭn amâo mâo bi mơak kơ Ih leh anăn đru kâo bi mlih mta klei anăn, čiăng kơ kâo dưi mă tŭ klei hdĭp hlŏng lar.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Phung Khua Phat Kđi 2
Kênh Youtube BHKTHN:
