Klei Aê Diê Blŭ: Klei Bi Hriêng 11:28-31
Êlan kliăng: “Boh mnuih kpă ênô jing sa ƀĕ ana kyâo klei hdĭp, leh anăn pô atăt phung mnuih kơ klei đăo jing pô thâo mĭn” (Klei Bi Hriêng 11:30).
Klei êmuh ksiêm mĭn: Ya klei mtao Y-Salômôn mtô anak ti knhal tuč kdrêč 11? Ñu bi êdah si boh jing mơ̆ng phung thâo mĭn leh anăn phung mluk? Ya klei mnuih thâo mĭn ba kơ phung riêng gah ñu? Ya bruă drei dôk ngă čiăng atăt arăng đăo kơ Khua Yang?
Ti knhal tuč kdrêč 11, Mtao Y-Salômôn mtô anak brei thâo săng, klei thâo mĭn srăng đru kơ anak dôk hdĭp kpă ênô; klei kpă ênô srăng mâo boh klei hdĭp hlŏng lar. Boh anei srăng dưi ktŭng hrip mnuih dôk êpa hmao klei sĭt nik leh anăn ăt čiăng lŏ tui duah Khua Yang hĭn nanao. Snăn yơh, hŏng knhuah dôk hdĭp leh anăn klei blŭ, pô thâo mĭn srăng dưi atăt lu mngăt mnuih kơ klei đăo.
Mtao Y-Salômôn brei thâo, pô thâo mĭn ăt uêñ mĭn mă bruă knuă duah prăk kăk mơh, ƀiădah ñu thâo yua ngăn drăp anăn kăp jing mnơ̆ng yua mă bruă kơ klei hdĭp ñu leh anăn pioh mă bruă kơ Aê Diê ñu, amâo knang kơ ngăn drăp ñu mâo ôh (êlan 28). Kyuadah pô thâo mĭn thâo klă, ngăn drăp amâo dưi bi mtlaih mnuih soh ôh, “Ngăn drăp amâo yuôm ôh ti hruê klei ngêñ” (Klei Bi Hriêng 11:4a). Mnuih mluk tơdah amâo čiăng hriăm leh anăn amâo ngă tui si klei thâo mĭn, snăn gŏ sang ñu amâo srăng mâo klei êđăp ênang ôh, ngăn dưn ñu khă lu êbeh dưn ăt srăng phiơr đuê̆ msĕ angĭn puh ƀhur mơh (êlan 29). Klăk wĭt, mnuih kpă ênô srăng đĭ kyar msĕ si hla kyâo mtah (êlan 28b). Kdlưn hĭn dơ̆ng, mnuih dôk hdĭp kpă ênô wăt dưi mă tŭ boh klei hdĭp mơh. Boh klei hdĭp anei amâo djŏ ôh knŏng ba kơ pô thâo mĭn klei hdĭp, ƀiădah wăt dưi atăt lu mngăt mnuih kơ klei đăo mơh (30), kyuadah pô thâo mĭn duah êlan kăp djă păn mmông găl, mtô mtă klei thâo mĭn kơ mnuih kƀah klei thâo săng leh anăn amâo gưt asăp, čiăng atăt diñu kơ klei hdĭp hlŏng lar.
Mâo sa klei bhiăn Aê Diê čiăng kơ pô thâo mĭn ngă anăn jing, tơdah Aê Diê hơêč hmưi klei jăk jĭn snăn brei thâo kah mbha klei jăk jĭn anăn kơ pô mkăn. Hlăk Aê Diê hơêč hmưi kơ Y-Abraham, Aê Diê ăt lač mơh kơ Abraham srăng jing phŭn klei jăk jĭn kơ lu mnuih, Aê Diê lač: “Kâo srăng brei ih jing sa găp djuê prŏng; kâo srăng brei klei jăk jĭn kơ ih; kâo srăng brei anăn ih mâo klei hing ang, leh anăn ih srăng jing klei jăk jĭn kơ phung mkăn.” (Klei Mphŭn Dơ̆ng 12:2). Mơ̆ng phŭn klei jăk jĭn Abraham yơh kkiêng leh kơ Mtao Y-Đawit, leh anăn mơ̆ng djuê ana Mtao Y-Đawit yơh kkiêng leh kơ Khua Yang Yêsu Pô Bi Mtlaih. Mơ̆ng Khua Yang Yêsu, drei dưi mâo klei bi mtlaih. Leh anăn hruê anei, Khua Yang čiăng kơ drei ăt tui ngă nanao đrông bruă jao bi mtlaih mnuih, atăt lu mngăt mnuih soh kơ klei đăo, čiăng diñu dưi mă tŭ klei hdĭp hlŏng lar (Y-Mathiơ 28:19-20).
Akâo kơ Aê Diê brei grăp čô drei dôk hdĭp msĕ si sa čô thâo mĭn, hung klei hdĭp kñăm kơ ênoh adôk nanao hlŏng lar leh anăn kơ klei hdĭp lă lar. Ti djiêu anăn, brei drei kah mbha klei sĭt nik klei bi mtlaih mơ̆ng Khua Yang, đru lu mnuih thâo kmhal kơ klei hdĭp soh jhat pô, čuăn đăo knang kơ Khua Yang čiăng kơ diñu ăt mâo klei hdĭp hlŏng lar msĕ si drei mơh.
Si ngă klei hdĭp drei atăt mơ̆ arăng wĭt kơ Khua Yang?
Ơ Khua Yang, bi mni lač jăk kơ Ih kyua klei jăk jĭn Ih hơêč hmưi kơ kâo grăp hruê. Akâo kơ Ih đru kâo dôk hdĭp tui si hnơ̆ng čuăn jăk kpă mơ̆ng Klei Ih Blŭ leh anăn dôk hdĭp hŏng klei thâo mĭn čiăng dưi atăt lu mnuih wĭt kơ Khua Yang.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 25:5-26:15
Kênh Youtube BHKTHN:
https://www.youtube.com/channel/UCaSY8ebjVfMKhPups5jZ9yw
