Klei Aê Diê Blŭ: I Kôrantô 13:8-12.
Êlan kliăng:
“Kyuadah ară anei drei ƀuh amâo mngač ôh msĕ si hlăm ală kĭng; hlăk anăn drei srăng ƀuh klă ti anăp. Ară anei kâo thâo săng sa kdrêč; hlăk anăn kâo srăng thâo săng jih, msĕ si Aê Diê thâo kral kâo leh” (I Kôrantô 13:12).
Klei êmuh ksiêm mĭn: Khua Ƀĭng kna Y-Pôl bi hmô hđeh leh anăn ală kĭng čiăng lač kơ ya klei? Si ngă klei phung drei hdĭp msĕ hŏng phung đaŏ Kôrantô êlâo dih? Ya klei yuôm bhăn hĭn brei phung drei tui duah?
Ală kĭng mtrang hlăm ênuk đưm ti Kôrantô dưi mkra hŏng msei, khăng dưi mkra mjing hŏng kông bi msiam, anăn rup mtrang amâo đei mngač ôh. Lač kơ rup anei, khua ƀĭng kna Y-Pôl brei phung đaŏ ti Kôrantô mâo klei thâo săng, klei mĭn leh anăn klei blŭ mơ̆ng anak mnuih ară anei, wăt ñu, amâo mdê ôh hŏng hđeh. Ƀiădah truh mmông klei jăk mơak truh, jing mmông dưi dôk hlăm ƀuôn jăk, drei srăng hriê kơ prŏng kluôm ênŭm kyua dưi jing msĕ si Ñu (I Y-Yôhan 3:2). Klei knhâo anak mnuih mâo hlăk êjai dôk ti lăn jing ƀiă leh anăn amâo mngač msĕ si rup hlăm ală kĭng mtrang hŏng kông. Ƀiădah truh mmông Aê Diê bi kčah, phung đaŏ srăng dưi thâo săng kơ Khua Yang hŏng klei klă mngač msĕ si dua čô dôk tlă anăp, leh anăn Aê Diê thâo drei msĕ snăn.
Phung đaŏ Kôrantô hlăk dôk ktưn hưn kơ klei thâo leh anăn klei mâo mơ̆ng Yang Mngăt Jăk ƀiădah diñu hdĭp msĕ hŏng hđeh, amâo čiăng jing mnuih đĭ hriê prŏng. Diñu amâo hdĭp kyua klei đaŏ ôh ƀiădah hŏng ală ƀuh, hlăm klei thâo leh anăn klei knhâo knhăk hlăm klei hdĭp anei, ƀiădah khua ƀĭng kna Y-Pôl lač jih jang klei anăn knŏng “amâo mngač ôh msĕ si hlăm ală kĭng”. Ƀiădah “truh ară anei”, jing truh hruê mŭt hlăm klei guh kơang Khua Yang, drei srăng thâo kral Khua Yang leh anăn thâo klă nik msĕ si Khua Yang kral drei.
Phung đaŏ Kôrantô êlâo dih dlăng myuôm klei mâo Yang Mngăt Jăk brei, boh nik blŭ klei tue. Diñu jih ai tiê leh anăn ktưn hưn tơdah mâo, ƀiădah klă sĭt diñu amâo mdê ôh hŏng phung hđeh điêt amâo čiăng kơ prŏng. Hruê anei, tơdah tui hluê Khua Yang lu mmông drei ƀuh msĕ snăn, amâo mđing ôh kơ anôk lă lar ƀiădah knŏng tui duah klei jing êjai hlăm lăn ala anei, amâo ƀuh ôh klei mâo knhal hlăm klei pô thâo săng anăn ktưn hưn kơ pô, dlăng hơaĭ mang kơ ayŏng adei, ngă klei bi kah mbha hlăm Sang Aê Diê. Klei Yang Mngăt Jăk brei jing kơ grăp wưng ƀiădah tơdah amâo mâo ôh klei khăp tơdah yua klei thâo Aê Diê brei snăn kăn dưi mkŏ mjing pô amâodah Sang Aê Diê ôh. Kyua anăn, hlăm êlan 8, khua ƀĭng kna Y-Pôl lač leh “Klei khăp amâo tuôm tuč ôh”, leh anăn ñu mñă klă, “Tui duah bĕ klei khăp” (I Kôrantô 14:1a).
Drei hlăk dôk čang guôn hruê dưi mâo klei thâo săng kluôm ênŭm msĕ si Khua Yang thâo kral pô mơ̆?
Ơ Khua Yang! Kâo mơak leh anăn bi mni kơ Ih sĭt mĭn kơ klei jăk Ih mprăp leh kơ kâo hlăm ƀuôn jăk guh kơang. Akâo kơ Ih đru kâo mđing ai tiê kơ hruê jăk mơak anăn čiăng hdĭp tŭ dưn kơ Khua Yang leh anăn kơ lu mnuih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
