Klei Aê Diê Blŭ: II Y-Timôthê 2:14-21
Êlan kliăng: “Mă bruă bĕ hŏng jih ai tiê čiăng jing mnuih Aê Diê tŭ, sa čô mă bruă amâo mâo klei hêñ ôh, thâo mtô bi djŏ klei blŭ sĭt nik Aê Diê” (II Y-Timôthê 2:15)
Klei êmuh ksiêm mĭn: Khua ƀĭng kna Y-Pôl mtă brei Khua pô mtô hlăk ai Y-Timôthê mtă kơ phung mkăn hngah kơ ya klei? Ñu mtă kơ Khua pô mtô hlăk ai Y-Timôthê brei hŏng jih ai tiê ngă ya klei? Klei hriăm hruê anei bi hriăm drei ya klei brei drei ngă čiăng bi mđĭ klei đăo hdơ̆ng drei?
Mơ̆ng êlan 14 kdrêč 2, Khua ƀĭng kna Y-Pôl mtô Khua pô mtô hlăk ai Y-Timôthê kơ klei pô mtô soh, leh anăn kơ klei mtô soh (II Timôthê 2:14-3:9). Ñu yua klei blŭ mưng blŭ jing “brei…hngah” amâodah “mă bruă bĕ” čiăng bi hriăm sa čô hlăk ai mă bruă mbĭt hŏng ñu. Trăn Klei Aê Diê Blŭ hruê anei lŏ čuê klei hră mơĭt tal sa lač leh jing, “hngah klei bi tăng kơ boh blŭ” (êlan 14), leh anăn “hngah kơ klei blŭ hơăi mang” (êlan 16). Khua ƀĭng kna Y-Pôl pô ăt srăng bi tăng mơh tơdah mâo pô čiăng bi hmăi jhat kơ Klei Mrâo Mrang Jăk. Hŏng klei kpă ñu bi kdơ̆ng leh tơdah Khua ƀĭng kna Y-Pêtrôs ngă klei amâo sa hnơ̆ng ôh, ênưih brei mnuih mkăn thâo săng čhuai jing – phung tue ngă klei khăt klĭt kơh srăng mâo klei bi mtlaih (Galati 2:11-14). Ƀiădah, tinei, klei Khua ƀĭng kna Y-Pôl mtă brei hngah jing klei bi tăng amâo tŭ dưn ôh, kyuadah klei anăn “knŏng bi rai phung dôk hmư̆” (êlan 14), leh anăn ngă kơ diñu “srăng nao kjham hĭn hlăm klei amâo thâo mpŭ kơ Aê Diê” (êlan 16).
Amâo mjưh knŏng tăp klei brei hngah ôh, Khua ƀĭng kna Y-Pôl ktrâo brei mơh kơ Khua pô mtô hlăk ai Y-Timôthê wăt kơ phung drei hruê anei êlan srăng hdĭp leh anăn mă bruă jăk hĭn jing: Hŏng jih ai tiê mtô bi djŏ “klei blŭ sĭt nik Aê Diê” (êlan 15). Drei amâo dưi bi kdơ̆ng hŏng klei đăo soh knŏng hŏng klei bi tăng kơ klei soh diñu ôh. Bruă brei drei ngă kdlưn hĭn jing hriăm Klei Aê Diê Blŭ leh anăn mtô klei sĭt nik mơ̆ng Klei Ñu Blŭ. Hŏng klei anăn, wăt tơdah mâo lu mnuih mkăn tŭ klei mplư “klah đuĕ mơ̆ng klei sĭt nik”, tơl mâo phung “bi lĕ klei đăo đa đa mnuih” (êlan 18). Ƀiădah mnuih thâo klă klei sĭt nik ăt srăng mâo sa “atur kjăp”, jing “atur Aê Diê ăt dôk kjăp” wăt tơdah djiêô gah têč hnêč kyua klei mtô soh anăn (êlan 18-19).
Hruê anei, mâo lu mnuih khăp kơ klei bi tăng mgăl amâo djŏ knŏng hlăm Phung Sang Aê Diê ôh, ƀiădah lu hĭn jing hlăm facebook. Tơdah lĕ leh hlăm klei bi tăng čiăng dưi hĭn, boh jhat kơ klei anăn jing amâo djŏ knŏng amâo mâo klei bi mđĭ klei đăo ôh, ƀiădah wăt atăt truh kơ klei bi ăl, bi kah mbha phung mơh. Klei hriăm hruê anei bi hriăm drei đăm bi luč hruê mmông, ai tiê kơ klei bi tăng hơaĭ mang ôh, ƀiădah brei drei đru bi mđĭ ai hdơ̆ng drei hŏng Klei Aê Diê Blŭ. Bi mtrŭt hdơ̆ng drei dlăng leh anăn hriăm Klei Aê Diê Blŭ, hriăm Adŭ Hriăm Hruê Kjuh, sĭt suôr hlăm klei bi kƀĭn kkuh mpŭ kơ Aê Diê, leh anăn đru bi mbha hdơ̆ng drei klei sĭt nik mơ̆ng Klei Aê Diê Blŭ. Tơdah sa čô mă bruă kơ Khua Yang mtô leh anăn hdĭp tui si Klei Aê Diê Blŭ, snăn klei anăn srăng bi mđĭ ai lu mnuih thâo kral klei sĭt nik leh anăn dôk kjăp hlăm klei sĭt nik. Akâo Khua Yang đru drei hdơr nanao kơ klei Aê Diê Blŭ: “thâo mtô bi djŏ klei blŭ sĭt nik Aê Diê”.
Si drei dôk đru bruă rah leh pla Klei Blŭ sĭt nik Aê Diê?
Wah lač: Ơ Khua Yang, bi mni kơ Ih kyuadah klei mtô jing klă snăk kơ kâo, čiăng kâo hngah hĕ klei bi tăng kơ boh blŭ, hngah klei bi tăng hơăi mang hlăm Facebook, ƀiădah hŏng jih ai tiê hriăm leh anăn hưn Klei Blŭ sĭt nik Ih kơ lu mnuih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 140-141
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
