Klei Aê Diê Blŭ: Y-Mathiơ 26:36-46
Êlan kliăng: “Kăp răng leh anăn wah lač bĕ, čiăng kơ diih amâo lĕ hlăm klei mplư ôh. Mngăt čiăng snăk, ƀiădah kđeh jing awăt” (Y-Mathiơ 26:41)
Klei êmuh ksiêm mĭn: Ya klei Khua Yang Yêsu mtă kơ tlâo čô khua ƀĭng kna hlăm war Gêtsêmanê? Ya ngă Ñu akâo kơ digơ̆ ngă msĕ snăn lĕ? Si ngă drei yua klei hriăm anei êjai hdĭp hlăm ênuk knhal tuč?
Tơdah Khua Yang Yêsu nao mbĭt hŏng phung ƀĭng kna Ñu kơ war mnga Gêtsêmanê čiăng wah lač, Ñu lač kơ tlâo čô ƀĭng kna: “Dôk tinei leh anăn kăp răng mbĭt hŏng Kâo” (êlan 38). Boh blŭ “kăp răng” čiăng lač kơ klei jing êngal nanao čiăng thâo kral leh anăn mâo klei lŏ wĭt ngă djŏ tơdah mâo klei dleh dlan, klei lông dlăng truh ñhăr. Leh Khua Yang Yêsu nao wah lač leh anăn lŏ wĭt, Ñu ƀuh tlâo čô ƀĭng kna pĭt leh. Digơ̆ amâo dưi kăp răng msĕ si klei Ñu mtă ôh. Khua Yang mtă brei diñu kăp răng. Msĕ si kahan gak ƀuôn srăng kpĭ diñu pô hlăm klei bhiăn kăp răng nanao čiăng dưi hưn djăl ya klei srăng truh, đru phung hlăm ƀuôn thâo kăp mgang êlâo – êlâo kơ phung roh kdơ̆ng blah, msĕ mơh brei phung ƀĭng kna duah klei ktang hŏng klei wah lač čiăng mâo ai ktang dưi bi blah hŏng mnêč, klei mplư mơ̆ng yang jhat leh anăn lăn ala. Khua Yang ăt hưn kơ phung ƀĭng kna thâo mơh kơ klei jing digơ̆ ară anei hin, digơ̆ čiăng dôk răng leh anăn wah lač snăk, ƀiădah kđeh digơ̆ awăt leh anăn êmăn êdimima.
Khua Yang Yêsu lŏ wĭt kơ digơ̆ tal dua “ƀuh phung ƀĭng kna ăt dôk pĭt, kyuadah ală digơ̆ amâo dưi mblang ôh” (êlan 43), digơ̆ amâo lŏ dưi dôk răng ôh leh anăn pĭt ktang leh. Khua Yang Yêsu lač, “Diih ăt dôk pĭt leh anăn dôk mdei hĕ? Nĕ anei, mông truh leh, arăng srăng jao Anak Mnuih hlăm kngan phung soh” (êlan 45). Amâo djŏ Khua Yang Yêsu čiăng jih jang phung tui hlue Ñu amâo dưi pĭt sơăi ôh, ƀiădah Ñu čiăng digơ̆ thâo kơ klei digơ̆ srăng lĕ tơdah bi tlă anăp hŏng klei dleh dlan, klei lông dlăng dơ̆ng truh, čiăng digơ̆ čŏng čiăng tui duah klei ktang dưi hlăm klei bi blah hŏng klei wah lač.
Dôk hdĭp hlăm ênuk knhal tuč, Klei Aê Diê Blŭ ăt mtă kơ drei brei drei dôk răng nanao. Khua ƀĭng kna Y-Pêtrôs mtă brei phung dlăng hră ñu čih dôk răng leh anăn wah lač hlăm hruê knhal tuč snei: “Klei knhal tuč kơ jih jang mnơ̆ng giăm truh leh. Kyuanăn brei diih jing djŏ hnơ̆ng leh anăn thâo răng kơ klei wah lač” (I Y-Pêtrôs 4:7). Msĕ mơh Khua ƀĭng kna Y-Pôl mtă kơ Phung Sang Aê Diê ƀuôn Têsalônik kơ klei dôk răng leh anăn dôk êngal snei: “Snăn đăm brei drei pĭt ôh msĕ si phung mkăn, ƀiădah brei drei dôk răng leh anăn dôk êngal” (I Têsalônik 5:6). Wăt Khua Yang Yêsu pô msĕ mơh mtă brei jih jang phung đăo kơ Ñu dôk răng djă pioh klei hdĭp doh jăk čiăng hlăm hruê Ñu lŏ hriê drei dưi nao mbĭt hŏng Ñu: “Nĕ anei, Kâo hriê msĕ si sa čô mnuih knĕ! Jăk mơak yơh hlei pô dôk krŏng leh anăn răng kriê kơ čhiăm ao ñu, čiăng kơ ñu amâo êbat lưng mlŭn ôh leh anăn arăng amâo ƀuh klei hêñ ñu!” (Klei Bi Êdah 16:15). Akâo kơ Khua Yang đru drei dôk răng nanao, kăp răng leh anăn hur har wah lač čiăng kơ drei amâo lĕ kơ klei yang jhat mplư ôh ƀiădah êbat hŏng Khua Yang kjăp nanao grăp hruê.
Ti klei awăt, ti klei êmăn ngă kơ drei amâo dưi dôk răng hŏng Khua Yang ôh?
Wah lač: Ơ Yang Mngăt Jăk, Pô dôk hdĭp hlăm kâo, đru kâo dưi hĭn hŏng jih jang mnơ̆ng bi gun, hŏng klei soh, hŏng klei tluh lăn ala ngă kơ kâo amâo dưi dôk răng wah lač leh anăn dôk guôn hruê Ih lŏ hriê ôh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yôp 41
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
