Klei Aê Diê Blŭ: Y-Mathiơ 26:36-46
Êlan kliăng: “Ơ Ama Kâo, tơdah dưi, mă mđuĕ hĕ atŏ anei mơ̆ng Kâo; amâo djŏ tui si Kâo čiăng ôh, ƀiădah tui si Ih čiăng” (Y-Mathiơ 26:39b)
Klei êmuh ksiêm mĭn: Ti war mnga Gêtsêmanê, ya klei Khua Yang Yêsu akâo kơ Aê Diê? Hlăk anăn si ai tiê Ñu jing? Si drei ƀuh klei khăp Khua Yang khăp kơ drei?
Khua Yang Yêsu nao mbĭt hŏng phung ƀĭng kna Ñu kơ sa bĭt anôk arăng pia Gêtsêmanê, hlăm klei Hêbrơ lŏ mblang jing anôk djiêt êa prăi. Anei jing war pla lu ana boh ôliwơ, arăng klit bi ƀhĭ boh ôliwơ leh anăn djiêt mă êa prăi jing dŏ mâo ênoh. Khua Yang nao kơ war Gêtsêmanê čiăng wah lač kơ Aê Diê Ama. Khua ƀĭng kna Y-Mathiơ brei thâo ai tiê Khua Yang Yêsu hlăk anăn Ñu “ênguôt leh anăn rŭng răng” snăk (êlan 37), Ñu lač kơ phung ƀĭng kna Ñu snei: “Ai tiê kâo ênguôt snăk păt čiăng djiê” (êlan 38). Klei Khua Yang ênguôt leh anăn rŭng răng kbiă hriê mơ̆ng klei Ñu srăng tŭ klei arăng pơ̆ng ti kyâo bi kal jing klei ruă hlăm asei mlei, Ñu srăng gui klei soh mnuih, leh anăn klei srăng bi ktlah mơ̆ng Aê Diê Ama jing klei ruă hlăm mngăt. Khua Yang Yêsu jak ba mbĭt hŏng Ñu Y-Pêtrôs, Y-Yôhan leh anăn Y-Yakơ nao kbưi ƀiă hlăm war mnga Gêtsêmanê. Leh anăn Ñu nao kbưi ƀiă wah lač kơ Aê Diê Ama, “Ơ Ama Kâo, tơdah dưi, mă mđuĕ hĕ atŏ anei mơ̆ng Kâo; amâo djŏ tui si Kâo čiăng ôh, ƀiădah tui si Ih čiăng.” (êlan 39).
Klei Khua Yang Yêsu wah lač brei ƀuh tơdah Ñu tŭ ư trŭn hriê ti lăn ala snăn Ñu prăp êmiêt leh kơ klei srăng tŭ klei djiê ti kyâo bi kal (Y-Mathiơ 1:21). Wăt tơdah Ñu thâo leh kơ klei pơ̆ng ti kyâo bi kal jing klei knap mñai snăk kơ asei mlei wăt kơ mngăt ƀiădah Ñu ăt gưt kơ klei Aê Diê Ama čiăng kluôm ênŭm. Blư̆ tal dual leh anăn tal tlâo, Ñu ăt bi êdah klei srăng gưt jih kơ klei Ama čiăng bi leh jih hdră bi mtlaih: “Ñu lŏ nao tal dua leh anăn wah lač, “Ơ Ama Kâo, tơdah Ih amâo dưi mă atŏ anei ôh mơ̆ng Kâo tơl Kâo mnăm leh, brei truh tui si Ih čiăng.” (êlan 42). Leh Khua Yang Yêsu wah lač mtam, phung duah čiăng bi mdjiê Ñu hriê mă čăp Ñu.
Tơdah dlăng trăn Klei Aê Diê Blŭ anei, brei drei thâo drei amâo dưi thâo săng ôh leh anăn kăn dưi đru gui rei klei ênguôt Khua Yang Yêsu hlăk Ñu bi blah hjăn ti war mnga Gêtsêmanê. Brei drei thâo Khua Yang tŭ ư tŭ leh klei dleh dlan leh anăn klei ruă hĭn kơ Ñu pô čiăng dưi bi mtlaih klei soh phung mnuih. Brei drei bi mni kơ Khua Yang kyuadah Ñu gưt leh asăp kơ Ama, êbat tuč leh êlan kyâo bi kal čiăng kơ mnuih dưi mâo klei bi mtlaih mơ̆ng klei soh. Drei thâo Khua Yang bi blah kyua drei ktang snăk ti war mnga Gêtsêmanê. Hră Klei Mrâo Mrang Jăk Y-Luk 22:44 čih leh snei, “Hlăm klei ênguôt ktrŏ, Ñu wah lač ktang hĭn; leh anăn êa kơhŏ Ñu jing msĕ si kdrah êrah lĕ ti lăn.” Tơdah thâo klei khăp Khua Yang khăp leh kơ drei jing prŏng snăk, drei srăng hdĭp hŏng klei myơr jih klei hdĭp kơ Ñu.
Si ih ƀuh klei khăp Khua Yang khăp kơ Ih tơdah Ñu tŭ ư êbat êlan kyâo bi kal?
Wah lač: Ơ Khua Yang khăp, bi mni kơ Ih tŭ ư tŭ leh klei djiê kyua kâo. Đru kâo khăp kơ Ih nanao leh anăn hdĭp năng hŏng klei khăp Ih hŏng klei mă bruă leh anăn hưn Anăn Ih kơ jih jang mnuih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yôp 40
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
