Klei Aê Diê Blŭ: Klei Bi Hriêng 3:29-30
Êlan kliăng: “Đăm trông čhai čiăng ngă jhat kơ pô riêng gah ih ôh, kyuadah ñu dôk giăm ih leh anăn knang kơ ih” (Klei Bi Hriêng 3:29)
Klei êmuh ksiêm mĭn: Čiăng thâo kral sa klei hdĭp mrâo, êđăp ênang, ya klei mtao Salômôn lŏ mtô mtă kơ anak? Klei Aê Diê Blŭ brei thâo ya jing mta phŭn yuôm, čiăng kơ sa êpul êya đĭ hriê kơ prŏng suaih ktang? Si brei drei dôk hdĭp hŏng pô riêng gah drei?
Sa klei hdĭp mâo Khua Yang leh anăn dôk hdĭp thâo mĭn, amâo knŏng kăp ngă jăk kơ mnuih dôk mâo klei čiăng đru, ƀiădah wăt amâo tuôm mâo klei mĭn bi êmut, trih nač amâodah čiăng ngă jhat kơ mnuih mkăn mơh. Mtao Salômôn mtô: “Đăm trông čhai čiăng ngă jhat kơ pô riêng gah ih ôh.” “Trông čhai čiăng ngă jhat” jing sa klei čŏng čiăng ngă, ñu mtă kơ anak amâo dưi čŏng ngă jhat kơ pô riêng gah ôh. Kdlưn hĭn mơh, klei trông čhai čiăng ngă jhat dôk lač tinei, êjai pô riêng gah “dôk giăm ih leh anăn knang kơ ih”. “Dôk êđăp ênang” wăt čiăng lač “Knang kơ ih”, pô riêng gah mâo klei hơĭt ênang, knang leh anăn amâo mâo klei răng huĭ kơ pô ôh. Kyuanăn, klei soh tinei amâo knŏng ngă klei jhat ƀai, ƀiădah wăt lhiăr kơ klei knang leh anăn bi mjhua klei hơĭt ênang mnuih mkăn. Drei ƀuh klei jhat ƀai anei klă hĭn hlăm klei Y-Yuđas Iskariôt lhiăr: “Snăn leh Y-Yuđas mă klŏ kpŭng anăn, gơ̆ kbiă đuĕ mtam; hlăk anăn mmăt mlam leh” (Y-Yôhan 13:30). Jao kơ mnuih mkăn kpŭng đrut hlăm kčok êa mnăm jing klei bi knăl kơ klei mpŭ leh anăn kơ mah jiăng sĭt suôr (H’Rut 2:14). Ƀiădah wĭt lač kơ klei “dôk êđăp ênang” Khua Yang Yêsu, bi Y-Yuđas lĕ lhiăr leh kơ Khua Yang Yêsu. Mâo pô mgang kơ bruă ngă ñu čhĭ Khua Yang, ƀiădah Klei Aê Diê Blŭ brei ƀuh jing sa čô mnuih jhat kjham leh anăn tluh čiăng kơ prăk.
Klei Bi Hriêng 3:27-30 brei ƀuh, čiăng mkŏ mdơ̆ng sa êpul êya suaih ktang, brei mâo hĕ dua mta phŭn: Tal sa, mđing uêñ kơ klei kƀah pô mkăn. Khua ƀĭng kna Y-Pôl mtô leh phung đăo Phung Sang Aê Diê Philip: “Đăm ngă ôh sa mta klei hŏng klei mĭn kơ pô amâodah hŏng klei mgao, ƀiădah hŏng klei luă gŭ brei diih yap phung mkăn jing prŏng hĭn kơ diih pô. Brei grăp čô hlăm phung diih đăm mĭn kơ klei tŭ dưn knŏng kơ ñu pô ôh, ƀiădah mĭn wăt kơ klei tŭ dưn kơ phung mkăn msĕ mơh.” (Philip 2:3-4). Tal dua, dôk hdĭp sĭt kpă, thâo khăp. Klei knang jing mta mnơ̆ng bi đuôm đru êpul êya bi mguôp suôr tliêr hdơ̆ng pô. Čiăng dưi djă pioh klei suaih ktang hlăm hdơ̆ng phung anak ƀuôn sang Aê Diê, brei mâo klei bi knang hlăm hdơ̆ng pô. Klei Aê Diê Blŭ mtô: “Tui duah bĕ klei êđăp ênang hŏng jih jang mnuih, leh anăn klei doh jăk, tơdah kƀah klei anăn amâo mâo sa čô srăng ƀuh Khua Yang ôh.” (Hêbrơ 12:14).
Hruê anei, hlăm bruă bi lar klei hâo hưn hlăm ƀuôn sang, lu pô dôk “hdĭp msĕ êpei” mjhua bruă ngă anei bi mlih bi mjing rup amâo sĭt kăp mplư arăng, amâodah yua msĕ si mnơ̆ng yua pioh ngă jhat, mčeh luar, ksŭng ngă kơ phung mnuih dôk êđăp ênang “tơdah arăng amâo tuôm ngă jhat kơ ih ôh”! Tinei, mtao Salômôn amâo djŏ ôh čiăng lač kơ anak, jih jang klei bi kdơ̆ng jing soh sơăi, ƀiădah mtao kčŭt ƀuah kơ phung khăp duah klei ngă jhat, klei bi tăng mgăl amâo năng. Jing phung anak ƀuôn sang Aê Diê leh anăn dôk hdĭp thâo mĭn, brei drei jing phung tui duah klei êđăp ênang (Y-Mathiơ 5:9), leh anăn “Tơdah dưi, gĭr bĕ, dôk êđăp ênang hŏng jih jang mnuih.” (Rôm 12:18).
Ya drei ngă čiăng đru bi mguôp mbĭt djă pioh klei suaih ktang hlăm phung anak ƀuôn sang Aê Diê?
Wah lač: Ơ Khua Yang, akâo Ih đru kâo dôk hdĭp klei hdĭp sĭt kpă, leh anăn thâo khăp kơ phung riêng gah kâo, čiăng kơ hŏng klei anăn diñu dưi ƀuh rup Khua Yang hlăm klei hdĭp kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 38
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
