I Pêtrôs 2:11-12
“Bơ̆n athei oei sa pơm mă ‘lơ̆ng ‘bơ̆t anăp lu bơngai ưh kơ lui” (I Pêtrôs 2:12a)
Nơ̆r jet tơtơchĕng pơwao:
- ‘Bok Pêtrôs pơting kơ lu kon ‘Bok Kei-Dei nhen thoi bu?
- Sư đei bơtho khan kơ lu kon ‘Bok Kei-Dei kăl kơ đei arih ‘lơ̆ng lăm teh đak âu thoi yơ?
- Pơm thoi yơ lu bơ̆n kư̆ kơ hơdrin bơwei tơdrong arih sa ‘lơ̆ng lăm teh đak mă khan đei lơ tơdrong ưh kơ hlôh kơ bơ̆n păng hlôh jrok kơ bơ̆n?
‘Bok Pôl đei pơtơm blŭng a đei tơblŏk kơ bơ̆n pơlei lu bơ̆n noh jơ̆ plei lơ̆ng. Sư đei pơtih gia kơ bơ̆n nhen thoi “bơngai chă mưng hnam, păng bơngai oei yak rok trong” tơ kơpal teh âu (trong 11a). Tơpă lu bơ̆n nhen thoi bơngai tơmoi oei yak lăm teh đak âu. Pơlei bơ̆n tơpă noh jơ̆ plei ‘lơ̆ng, anih mă ‘Bok Krist oei pơgơ̆r (Philip 3:20). Kơplah lu bơ̆n đei hlôh kơ pơlei bơ̆n tơpă noh jơ̆ plei ‘lơ̆ng tơ kơpal plĕnh, lu bơ̆n gô đei arih pha ra lăm kơplah bơ̆n oei arih dang ei.
Arih ‘lơ̆ng păng tơpăt pơtơm đơ̆ng tơdrong sơngah kơ dôm tơdrong pơhlŭ pơlung đơ̆ng tơdrong wă sĕch akar, tơdrong wă lăm kret tơsen, păng tơdrong hưch ham hăm tơdrong ưh kơ ‘lơ̆ng rơgoh mă khan lăm teh đak âu ling lang kơ pôk pơ ư kơ tơdrong noh (trong 11b). Minh ‘nu bơngai tơmoi mă oei yak năm sư ưh kơ pơm kiơ̆ dôm tơdrong kơ nê̆ mă sư đei yak hlôi, mă lei bơwei tơdrong ‘lơ̆ng rơgoh wă pơchrang hơdah tơdrong arih trŏ kơ đơ̆ng pơlei ‘lơ̆ng kơ pal plĕnh ti.
‘Bok Pôl đei nơ̆r krao wơ̆n lu bơ̆n athei “arih mă ‘lơ̆ng hăm lu bơngai mă ưh tam mă lui” (trong 12a). Tơdrong ‘lơ̆ng ‘bơ̆t âu ưh kơ sĭ minh tơdrong bơwei khôi juăt đĕch mă lei hăm tơdrong tơpăt hăm ‘mêm mơnat. Noh jơ̆ arih đĭ jơhngơ̆m lăm tơdrong jang, ưh kơ pơgơ̆m dah hơlĕnh, krăng kơchăng wă dŏng tơgŭm bơngai jih ‘ma, păng ưh kơ jô̆ jŏk kơplah đei tơdrong pơgŏ pơđep. ‘Nâu jơ̆ lu bơ̆n đei tơ’bôh Kră Yang Yêsu ăn kơ lu bơngai mă ưh tam mă băt kơ Sư. Tơdrong ‘mêm ưh kơ sĭ tơdrong pơma đĕch ôh, mă lei kăl kơ đei pơm “tơdrong ‘lơ̆ng” ăn kơ lơ bơngai ưh kơ lui ‘bôh păng măt, păng đon kơ tơ̆ng. Mă khan lăm teh đak âu ‘bĕnh kơ tơdrong ưh kơ hơtŏ lăm tơdrong sek tơlang, mă lei bơ̆n đei rơih iŏk lăm tơdrong arih tơpăt. Mă khan kon bơngai đei tơdrong areh, lu bơ̆n kư̆m rơih iŏk arih hăm tơdrong ‘mêm păng mơnat. Đơ̆ng tơdrong arih bơ̆n đei tơplih đơ̆ng lăm jơ-hngơ̆m păng đei pơm tơ’bôh gah nguaih noh jơ̆ nơ̆r tơl pran ăn kơ Tơdrong ‘Nao ‘Lơ̆ng dŏng pơklaih đơ̆ng Kră Yang Yêsu.
Mălei, đei minh tơdrong tơpă mă ưh kơ ‘lơ̆ng thoi âu, mă khan lu bơ̆n đei arih ‘lơ̆ng thoi Kră Yang đei bơtho, phŏ kơnh kư̆m oei đei bơngai pơma kơnê̆ păng hlôh jrok kơ bơ̆n (trong 12). Mă thoi noh, tơdah lu bơ̆n adrin arih lăm tơdrong tơpăt păng ‘mêm mơnat lei tơdrong âu gô ba ăn tơdrong mơsêh pran wă gơh tơplih tơ anih bơ̆n oei ‘noh lu sư gô ‘bôh păng tơplih. Păng kơnhăm tuch luch kơ tơdrong arih ‘lơ̆ng noh jơ̆ ưh kơ sĭ wă kơ đe ư-ang kơ bơ̆n , mă lei wă kơ đe ư-ang kơ Kră Yang ‘Bok Kei-Dei. Kơplah bơ̆n đei tơl ăn kơ bơngai areh kơ bơ̆n hăm tơdrong ‘mêm, tơl kơ bơngai pơm kơnê̆ hăm tơdrong tơpăt, lu bơ̆n đei pơih ăn trong kơ Tơdrong ‘Nao ‘Lơ̆ng dŏng pơklaih Kră Yang Yêsu hơtŭt kơ lơ bơngai. Tơdrong ‘lơ̆ng lăm teh đak đơ̆ng lu bơ̆n ‘noh jơ̆ ‘bai bơtho pran dêh ăn kơ teh đak đei mơ̆ng păng ‘bôh dang ei.
Ơ Kră Yang, apinh Ih tơgŭm inh ‘blŏk lăm kơpal teh âu inh nhen thoi bơngai tơmoi wă kơ huei kơ yak kiơ̆ dôm tơdrong ‘maih wă hiong răm lăm chăl âu. Apinh Ih ăn kơ inh jơhngơ̆m pran wă kơ arih ‘lơ̆ng tơpăt lăm dôm tơdrong inh wă yak năm păng đei ‘bĕnh blai tơdrong ‘mêm lăm tôm tơdrong jang, wă kơ đơ̆ng chăl arih inh, A-năn Ih đei ư-ang. Yua anăn Kră Yang Yêsu Krist, Amen.
Lu bơ̆n tơ’bôh A-năn Kră Yang lăm teh đak âu thoi yơ?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Jop 33
Kênh Youtube BHKTHN:
