Pajlug 28:1
Nqe cim:
“Cov neeg ua phem khiav thaum tsis muaj neeg caum ntes lawv, tiamsis cov neeg ncaj ua siab tawv qhawv ib yam li tsov ntxhuav”(Pajlug 28:1)
Lus nug xav:
– Yam dabtsi ua rau tus neeg phem ua neej ntshai rwg txawm yog twb tsis muaj qhov txaus ntshai?
– Txojkev sib raug zoo yog nrog Vajtswv ua rau peb muaj siab tawv qhawv ua neej txhua hnub li cas?
– Peb pom tias cheemtsum ntseeg tus Tswv thiab ua siab tawv qhawv rau seem twg?
Nqe Pajlug no qhia tawm txojkev sib txawv meej txog txojkev tsis kaj siab ntawm tus neeg phem thiab txojkev kaj siab ntawm tus neeg ncaj ncees. Txojkev txhawj ntawm cov neeg tawmtsam Vajtswv tau muab piv zoo li cov tubrog lossis cov tsiaj khiav thaum tsis muaj yeebncuab lossis cov neeg yos zoov caum (saib Levis Kevcai 26:17, 36). Cov neeg phem niaj hnub ua neej nrog txojkev tsis qab siab, lub siab ntshai rwg; lawv niaj hnub txhawj vim tej kev txhaum ua rau lawv lub siab tsis kaj li. Kev txhaum thiab nrug deb Vajtswv ua rau lawv txhawj thiab tsis qab siab ua neej vim ntshai rwg Nws txojkev txiav txim.
Txawv qhov ntawd, tus neeg ncaj ncees – cov neeg uas nrog Vajtswv mus, lawv ua neej ncaj ncees, tseeb meej – tau muab piv “siab tawv qhawv zoo li tus tsov ntxhuav” (nqe 1). Txojkev kaj siab hauv lub siab ntawm tus neeg hlub tus Tswv thiab ua haujlwm pab sawvdaws tau muab piv zoo li ib tug “tsov ntxhuav muaj zog tshaj lwm yam tsiaj thiab tsis ntshai dabtsi li” (Pajlug 30:30). Nws muaj zog txaus tom tus uas tos nws kev, yog li ntawd tsis muaj lajthawj yuav ntshai. Lub zog ntawm tus neeg ncaj ncees tsis yog nws tus kheej ua tau, tiamsis yog nyob ntawm lub siab dawbhuv thiab muaj txojkev sib raug zoo nrog Vajtswv yog. Thaum peb ua neej mloog lus thiab ntseeg tus Tswv, peb yuav tau cawm dim tej kev txhawj ntshai. Peb yuav sawv tau ruaj khov, qhia qhov tseeb, thiab ua taus siab tawv qhawv ua neej, rau qhov paub tias Vajtswv niaj hnub nrog peb nyob.
Yog tus ntseeg Tswv Yexus, peb qhov kev dawbhuv yuav tsum txawb rau ntawm Tswv Yexus. Los ntawm Nws, peb tau kev zam txim thiab tau suav tias ncaj ncees tabmeeg Vajtswv. Yog li ntawd, peb tau nqua hu los ua neej hauv txojkev ncaj ncees, txhais tau tias xaiv txojkev ncaj ncees ua, ntseeg tus Tswv thiab mloog Nws lus. Peb ncaj ncees rau tes haujlwm, hais tseeb rau kev sib raug zoo, ruaj siab ntseeg tus Tswv nyob txhua lub tsamthawj. Thaum ntawd, Vajtswv pub rau peb muaj lub siab tawv qhawv tiv taus tej kev sim siab, tawmtsam, dag ntxias, thiab ua tau siab tawv qhawv ua timkhawv rau tus Tswv. Vajtswv Txojlus hais rau peb tias: “cov neeg ncaj ua siab tawv qhawv ib yam li tsov ntxhuav” (nqe 1). Peb txhua tus cia li tshuaj saib peb lub siab kiag hnub no, yog peb tseem tshuav qhov twg ua rau peb txhawj ntshai lossis tsis qab siab, cia li hais qhia rau tus Tswv thiab lees txim. Cia li sawv tsees thiab taug tus Tswv txojkev uas yog qhov tseeb thiab thov Nws pub lub siab tawv rau peb zoo li tus tsov ntxhuav.
Thov Vajtswv,
Peb Leej Txiv tus uas nyob saum ntuj, thov ua tsaug qhov uas Koj nqua hu nyuam yaus ua neej ncaj ncees dhau los ntawm Tswv Yexus. Thov ntxuav nyuam yaus lub siab kom huv thiab tshem tej kev ntshai mus. Thov Koj pub lub siab tawv qhawv kom nyuam yaus sawv tau ruaj khov hauv txojkev ntseeg, ua neeg mloog Koj lus, thiab ua rau Koj tau ntsejmuag. Nyuam yaus tuav Tswv Yexus Khetos lub npe thov, Amees.
Peb cheemtsum hloov yam dabtsi kom ua tau lub neej siab tawv qhawv zoo li tus tsov ntxhuav?
Nyeem Vajluskub hauv peb lub xyoo: Yauj 8
Kênh Youtube BHKTHN:
