Mathais 26:1-13
Nqe cim zaj kawm:
“Kuv qhia tseeb rau nej hais tias, qhov uas tus pojniam no ua yuav nrov ncha mus rau hauv qab ntuj no txhua qhov uas muaj neeg mus qhia Txojmoo Zoo, kom sawvdaws nco txog tes haujlwm uas tus pojniam no tau ua lawm.” (Mathais 26:13)
Lus nug xav:
– Cov thwjtim thiab cov thawjcoj kev ntseeg muaj lub siab li cas rau Tswv Yexus?
– Qhov uas Malis ua rau Tswv Yexus muaj lub ntsiab lus dabtsi?
– Peb yuav xyaum Malis tus qauv li cas?
Zaj xwm no tshwm sim ob hnub ua ntej Kevcai Hla Dhau ntawm cov Yudais. Tswv Yexus rov qhia dua rau Nws cov thwjtim txog Nws txojkev tuag hais tias: “luag yuav muab Neeg Leej Tub coj mus ntsia rau saum ntoo khaublig” (nqe 2). Vajluskub tsis qhia tias cov thwjtim teb li cas, tiamsis cov thawj ntawm cov povthawj thiab cov txwjlaug sib tham “nrhiav kev yuav ntes Yexus twjywm coj mus tua povtseg”. Txawm li ntawd los, lawv tseem tsis tau kam ua rau lub caij ua Kevcai Hla Dhau, vim ntshai tsam cov pejxeem yuav ntxhov (nqe 4-5).
Thaum cov thawjcoj ntawm sab kev ntseeg tabtom muaj lub siab zoo li ntawd, ces nyob hauv lub zos Npethanis muaj ib tug pojniam hu ua Malis tau ua ib yam uas qhia tshwm nws txojkev hlub thiab hwm tus Tswv. Thaum muab piv nrog Malakaus 14:3-9 thiab Yauhas 12:1-8, peb paub tias tus pojniam no yog Malis, uas yog Mathas thiab Laxalaus nkawd tus muam. Malis nqa tau ib hwj roj tsw qab uas muaj nqis heev los hliv fij rau Tswv Yexus, hwj roj ntawd yog yam muaj nqis tshaj plaws uas nws muaj. Malis yog tus uas ibtxwm zaum ntawm Tswv Yexus kotaw mloog Nws qhuab qhia (Lukas 10:42). Yog li ntawd, nws totaub hais tias yog nws tsis siv lub sijhawm no los qhia tshwm nws txojkev hwm thiab kev hlub rau tus Tswv ces tomqab yuav tsis muaj sijhawm ntxiv lawm. Qhov uas Malis hliv roj rau saum Tswv Yexus taubhau yog ib txojkev lees paub tias Tswv Yexus yog Vajntxwv kav nws lub neej. Nws tsis yog tsuas pleev roj xwb, tiamsis nws hliv tag nrho lub hwj roj uas muaj nqis heev, qhia tias nws fij tag nrho nws lub neej rau tus Vajntxwv uas yog nws tus Tswv. Txawm cov neeg nyob ib ncig cem nws hais tias: “Yog muab hwj roj ntawd muag yuav tau nyiaj ntau, thiab muab cov nyiaj ntawd mus pub rau cov neeg pluag kuj zoo dua!” (nqe 9), los Tswv Yexus qhuas hais tias: “Qhov uas nws ua rau kuv ntawd yog qhov zoo” (nqe 10), thiab “Qhov uas tus pojniam no hliv roj tsw qab rau kuv lub cev, twb yog nws tu kuv lub cev cia rau hnub uas faus kuv” (nqe 12). Tus Tswv tseem hais ntxiv tias tes haujlwm uas Malis tau ua yuav nrov ncha mus rau txhua qhov uas Txojmoo Zoo tau tshajtawm, ua qauv rau txhua tiam neeg txog txojkev hlub, kev pehawm thiab kev ua Vajtswv tes haujlwm hauv qab ntuj no.
Niaj hnub nimno, yog peb xav qhia tshwm peb txojkev hlub tus Tswv, kev paub Nws thiab kev hwm Nws kom tsimnyog, peb yuav tsum siv sijhawm ntau los zaum ntawm tus Tswv kotaw nyeem thiab kawm Vajtswv Txojlus. Dhau ntawm txojsia uas tus Tswv pub, Nws tseem pub peb muaj ntau yam koob hmoov ntxiv. Yog li ntawd, peb yuav tsum siv sijhawm, tej peevxwm, nyiaj txiag thiab txhua yam uas peb muaj los ua haujlwm rau Vajtswv lub Tebchaws. Thaum peb hlub tus Tswv thiab fij peb tus kheej rau Nws, tej zaum peb kuj yuav raug luag cem, thuam lossis raug liam… Tiamsis cia peb xyaum Malis tus qauv, tsuas ntsia ntsoov tus Tswv thiab saib Nws txaus siab rau yam peb fij thiab yam peb ua rau Nws xwb. Tibneeg saib sab nraud, tiamsis Vajtswv saib lub siab; Nws yuav yog tus tiv thaiv thiab pub nqi zog rau peb cov uas ua siab ncaj ua Nws tes haujlwm.
Thov Vajtswv,
Tswv Yexus, ua Koj tsaug uas Koj tau cawm nyuam yaus dim thiab pub nyuam yaus muaj feem ua Koj tes haujlwm. Thov Koj pab kom nyuam yaus niaj hnub fij tag nrho nyuam yaus lub neej rau Koj, ua neej txhawb nqa Koj lub npe dhau ntawm txhua yam haujlwm uas nyuam yaus ua. Nyuam yaus tuav Tswv Yexus Khetos lub npe thov, Amees.
Peb tabtom ua Vajtswv tes haujlwm los ntawm lub siab zoo li cas?
Nyeem Vajluskub hauv peb lub xyoos: II Kauleethaus 1
Kênh Youtube BHKTHN:
