Mathiơ 25:14-23
“Ơ dăm, ih jang kơ inh ‘lơ̆ng tơpă, ih ưh kơ lê̆ ôh dôm tơdrong jang inh. Yua kơ ih jang ‘lơ̆ng, na mă khan tơdrong jang ih iĕ, inh gô ăn kơ ih jang tơdrong tih hloh dơ̆ng. Na dang ei bĕ ba oei hơdai hiôk chơt hăm inh yŏng ih. Na yŏng sư khan: Ơ dăm, ih jang kơ inh ‘lơ̆ng tơpă, ih ưh kơ lê̆ ôh dôm tơdrong jang inh. Yua kơ ih jang ‘lơ̆ng, na mă khan tơdrong jang ih iĕ, inh gô ăn kơ ih jang tơdrong tih hloh dơ̆ng. Na dang ei bĕ ba oei hơdai hiôk chơt hăm inh yŏng ih.” (Mathiơ 25:21, 23)
Nơ̆r jet tơchĕng pơwao:
– Adrol kơ wă năm tơ dêh ataih, yŏng tơ’ngla sư pơjao kơ lu bơngai jang kơ sư tơdrong kiơ?
– Yua kơ kiơ bơngai mơdro sa đei lơi dơ̆ng pơđăm hlak jên maih kư̆m đei apah tơmam bơnê thoi bơngai mơdro sa đei lơi dơ̆ng ‘bar hlak jên maih?
– Bơ̆n kăl kơ pơm kiơ wă kơ đei Kră Yang bơnê jơ̆ bơngai jang ‘lơ̆ng păng tơnăp?
Kră Yang Yêsu yua dơ̆ng tơdrong pơtih gia wă pơtrŭt lu bơngai pơhrăm păng Sư kư̆ adrin bơ̆jang kơ Kră Yang chang gô năr Sư jur. Minh ‘nu yŏng tơ’ngla wă năm tơ dêh tơmoi ataih sư krao lu bơngai jang kơ sư wă ăn kơ lu sư jên maih, minh ‘nu bơngai đei pơđăm hlak jên maih, bơngai mă ‘bar ‘bar hlak, bơngai mă pêng minh hlak. Minh hlak jên maih noh tih dêh, dang pơđăm khei jang đơ̆ng minh ‘nu bơngai jang hmă, tơdrong mă phara băl lăm dôm ‘nu bơngai jang noh “gô mơ̆ng kơ lu sư gơh mơdro sa kơdih” (trong 15). Ưh kơ đei bu ưh kơ ăn jên maih mălei yŏng tơ’ngla băt tơdrong gơh hơgei rim ‘nu lu sư athei noh ưh kơ đei dan trăp hloh kơ tơdrong hơgei lu bơngai jang kơ sư noh.
“Bơngai mă iŏk pơđăm hlak jên maih yŏng sư noh, hơloh năm chă mơdro sa hloi, đei lơi kơ sư pơđăm hlak jên maih dơ̆ng. Bơngai mă iŏk ‘bar hlak jên maih yŏng sư noh, kư̆m pơm lei-lăi, đei lơi kơ sư ‘bar hlak jên maih dơ̆ng.” (trong 16-17). Nơ̆r “đei lơi” wă khan mơdro sa đei lơi tôch ai, ‘nâu bơih bơngai jang hlôh tơdrong păng tơdrong kơnhăm đơ̆ng yŏng tơ’ngla gô wih brŏk tơpă păng jơ noh gô chă lu sư (trong 19). Mălei tơdrong mă lu sư ưh kơ lêng ê noh kơplah yŏng lu sư wih brŏk ‘bôh lu sư chu kiơ̆ nơ̆r păng tơnăp lăm tơdrong jang đei pơjao, lu sư đei yŏng tơ’ngla pơư bơnê, yua lăm tơdrong jang lơ hloh dơ̆ng păng đei apah tơmam, mă khan bơngai mơdro sa đei lơi pơđăm hlak jên maih dah ‘bar hlak jên maih tă kơ đei tơmam apah lei lăi băl ngăl (trong 21-22). Yŏng tơ’ngla apah tơmam kiơ̆ kơ tơdrong chu kiơ̆ nơ̆r, tơnăp, adrin đĭ jơhngơ̆m lu sư ưh kơ sĭ khan kiơ̆ kơ jên mơdro sa đei lơi ôh.
Lơ bơngai lui dang ei oei tam mă băt kơnăl tơdrong Kră Yang ăn kơ bơ̆n. Đei bơngai mơ’nah khan ăn tŏ sĕt dêh, thoi noh na lu sư ưh kơ pơ̆n wă bơ̆jang kơ Kră Yang, lu sư wă pơjao tơdrong jang bơ̆jang noh kơ lu bơngai mă đei tơdrong hơgei, kĕ pran hloh kơ bơ̆n. Bơ̆n kăl kơ băt thoi âu Kră Yang băt hơđăl tơdrong pran bơ̆n păng sư hơpơi wă kơ bơ̆n bơ̆jang lăm tơdrong bơ̆n kĕ jang đĕch, păng mă khan lăp “minh hlak jên maih” đĕch lei na noh kư̆m jên tih wă kơ bơ̆n gơh mơdro sa “đei lơi” kơ Kră Yang. Jên maih mă Kră Yang pơjao kơ bơ̆n ưh kơ sĭ wă kơ bơ̆n yua iŏk kơ bơ̆n kơdih, mălei wă kơ bơ̆n “đei lơi” ăn kơ Kră Yang, wă khan athei yua iŏk dôm tơdrong kiơ Kră Yang ăn thoi kơ jơ năr, jơhngơ̆m pran, tơdrong gơh hơgei, jên tơmam .v.v… wă bơ̆jang kơ Kră Yang păng đei yua ăn kơ lơ bơngai. Ưh kơ sĭ khan kơdrô̆ ‘bok bơtho, bơngai chă bơtho đĕch ôh, rim ‘nu kơ bơ̆n tă kơ bơngai jang kơ Kră Yang ngăl. Athei jing lu bơngai jang ‘lơ̆ng păng tơnăp kơ Kră Yang.
Ơ Kră Yang mă ‘mêm, inh bơnê kơ Ih đei dŏng inh, ăn kơ tơdrong hơgei păng ăn kơ inh gơh bơ̆jang lăm hnam Ih. Apinh Kră Yang tơgŭm inh ling lang đĭ jơhngơ̆m păng tơnăp bơ̆jang kơ Ih wă kơ năr Ih jur, inh đei tơmam apah bơnê gĭt găl đơ̆ng Ih. Krao khan yua anăn Kră Yang Yêsu Krist, Amen.
Kră Yang ăn kơ bơ̆n tơdrong hơgei ayơ? Bơ̆n oei jang đei lơi ăn kơ Kră Yang thoi yơ?
Đŏk Sơ̆p hla bơar ‘Bok Kei-Dei lăm pêng sơnăm: Êsơtê 4
Kênh Youtube BHKTHN:
