Klei Aê Diê Blŭ: II Y-Timôthê 1:3-5
Êlan kliăng: “Êjai kâo hdơr kơ ih nanao hruê leh anăn mlam hlăm klei kâo wah lač” (II Y-Timôthê 1:3b)
Klei êmuh ksiêm mĭn: Hlăm klei bi mni kơ Aê Diê kyua Y-Timôthê, Khua ƀĭng kna Y-Pôl lač hbĭl ñu hdơr kơ Y-Timôthê leh anăn hdơr kơ ya klei? Si klei Khua Yang bi hriăm drei kơ klei uêñ mĭn leh anăn răng kriê mnuih mkăn?
Năng ai kyua klei amâo lŏ dưi dôk hơĭt ôh kơ klei phung mtô soh mŭt hlăm Phung Sang Aê Diê ngă lu klei bi jhat kơ phung đăo, kyuanăn hlăm hră I Y-Timôthê, leh klei kkuh čhưn ti kŏ hră, Khua ƀĭng kna Y-Pôl mâo “klei mtă” mtam kơ Y-Timôthê brei gơ̆ ăt dôk ti ƀuôn Êphêsô. Ƀiădah lĕ, hlăm hră mơĭt tal dua, ñu pioh mmông bi mni kơ Aê Diê kyua anak ñu khăp êdimi, hŏng klei anăn drei mâo klei hriăm ya knuih brei drei mâo hĕ djŏ kơ klei răng kriê, đru bi mđĭ hlăm klei đăo.
Knŏng hŏng dua tlâo pruê̆ blŭ đŭt, tlâo blư̆ Khua ƀĭng kna Y-Pôl lač ñu “hdơr” kơ anak ñu Y-Timôthê. Êlâo hĭn, ñu hdơr kơ Y-Timôthê “hruê leh anăn mlam” hlăm klei wah lač. Klei jăk hĭn sa čô ama hlăm mngăt ngă kơ anak ñu hlăm klei đăo jing myơr gơ̆ kơ Ama hlăm adiê. Klei hdơr “hruê leh anăn mlam” brei ƀuh sĭt nik Khua ƀĭng kna Y-Pôl dlăng kơ Y-Timôthê jing msĕ si anak ñu pô kkiêng, kyuadah amĭ ama amâo mdei ôh mĭn kơ phung anak. Klei anei msĕ mơh brei ƀuh, klei Y-Pôl iêô kơ Y-Timôthê “anak kâo khăp êdimi”, “anak kâo sĭt hlăm klei đăo” jing klei iêô hŏng klei sĭt, amâo djŏ klei duah myâo mă ti êlah kƀuê ôh.
Tal dua, Khua ƀĭng kna Y-Pôl “hdơr kơ êa ih” (êlan 4). Ya ngă Khua pô mtô Y-Timôthê luh êa ală drei amâo thâo ôh, ƀiădah klei drei thâo jing măng ai ya ngă ñu hia, Khua ƀĭng kna Y-Pôl ăt thâo klei ênguôt leh anăn klei rŭng anak ñu hlăm mngăt găn leh. Uêñ mĭn, bi mđĭ ai mnuih mkăn jing dôk hmư̆, thâo, leh anăn hdơr kơ jih jang klei ktrŏ, klei rŭng phung ayŏng amai adei drei. Tăp năng drei hmư̆ klei phung ayŏng amai adei drei yăl dliê klei dleh dlan digơ̆ găn, drei lač kâo srăng wah lač brei kơ ayŏng, kơ amai, ƀiădah drei amâo đru wah lač ôh, wăt hlŏng wơr bĭt hĕ mơh klei ktrŏ digơ̆ tơdah drei wir đuĕ, êdei tinăn, drei kăn lŏ hdơr êmuh rei si klei digơ̆ yăl dliê jing leh ară anei.
Tal tlâo, Khua ƀĭng kna Y-Pôl hdơr kơ klei đăo sĭt suôr Y-Timôthê (êlan 5). Amâo djŏ ñu knŏng hdơr kơ êa ală, kơ klei ktrŏ ôh, ƀiădah wăt ñu yap, bi mđĭ ai mơh anôk kdlưn hĭn hlăm pô anăn. Sa čô răng kriê, đru bi mđĭ klei hdĭp myang srăng uêñ mĭn čiăng thâo ya jing klei thâo kdlưn hĭn hlăm pô ñu dôk răng kriê, si klei đăo gơ̆ ară anei, si klei hdĭp klei đăo phung mah jiăng pô anăn, digơ̆ mâo klei bi hmăi mơ̆ hdơ̆ng digơ̆. Tơdah amâo mâo klei khăp sĭt, amâo mâo klei bi mguôp sĭt ôh, sĭt nik klei đru bi răng kriê dleh snăk mâo boh tŭ dưn.
Hlăm hruê kăm anei, kơ hlei pô drei srăng bi êdah klei uêñ mĭn? Drei ƀuh ya klei brei drei hriăm bi thâo hĭn čiăng kơ drei dưi răng kriê leh anăn đru pô mkăn jăk hĭn?
Wah lač: Ơ Khua Yang, kâo bi mni kơ Ih kyuadah kâo thâo kral Ih leh anăn đĭ hriê kơ prŏng hŏng klei phung nao êlâo hdơr kơ kâo hlăm klei wah lač, dôk hmư̆ klei kâo mĭn leh anăn đru bi mđĭ ai kâo. Đru kâo hriăm leh anăn ngă klei kâo hriăm leh čiăng đĭ hriê kơ prŏng hlăm klei đăo, hur har mă bruă kơ sang Ih hĭn. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: H’Êsther 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
